Aizawl | July 9, 2023: Manipur State a buaina avanga tuarna nasa tak thleng mekah Mizoram Baptist Kohhran chuan thuchhuah a siam a, Sakhaw hmun serh intihbawrhbansakna thleng chu an dem thu an tarlang.
He thuchhuah hi Tualchhung kohhran tinah tukin inkhawmah khan Kohhran Secretary te'n an chhiar chhuak a ni.
Baptist Church of Mizoram chuan Headquarters thuchhuak angin tukin inkhawm-ah vek khan tualchhung kohhran-ah Manipur buaina a reh theih nan ṭawngṭai rualna neih a ni bawk.
Mizoram Baptist Kohhran-in Manipur State buaina chungchanga a thuchhuah hi July 9, 2023 (Pathianni) zing inkhawmah chhiar chhuah a ni a.
Mizoram Kohhran Hruaitu Committee (MKHC) leh North East India Christian Council (NEICC) pawhin Kohhrante a ngen angin July 9 Pathianni zing Inkhawmah manipur ram tana tawngtai rualna Tualchhung Kohhran tinah neih a ni bawk.
BCM thuchhuahin a tarlante:
• Manipur State a rawng taka inthahna thleng mek leh, chenna in leh lo intihchhiat saka, in hal sak te, nu nau pawisawi lote sawisak a, thlabara insiam hi Pathian thu nen a inrem loh avangin hetiang ti tute hi Mizoram Baptist Kohhran chuan a dem tak zet a ni.
• Sakhaw hmun serh intihbawrhbansak leh inhalsak te hi India ram Secular State a thil thleng atana thil tihawm loh anih bakah India Danpui kalh tlat a ni a, hetianga Sakhaw hmun serh intihbawrhbansak hi Mizoram Baptist Kohhran chuan a dem tak zet a ni.
• Nunna chan ta chhungte, in leh lo chan ta te leh sahimna atana raltlan zawng zawngte Mizoram Baptist Kohhran chuan a khawngaihin a tuarpui em em a, Pathian thlamuanna leh awmpuina an chungah thleng se a duh a; Mizoram Baptist Kohhran hian a tanpui theih ang angin a lo tanpui ve tawh a, tanpui zel pawh kan tih turah kan ngai.
• Manipur State-ah hian rorelna dik, Pathian duh zawng anga rorelna thleng se tih hi Mizoram Baptist Kohhran duh dan a ni.
Ṭawngtai rualna thupui:
• Manipur State a chi leh chi inkara buaina chhuak a lo reh theihna turin.
• Buaina avanga nunna chan chhungte tan leh in leh lo chan ta zawng zawngte tan.
• Sakhaw hmun thianghlimte zah lo tak leh pawisa lo taka tih chhiat leh tih bawrhban a ni a, hetiang thil hi a thlen nawn zel tawh loh nan.
• India ram leh Manipur State a roreltuten rorelna dik an ken kawh theih nan.
• India Sawrkarin Uniform Civil Code (UCC) hmang turin hma a la mek a. He dan hi hnam inpumkhatna ti chhe thei, hnam tlem zawk leh sakhaw tlem zawkte nek chepna leh inchim ralna a nih dawn avangin tih puitlin a nih lohna turin (Hei hi MKHC atanga ngenna a ni).
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: