Forest (Conservation) Amendment Act, 2023 dodalna House in a pawmpui

Aizawl | August 23, 2023: Nimin Assembly Session inkhawmah Environment, Forest & Climate Change Minister Pu TJ Lalnuntluanga’n Official Resolution pu lutin Mizo mipuite dikna leh chanvo humhalh nan- Forest (Conservation) Amendment Act, 2023 an dodal tih chu House in a pawmpui.

A Resolution put luh chhan sawiin Minister chuan, a tel lova mihringte an khawsak theih loh, ram ngaw humhalhna Dan tha tak, Forest Conservation Act, 1980 chu Parliament-in siam danglamin ramngaw humhalhna dan hman mek chu thiat a ni mek a. Dan tharah chuan hmasawnna hnathawh nan emaw ram humhimna tur emaw a nih chuan Forest Clearance lak kher ngai lovin ram ngaw a thiat theih tawh dawn a. Ram dang nena inrina hmun atanga kilometer 100 bial chhunga ram ngaw phei chu sorkar laipuiin ram humhim nana hma a lakna tur a nih chuan thiah mai theih a ni tawh dawn a. Mizoram chu a pumpuiin International ramri atanga kilometer 100 chhunga awm vek a nih avangin he Dan thar hi Mizoram tan a tha lo hle a ni, a ti a.

Minister Resolution hi member-te’n sawihoin, Chief Minister tiamin member 8-in an ngaihdan an sawi a. Member thenkhatin sorkar hmalakna chu a tlai lutuk thin nia an hriat thu sawi mah se thu sawitu zinga BJP Member Dr. BD Chakma tih chauh loh chuan resolution chu an thlawp thu an sawi vek a. Hemi hnu hian Speaker kaihhruaiin Official Resolution chu House-in a pawmpui leh pawmpui loh buk a ni a, pawmpui duh an tam zawk avangin House-in a pawmpui a ni.

- AIR