Aizawl | July 21, 2023: Pachhunga University College chuan vawiin khan Freshers’ Social leh Felicitation programme an hmang a' Governor, Dr Hari Babu Kambhampati chu khuallian a ni a, Mizoram University Vice Chancellor Prof Dibakar Chandra Deka chu khualzahawm a ni.
Governor Dr Hari Babu Kambhampati chuan thuhmahruaiah NIRF Ranked 34th college Pachhunga University chu an hlawhtlinnaah lawmpuiin tunah chuan India Hmarchhaka College tha berah chhal theih an ni mek a ti. Zirlai lutthar te chu College tha takah an luh theih avanga lawmpuiin tum nei a, an thil tum tihlawhtling tura suangtuahna nung nei turin a fuih a. Zirlai chhuak tate leh hengho zinga chawimawina dawngtute chu lawmpui bawkin hmabak eng tak an nei thu te, Mizoram leh India tana tih theih an neih thu te a hrilh bawk a ni.
Governor chuan Mizo thalaite chu Saptawng thiamsa an nih avangin midang te aiin hlawhtlin theihna an nei tha hle nia a hriat thu a sawi a. Ram hmasawnna atan thil tul te ngaihtuah thiam tura fuihin Mizoramah hmasawnna lian tham tak tak thil pahnih – Railway line leh KMMTTP avangin a lo thleng thuai dawn tih a sawi a. Governor chuan Mizo thalaite chu heng hmasawnna ruhrelin a rawn ken tur kawng tam takah dinhmun pawimawh chelh tu, thawktu leh neitu ni tura lo inpuahchah lawk nachang hreturin a chah a ni.
Governor chuan New Education Policy (2020) in zirlaite hmasawnna atana skill development leh entrepreneurship uar tura zirna kalphung thar a siam chu hmang tangkai turin a chah a. MZU ah innovation Hub a awm thu te, hman tangkai a nih theih dan te, entrepreneur an nih theih dan tur chungchangte a sawi lang a. Entrepreneur ni tura zirlai te a chah rual hian Mizoramah central welfare scheme leh social security scheme hrang hranga mipuite zirtirna pe turin zirlaite chu a fuih bawk a ni.
Khualzahawm, Prof. Dibakar Chandra Deka, Vice Chancellor, MZU chuan PUC chu Mizoram University ta a ni a, kum tam tak result tha an nei thei chu lawmawm a tih thu a sawi a. India rama college 3000 chuang zingah a tha ber 34-na a nih phak thu sawiin tan la zual sauh sauh tur leh tun aia ranking tha zawka inhlak kai turin zirlaite, zirtirtute leh thawktute a fuih a ni.
Program tannaah PUC Principal, Prof. H. Lalthanzara chuan inlawmna thu a sawi a. PUC a lut tharte chu College an kal chhung a College in a pek theih thiamna te leh activity dang dangte hmang tangkai turin a chah a. Zirlai pass chhuak tate lawmpuina thu sawiin, an hmalam hun atan duhsakna sang ber a hlan bawk a ni.
He programme ah hian MZU undergraduate examination 2023 a Department tina top 10 ni pha te chu chawimawina certificate leh pawisa fai hlanna hun hman a ni a. Stream hrang hranga ti tha berte hnenah a hnuaia tarlan ang hian, “Proficiency Award” hlan a ni.
1. Lenrual Hlui Award (topper in science stream): Jeffrey Vanlaltlana, Department of Biotechnology
2. Khawtinkhuma Award (topper in Commerce stream): Lalrinzuali, Department of Commerce
3. HK Bawichhuaka Award (topper in Arts stream): Lalduhsaki, Department of History
4. A. Sawihlira Award (topper in Management stream): Esther Zonunsangi, Department of Management
5. Dr H. Lallungmuana Award (Institution topper): Jeffrey Vanlaltlana, Department of Biotechnology
Session liam taah Zirlai tithe ber – student of the year award chu C.Biakthansanga in Governor hnen atangin a dawng bawk a ni.
Kumin hian PUC atangin UG stream hrang hrangah mi 914 in final semester examination an hmachhawn a, chung zinga zirlai 822 chuan pass in, pass percentage hi 89.93 a ni. Department hrang hrangah rank holder (top 10 a lang thei) mi 152 an awm a. MZU hnuai a rank holder ni thei percentage hi 59.84 a ni bawk.
Department 16 atangin pakhatna ni thei (topper) mi 16, PUC hian a nei a. He hlawhlinna hi MZU hnuai a topper ni theiawm zat atanga chhutin 59.25% lai a ni bawk.
PUC-ah hian tun dinhmun ah UG course hrang hrang 23 leh PG course 5 zir theih a. Zirlai awm zawng zawng hi 3227 an ni a. Kuminah zirlai lutthar 935 awm tawhin, CUET hmanga lut te tan pawh admission la tih mek zel a ni bawk a ni.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: