Aizawl | July 22, 2023: MNYF chuan vawiin chawhnu khan Aizawl Press Club-ah chanchinbumite an kawm a, MNYF Vice Presudent Zodinpuia chuan, "Mizoram sawrkar leh tlawmngai pawl hrang hrangte’n kum 24 chhung teh meuh kan lo buaipui tawh, Tripura hmun a Tuikuk (Bru) awmte Mizoram electoral roll aṭanga paihfel an ni ta hi Mizo National Youth Front (MNYF) Headquarters’ chuan lawmawm kan ti hle," a ti.
MNYF Vice President Zodinpuia Press Statement kimchang.
Mizoram sawrkar leh tlawmngai pawl hrang hrangte’n kum 24 chhung teh meuh kan lo buaipui tawh, Tripura hmun a Tuikuk (Bru) awmte Mizoram electoral roll aṭanga paihfel an ni ta hi Mizo National Youth Front (MNYF) Headquarters’ chuan lawmawm kan ti hle a, Chief Minister Pu Zoramthanga leh NGO Co-ordination committee te thawhrimna leh tanrualna rah duhawm tak lo lang hi Mizoram tan mellung pawimawh leh hriatreng tur a ni tawh ang.
Kum 1997,October ni 21 khan Mizo tlangval pakhat misual kut tuara a boral avangin Mizoram a Tuikuk (Bru) lo khawsa tawhte chu Tripura state ah mi tamtak an haw thla a, Tripura state chhung a relief camp 6 ah an inbengbel a ni. Tripura hmuna chhuk thla Tuikuk (Bru) te avang hian Mizoram sorkar mai bakah, tlawmngai pawl hrang hrang leh Mizo mipuiten harsatna tamtak kan lo tawhphah tawh a. Kum 2014 phei kha chuan NGO Co-ordination committee hmalakna in MP (Lok Sabha) inthlan Mizoram pumpui ah boycott hial a lo ni tawh a ni. Kum 2018 December ni 15 a Chief Minister Pu Zoramthanga kaihhruai MNF sawrkar lakluh a nih atangin Tripura state a khawsa Tuikuk (Bru) te chungchang hi chinfel tumin nasa taka hmalak nghal a ni a. November ni 8, 2019 a Mizoram sorkar, Council of Minister meeting chuan, *“Kum 2019, November ni 30 thlenga Mizoram a rawn let duhlo Tuikuk (Bru) te Mizoram ah hruaikir an ni tawh lo ang”*, tih thu an lo pass hial tawh a ni. Kum 2020 January ni 16 khan Chief Minister Pu Zoramthanga hmalakna leh tlawmngai pawl hrang hrangte ṭanrualna avangin Tripura-a khawsa Tuikuk(Bru) te chu Union Home Minister Amit Shah kaihhruaina hnuai ah mi 30,000 chuang zet Tripura hmuna awm nghet turin New Delhi-ah inremna thuthlung ziahpui an ni a. Inremna thuthlung ziahna ah hian Mizoram Chief Minister Pu Zoramthanga bakah, khatih laia Tripura State Chief Minister Biplab Kumar Deb leh Bru pawl hrang hrang aiawhte chuan November ni 30, 2019 hnu lama Tripura Relief Camp-a Bru la awm mekte chu an duhthlanna in Tripura State-a an chen hlen an lo remti tawh bawk a ni.
He hmalakna kalzel ah hian Tripura State-a khawsa Tuikuk (Bru) Mizoram electoral roll-a hming chuang te paih tur hian Chief Minister Pu Zoramthanga kaihhruaina hnuaiah Mizoram sawrkar chuan chak takin hma a la a, vawiin ah chuan Mizoram electoral roll a awm thin Tuikuk(Bru) te Mamit District chhung atangin voter 9130, Kolasib District atangin voter 1979 leh Lunglei District atangin voter 888, a vai a belhkhawm a voters 11,997 zet te chu Mizoram Electoral roll atanga paihfel an lo ni ta a ni.
Kum 24 chhung teh meuh Mizoram in harsatna kan tawh chinfel a nih theihna tura Chief Minister Pu Zoramthanga leh a kaihhruai MNF sawrkar hmalakna te, Mizoram himna tura beidawnglo a theihtawp chhuah rengtu NGO co-ordination committee hmalakna zawng zawngte hi MNYF Headquarters chuan kan chhuang tak zet a ni.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: