Leiminin kawng dang ping; lirthei tlan dan tur ruahmanna siam

Aizawl | July 4, 2023: Aizawl atanga Lengpui Airport panna kawng, Hunthar veng, Vaivakawn thlanmual bulah ni 4.7.2023 zing lam khan lei a tlak leh avangin lirthei eng chi mah a kal tlang theih lova. Airport emaw Sairang lam kal tumte pawhin hel a ngai a ni.

Kawnga leivung tla hi paih fai hna thawh mek a ni a, hna thawhzawh a nih hma chuan a hnuaia mi ang hian lirthei tlandan tur ruahmanna siam a ni.

(A) Aizawl to Sairang; National Highway 54-a 407 Truck leh HMV te tlan dan tur leh awmdan tur:

i) Sairang lam pan tur reng reng chu World Bank Road, Falkland-ah an lo awm rih ang.

ii) Sairang lam atanga 407 Truck leh HMV lirthei lo chho te chu Ch. Saprawnga Truck Terminal-ah an lo in park ang.

iii) Kawng hi kal tlang theiha siam a nih ve leh Aizawl lama motor lian (HMV) tangkhangte kal hmasaktir an ni ang.

(B) Aizawl to Sakawrtuichhun kawnga LMV lirthei te tlandan tur:

Aizawl atanga Sairang lam kal tur leh Sairang atanga Aizawl lam pan tur te chu Sakawrtuichhun kawngah kalin, Lungverh ah an chhuak thla ang. Chutiang bawkin Sairang lam atanga lo chho te pawh Lungverh kal tlangin Sakawrtuichhun lamah an lo kal thei ang.

(C) RK Road lirthei tlan dan tur leh No Entry:

i) Zohnuai peng atanga Ropaiabawk kawngah lirthei eng chi mah kal phal a ni lo.

ii) Ropaiabawk atangin Zohnuai kaltlangin Vaivakawn a kal tlang theih loh.

iii) Two Wheeler Rangvamual lam atanga lo kalte chu RK Road-ah chhoin Ropaiabawk lamah an kal thei ang. Tin, Ropaiabawk atangin chhuk zawngin RK Road-ah bawk an kal thei ang.

(D) Vaivakawn to Mizoram University (MZU): Vaivakawn leh Chhangurkawn inkara lei khi a awm avangin Bus/HMV te Vaivakawn atanga MZU via FCI Godown leh Sakawrtuichhun City Bus Service-te chu inzui duah duah lovin; a inhlat thei ang bera tlan tur a ni.

Kawng hi Nizan leh tukinah a min khat leh tlat mai. Lirthei eng chi mah a kal thei rih lo. Airport kal tur tan hêl a ngai.