Mizoram University (MZU) B.Com Gold Medalist Nunhlimi kan belchiang.
July 6, 2023-a MZU in UG result 2023 a tihchhuah a, CGPA 9.84 hmua Govt J Buana College atanga B.Com Gold Medalist 2023 ni thei Nunhlimi hi C Lalnunhlimi tih hming puin December 19, 1999 khan C Vanlalmuana leh Lalhmachhuani te inkarah a lo piang a. Unau pang zinga upa ber dawttu niin, an unau hi mipa 1 leh hmeichhia 4 an ni.
Nunhlimi te hi an chhungkuain Bazar Veng, Lunglei-ah an khawsa a, Mizoram Baptist Kohhran-ah an lawi a ni.
Nunhlimi'n Explore Mizoram zawhna a chhanna te:
📌 Zirna lam :
Pawl 10 hi 2016 khan Baptist Higher Secondary School, Serkawn atangin ka pass a, pawl 12 hi 2019 khan Oikos Higher Secondary School, Aizawl atangin ka pass leh a, tichuan, B.Com hi Govt. J Buana College, Lunglei atangin Pathian hruaina zarah kumin-ah ka zo ve a ni.
📌 I lehkha zir dan?
~ Lehkha hi zir dan bik ka nei chuang lo a, mahse sikul naupang ka nihlai atang tawha ka tih thin chu nitin kan topics cover apiang ka in ennawn leh thin. Zirtirtute zirtirna uluk taka ngaihthlak ka tum a, hriatthiam ngei ka tum thin. Ka hriatthiam pawhin ka haw veleh ka in ennawn leh a. Exam dawnah chuan zir chiam a ngai tawh thin lo. Ka thil zir reng reng hi Commerce subject ka lak chinah phei kha chuan a concept ka hriatthiam hma chu ka chhiar zau thin. Ka thiam ang ang te ka thiante hian min zawt ve thin a, chumi ka sawifiahna te pawh chu ka hmang tangkai hle in ka hre bawk.
📌 Harsatna I hmachhawn dan?
~ Mimal nuna harsatna ani emaw zirnaah emaw pawh nise, harsatna hrim hrim hi chu ka hmachhawn thiam bik miah lo a. Amaherawhchu, khawvelah chuan tuman kan tlanchhiat san theih tak tak loh avangin nunpui thiam ka inzir chho mek zel. Pathian chakna nen kan la hmachhawn chho zel ang ka ring.
📌 Gold medalist i nihna (Subject) leh CGPA?
~ Commerce subject. CGPA - 9.84
📌 Gold medalist ni tura i beih dan?
~ Chapona angah min lo ngaih sak lo la, college ka luh tirh khan degree ka neih huna ka thil tum ringawtin ka rilru a luah a, Gold Medalist nih tum em emin ka bei hranpa lo. Zir tur awm kha ka zir tawp a ni mai.
📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Keimah mimalin tum em em lo mah ila, kan faculties ten phu lo chungin keimahah rinna an nghat sang hle a. Keima'n ka tih theih pawh ka inring lo a, amaherawhchu kan department faculties-te mai ni lo, kan college a department faculties dangte zawng zawngin min fuih phur a. Kan department bik faculties phei chuan kan class pum hawh turin an mimal lehkhabu te an donate a, thiam loh kan neih an hlau em em a, an fate ang tak takin min umzui peih em em a. Kan college faculties anga taima leh entawntlak hi chu an vang ve hlein ka ring. A thiam leh thiam vak lo te min enkawl dan a inang vek a, a thiam lo te hi min duhsak mah mah zawk thin. Pathian zara kei leh ka thiante zanwg zawngina hlawhtlinna kan chanah hian faculties te min tawiawm/pui tha em em ka ti a ni.
📌 I zirna atana i chhungte pawimawhna:
~ Ka zirna kawnga duhthlanna ka siam reng reng hi ka chhungten min zahthiamsak em em a, “I tana tha ber chu Pathian leh nangmahin in hria” an ti thin a. Chumi chuan nasa takin keimah min inhriatchian tir a, keimahah inrintawkna ka neih phah fo thin. Chhungte ka nei hi ka tan chuan a hlu tawh hrim hrim a ni.
📌 I zirna atana i ṭhiante pawimawhna:
~ Thian tha tak tak Pathianin min pe a ni tih tun hunah hian ka hrechhuak leh mawlh mawlh thin. Ka thiante an pawimawhna chu dinhmun tha emaw dinhmun chhiaah pawh awm ila, thil engmah kan inkarah danglam a awm ngai meuh lo. Pathian zara tuna ka hlawhtlinnaah pawh tawngkam thlum tak taka inlawmpuina bakah hriat nuam lo deuh thlengin ka hma hun zel atan min fuih mawlh mawlh thin a ni.
📌 COVID 19 in i nun leh zirnaah nghawng a nei em? A neih chuan, nghawng a neih dan?
~ COVID 19 khan ka zirnaah nghawng chu a nei lian em em a ni. Gauhati University ah B.Com hi ka join phawt a, amaherawhchu, lockdown avangin kan lo haw a, online classes kan nei lawk si lo nen khan, University tharah ka join tha leh a. Tunah erawh chuan Pathian remruatna tha zawk a ni tih kan hmu thiam ve tawh a ni.
📌 Duhzawng leh ngainat zawng :
• Lehkhabu - Autobiographies/Biographies
• Rawng - Beige
• Chawhmeh - Mizo chawhmeh
• Incheina - Inchhunga thawmhnaw hak nuam deuh deuh
• Rimawi - Tingtang
• Mizo Ziaktu zingah - Mafaa Hauhnar
• Hla - Hla thu ril leh nalh
• Hla phuahtu - John Mayer, Michael David Rosenberg
• Teacher - Zirtirtu an thiam loh pawm ngam leh an hnaa theipatawp chhuah apiang
• Leader - Anmahni zuitute dinhmuna indah thiam
📌 Mize ngainat zawng:
~ Mi inngaitlawm, mahni dik lohna inenlet thin, chhungte dah pawimawh mi leh Pathian tihna nei mi.
📌 Mize ngainat loh zawng:
~ Mi chapo, mahni hmaa darthlalang dah duh miah lo te, midang harsatna hriatthiam pui ngai lo te
📌 Hobby- - Movie/Film en leh chhungte emaw thiante nena lenchhuah
📌 Relationship status - Single
📌 Kawppui atan duhzawng:
~ Mi nun tlawm, thil tih tum mumal nei, chhungkaw dah pawimawh mi leh Pathian tih mi.
📌Aim in Life: Pathian leh ka mihring puite rawngbawl turin RBI Officer nih ka tum.
Zawhna dang:::
1. A tel lova i awm theih loh: Ei leh in tur hrim hrim.
2. I nun kaihruaitu: Pathian thu leh ka tana mi hlu tak takte ina thu tha min hrilh thinte
3. Hringnuna i hlauh ber: Thil tum neih loh
4. I tih ngai miah loh tur: Hleilenna/Eirukna
5. Mizo Tualzal nuna ṭha i tih: Tlawmngaihna leh Aia upa zahna
6. Quote i duh ber:
~ “A Pathian chuan ani chu fel takin a thununin, a zirtir thin si a”
7. Mizoram leh Mizo tualzal nuna Mizo hmeichhiate dinhmun:
~ Mizo hmeichhiate dinhmun hi a tha ka ti thawkhat hle a. Mipa dinhmun ang neih tumna tam tak sap ram lamah chuan auhchhuahpui a ni a, mahse, Kristian rinnaa, “Hmeichhe lu chu Mipa, Mipa lu chu Krista” tih kha kan hriatchhuah nawn fo a tha ka ti.
8. Hnam hmingṭhat leh hmingchhiat kawngah Hmeichhiate'n mawhphurhna:
~ Hnam hmingthatna leh hmingchhiatna kawngah hian hmeichhiate chiahin mawh an phur ka ti lova, Mizo hman pumpui mawhphurhna a ni ka ti. Hmingthatna a awm rualin hmingchhiatna chu a awm tel zel a, mahse, hmingthatna tam zawk kan neih theih chu a pawihmawh ka ti khawp mai. Mizo hnam tinah, mipa emaw hmeichhiaah emaw pawh intodelhna leh rinawmna tih nun thar a tul ka ti.
9. Hnam ziarang chawinun kawnga Hmeichhiate mawhphurna:
~ He zawhna pawh hi a mipa leh hmeichhiaten mawh kan phur vek ka ti a, hmeichhe tan bik chuan ka sawi thiam chiah lo. Kan hnam ziarang tam tak YMA ina a chawinun zel hi a nasa zual zawkin thlawp ila, titi nana topic mai ni lovin a taka chantirtu nih theuh hi kan mawhphurhna a ni.
10. Mizote tan 'Fa neih tlem' inzirtir hi a ṭulin i hria em?
~ Fa neih tlem emaw tam emaw zirtir ai mah hian Family planning tha inzirtir ila. Eng vangin nge kan hnamin fa neih tam ka ngaih? Eng vangin nge nupa tuak thar tam takin neih tam kan hlauh? Heng zawhna leh a dang tam takte a thiam zawkten zirchiangin, nu leh pa la ni tur te nena sawihona te awm thei se, nghawng tha a neih zawk ka ring.
