Agniveer sipai lak runpui Sept 5 & 6-ah

Aizawl | August 24, 2023: Army Recruiting Office, Aizawl buatsaihin Agniveer sipai lak runpui, recruitment rally thawh hnihna Phase-II chu Phase-I kaltlanga District hrang hrang atanga thlanchhuah (shortlisted candidates) te tan Rajiv Gandhi Stadium, Mualpui, Aizawlah September ni 5-6, 2023 chhung hian neih a ni dawn.

He hun inlan turte chu Rajiv Gandhi Stadium Mualpui, Aizawlah September ni 5, zing dar 3:00 ah Admit Card leh Document thil tel ngai rally notification-in a phut angte kenga in report tur a ni.

District hrang hrang atanga thlanchhuah (shortlisted candidates) ten he hunah hian physical measurement leh medical examination-te an hmachhawn dawn bakah 1.6 Km a thui tlan leh physical fitness test dangte hmanga endik an ni ang.

Indian Army chuan District hrang hrang atanga he huna tel tura thlanchhuah Admit Card la dawng lote chu Army Recruiting Office, Aizawl atanga ngaihven turin a chah a ni.

Agniveer sipai lak mek bakah lak leh tur chungchanga hriat duh neite tan official website www.joinindianarmy.in ah engtik lai pawha ngaihven reng theih a ni a. Result leh document pawimawh thil tel turte chiang taka tarlan thin a ni bawk.

Indian Army chuan kumin June thla atang khan Agniveer Sipai lak thawh hnihna hi ram chhung hmun hrang hrangah a kalpui tan tawh a ni.

- DIPR