Mizoram Assembly thutkhawm vawi 12na tiamchin awm lovin titawp

Aizawl | August 23, 2023: Mizoram Legislative Assembly 8-na, thutkhawm tum 12-na chu vawiin khan tiamchin awm lovin Speaker Pu Lalrinliana Sailo chuan a tawp a ni.

Ni 2 awh session chhunzawmna vawiin khan House ah zawhna 3 chhan hman a ni a. House dawhkanah lehkha pawimawh 10 dah a ni a, report 7 pharh a ni bawk.

Sorkar kum liam ta kum 3 chhunga dept. thenkhatin pawisa an lo hman pûk siam remna leh heng sum te hman remtihna Bill pass a ni a. Hei bakah hian Bill thar 2 leh Dan hman lai siam thatna tur Bill 2 pass a ni.

Dy. Chief Minister Pu Tawnluian Dan thar siamna tur Bill - “The Mizoram Ground Water (Control and Regulation) Bill, 2023.” a pu lut a. Hei hi lei hnuaia tui awm, a duh duhin an pump chhuah ngawt loh nana venhimna tur a ni a. Dam awmsa siam danglamna tur Bill - “The Mizoram Municipalities (Amendment) Bill, 2023.” a pu lut leh a. Heng Bill pahnihte pawh hi House-in lungrual takin a pass a ni.

Ni hnih chhung awh Mizoram Legislative Assembly hi nimin chawhma dar 10.30 khan Speaker Pu Lalrinliana Sailo kaihhruaiin tan a ni.

Nimin sessionah hian House member-te’n an thil ngaimawh zawng an sawichhuaha hun, ‘Calling Attention’ hun hmangin West Tuipui bialtu MLA, Nihar Kanti Chakma chuan a bial chhung, Tlabung leh Lunglei inkalpawhna kawngpui ber National Highway 302-na a chhiat lutuk avanga mipuiin harsatna an tawh nasat dan House a hrilh a. A sawi dan chuan tun hnaiah Tlabung leh a chhehvela khaw awm zawng zawngin tuilian nasa tak an tuar a; hetihlai hian helai biala mipuite chak lakna ber Tlabungah ni tin mamawh, buhfai thlengin lei tur a awm lova, hei hi a chhan ber chu Lunglei leh Tlabung inkar kawngpui NH 302-na a chhiat lutuk vanga lirthei an tlan that theih loh vang a ni, a ti a. Damlo phurtu lirtheite pawh tlan duh mah se kawng a chhiat avangin an tlan thei lova, tun hnaiah pawh kawng lakah damlo pahnih an thi nghe nghe a. Heng harsatna hrang hrang mipuiin an tawh mek te hi a lo ziaawm theih nan sorkar chu chak taka hma laksak turin a ngen.

Nihar Kanti Chakma thu sawi hi chhangin PWD changtu Chief Minister Pu Zoramthanga’n he lai kawngpui chhiat zia hi sorkar pawhin a hriat thu sawiin, kawngpui hi sial mek lai a ni a, hnathawh lai leh furpui a innan avangin harsatna hi thleng a ni, a ti a. Zangnadawmna leh Forest Clearance buaipui chhung a rei avangin hmalakna a kal chak thei lova. Sorkar chuan kawng sial hna thawktu Contractor leh NHIDCL te a theih ang anga nawrin a theihtawpin hma a la mek a ni, a ti.

- AIR