11. Mizo hnam ṭhanmawh bawk nia i hriat?
~ Hleilenna, Pathian a kawr a hman thinna nun leh Thatchhiatna.
12. Mizo hnam damna atana kawng awm nia i hriatte?
~ Thil dik tihtlat duhna, Pathian thu ina principles tha min zirtir te nunpuina leh taimakna.
13. Hnam chhan nana Hmeichhiate ṭangkaina leh mawhphurna?
~ Hmeichhiate chu Pathianin min siam dan angin Mipate hi kan lu tur a ni tih hre nawn ila, fate enkawl puitlingtu tha tak ni thei turin Pathian tanpuina dil zel bawk ila. Ka sawi tel loh tam tak pawh a awm ka ring a, kei aia kum tam leh fing zawk ten an sawi thiam ka ring.
14. Zirna, Khawtlang leh Kohhran hi?
~ Zir pahin Khawtlang leh Kohhrana kan mawhphurhna te hi a hlen theih ka ti a. Exam hunlai angah erawh chuan mahni pawn a inkhuahkhirh theih lutuk a. Keimahni inhriatchian a pawimawh ka ti.
15. Khawtlang, Kohhran leh nangmah:
~ Khawtlang leh Kohhran hian kawng tam takin ka nunah chuan nghawng tha a nei nasa em em a, puitlinna te leh midang kara awm dan te min zirtir a. Mihringte hi in mamawh tawn vek kan ni tih mi hriatnawntir fo thin.
16. Social Media leh Nangmah:
~ Social media hi ka khawih ve vek a, tunlai thil thleng hriatnan chuan tha tak a ni. A tha zawnga hman tur chuan thil tha leh tangkai tak a ni ka ti a, a tangkai ang bawkin hman sual a awl ka ti em em thung. Mahni inthununna neih dan min zirtir thin. Thil sawi duh leh au chhuahpui duh apiang sawi chhuah loh te ka inzir phah nasa hle.
17. Mizoram ṭhalai tam tak tlakchham:
~ Mahni hnaa rinawmna, taimakna leh ram leh hnam hmangaihna.
18. Mizo ṭhalaite hian ngaihsan tur dik an ngaisangin i hria em?
~ Kan ngaihsan zawng ten nasa taka kan nun an hruai thin avangin tuna social media kan hman sual thin dan ka en hi chuan ngaihsan tur dik kan ngaisang lo thinin ka hria. Amaherawhchu, mi zawng zawng tan engmah hi ka sawi thei lo a, mitin tan a dan vek ka ring.
19. Ngaihsan tur dik nia i hriat:
~ Nunkawng tha zawka min hruaitu. Values leh Principles tha min neih tir thei tu.
20. Hlawhtlinna tura pawimawh:
~ Pathian tihna, taimakna leh beih fan fanna.
21. hloh i hlauh ber:
~ Lehkha zir nuam ka tihna
22. Hnam dang nupui pasal neih hi:
~ Mahni hnam ngei nupui pasal neih chu a tha ber ka tih rualin, hnam dang lo nei ta te sawichhiat chhunzawm vak vakna hi chu tuman dikna kan nei lo ka ti.
23. Nupui pasal inneih hmaa mipat hmeichhiatna hman hi?
~ Nupui pasal inneih hma hian Pathian hruainain mipat hmeichhiatna hman loh ka tum a, mahse mi zawng zawng ti ve vek turin ka phut thei lo. Chumai bakah a lo hmang tawhte chungchangah thisen a chhungte lo chuan in sawi chhunzawm sak thin lo ila ka ti.
24. Hlawhtlinna hi?
~ Hlawhtlinna hi damchhunga awm tur a ni lo a, hlawhtlin ni leh hlawhchham ni a awm zel dawn a. Kan hlawhtlin ni te hian Pathian thatna leh rinawmna min hriatchhuah tir sela, chutiang bawkin hlawhchham ni te pawhin Pathian khawngaihna leh zahngaihna min hriatchhuah tir fo se. Mihring nun chu sik leh sa inthlak reng angin a inthlak reng dawn a, tlang sanga kan awm chuan a ruamah pawh kan la awm leh thei tih hre reng ila a tha ka ti.
EXPLOREMIZORAM.COM i hmuh dan:
~ EXPLOREMIZORAM.COM hi hemi interview hma hi chuan ka lo la hre ngai bik miah lo a. Kan han en chian hian Mizo thalaite tana chanchin pawimawh hriatna tha tak ani ka ti a, a hmang tangkai duhte tan a hlut hle ka ring. Website bengvarthlak tak a ni ka ti.
Ka lawm e.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: