RD Minister-in Leimin vanga Sateek SPMRM market & Guest House harsatna tawh a hmunah enfiah

Aizawl | August 19, 2023: Rural Development Minister Pu Lalruatkima chuan tukin khan Aibawk Cluster huamchhung Sateek Wholesale Market-cum-Guest House chu tlawhin, tunhnai ruahsur avanga building bulthuta leimin thlengin harsatna a thlente a enfiah a; hmalak chhunzawm tulte RD Department hotute leh khawtlang hruaitute a sawipui.

RD Minister Pu Lalruatkima chuan Sateek SPMRM Wholesale Market-in leimin avanga harsatna a tawk chu pawi a tih thu sawiin, Department thawktute bakah khawtlang hruaitute nen building chhanhim tura tanlak tlan a tul thu leh nitina a dinhmun ngaihven tlan a tul thu sawiin, tul angte inhrilhhriat zung zung a pawimawh a ni, a ti a. Leilung che zia hriat lawk vek sen a nih loh thu sawiin, tun dinhmunah building himna tura tulte ngaihven thuai chu ngaih pawimawh hmasak a nih thu leh fur zawh veleh hmalakna dangte pawh kalpui tum a nih thu a sawi a. RD Department chu building dinhmun kimchang report kar tina siama pe thin turin a chah a ni.

Pu Lalruatkima chuan India rama Shyama Prasad Mukherji Rurban Mission (SPMRM) Cluster 300 awm zingah Aibawk Cluster chu an huamchhunga hmalaknate zo hmasa ber a nih thu leh Sawrkar laipui pawhin chhuanawm a tih thu a sawi a. Sawrkar chu mipuite ta a nih angin hmasawnna ruhrel din leh bungruate chu mipui ta a ni tiin, khawtlang mipuite chu neitu thinlung pua enkawl chhunzawm zel turin a chah a. SPMRM Wholesale Market chu mipui tam takin chhawr tangkai zel se tih chu Sawrkar duh dan a nih thu a sawi a. Khawtlang mipui tawiawm tawhnaah lawmawm sawiin, an tawiawm chhunzawm zel a beisei thu a sawi bawk.

He hunah hian tunhnai ruahsur avanga leiminin Sateek SPMRM Wholesale Market building dinhmun a tih derthawn dante enfiah a ni a. Chhiatna nasa zawk a thlen loh nana hmalak nghal tulte sawiho niin, tui chhe paihna siam danglam, tuiput lo tura siam leh building leh a chhehvel tuihul taka siam chu hmalak hmasak tul a nih thu tarlan a ni a. Mipuite him zawk nan tun ruahtui tlak hun chhung hun engemawchen chu luah rih lova dah leh a himna tur lam hawi hna thawh ni se tih a ni a. Ngun taka vil chhunzawma chanchin ngaihven zui zel ni se tih a ni bawk.

Sateek Wholesale Market-cum-Guest House hi Shyama Prasad Mukherji Rurban Mission (SPMRM) sum cheng nuai 350 senga sak niin, October ni 14, 2022 khan hawn a ni a. Zopa chhiara chawng li niin, Bazar bakah hian mikhual thlenna, lirthei dahna, Canteen, Qtrs. leh tul dangte a awm a ni.

Minister hi RD Department atangin Addl. Secretary Pi Irene Zohlimpuii Chongthu, Deputy Secretary Pu Zoremthara Ralte, EE Pu A.Chhalai, Official dangte bakah Contractor leh khawtlang hruaitute'n an tawiawm a ni.