Railway Lei chim vanga thite ruang lakchhuah kim a ni tawh; Mizoram Police ui fing an tangkai!

Aizawl | August 25, 2023: Nimin piah (August 23,) zinga Sairanga Railway lei dawh mek chim vanga nunna chan ruang hnuhnung ber chu vawiin chhun dar 12:54 khan hmuha lakchhuah a ni ta a. Railway Lei chim vanga thite ruang lakchhuah kim a ni tawh.

Heti hian Lei chim vang hian thawk 26 atangin mi 23 in nunna an chan a, vawiin khan an vaia ruang hi hmuha lakchhuah ni tawhin mi 3 in hliam na tak an tuar bawk.

Dt. 23.8.2023 zing lam dar 9:58AM vel khan Aizawl bul, Sairang rama Kurung lui chunga rel kawng lei (over bridge) dawh lai mek chu hnathawktu mi 26 in hna an thawh mek laiin vanduaithlak takin a chim a. He vanduaina thlengah hian hnathawktu mi 23 boralin, mi pathumin hliam an tuar a ni.

Ruang 18 chu he mi ni hian lak chhuah nghal a ni a, ruang panga erawh chu lei chim hian a chhilh a ni. Aizawl District Police, 1st MAP, 3rd MAP leh 5th IR Bn. atanga SDRF Team te, NDRF, BSF leh Sairang PHC leh Civil Hospital, Aizawl atanga Medical Team te, DM&R leh Aizawl DC atanga Quick Respond Team (QRT) te, Sairang YMA, Sairang Dinthar YMA leh Sihhmui YMA atanga mi tlawmngai thawk chhuakte chuan chhiatna thlen atanga ni hnih chhung hian ngawrh takin ruang zawn hna an thawk chhunzawm a. An thiamna leh thawhrimna zarah ruang hnuhnung ber hi vawiin (25.8.2023) dar 12:54 p.m. khan hmuha lak chhuah a ni. He chhanchhuah leh ruang zawn hna thawktu mi inpe zawng zawngte Mizoram Police chuan an chhuang hle a ni.

Mizoram Police ui fing, Canine Squad atangin - 1). 'Servo' (Search & Rescue, Handler: Const. Zonunsanga Ralte) leh 2). 'Offly' (Tracker, Handler: Const. Lalawmpuia) te pawn ruang zawn hna hi theihtawpa puiin, lei, chirh leh thil chim kara ruang hnuhnung pali zawn hmuh kawngah hian an thawk hlawk hle a ni.

Mizoram Police chuan hetiang Dog Squad chhuanawm tak an nei hi an lawmin kan ui fingte leh a enkawltute an chhuang hle tih thuchhuah siamin an tarlang.