MZP Ngopa-in zirlai tiṭha chawimawi; Harsatnate hi chhuanlam atana hmang lova, chumi tawn tlangtute chu an hlawhtling ṭhin

Aizawl | June 1, 2023: Mizo Zirlai Pawl (MZP) Sub - Headquarters, Ngopa chuan vawiin June 1, 2023 chawhnu dar 1 khan Ngopa Jubilee Hall-ah Zirlai tiṭha chawimawina hun an buatsaih a, Lengteng Bialtu MLA Dr L Thangmawia'n khuallian niin a hmanpui.

Khuallian Lengteng Bialtu MLA, Human Resources Development Board Vice chairman ni bawk Dr L Thangmawia chuan thu sawiin, "zirna pawimawh thu sawiin, mi pangngaia min siamtu a ni," a ti a. "Pawl 10 distinction a pass hi Smart phone, pawl 12 distinction-a pass te Laptop kan pe leh dawn," a ti bawk.

Dr L Thangmawia chuan, "Zirna lamah hian department dang thik khawpin hma ka la mek," a ti a. "Lehkha thiam tur hian hmelṭhat, hausak leh neihnun a ngai lo, taima taka theihtawp chhuaha tumruhna nena zira beitute chu an hlawhtling ṭhin," tiin a sawi a. "Harsatna hrang hrangte hi chhuanlam atana hmang lova, chumi tawn tlangtute chu an hlawhtling ṭhin," tiin zirlaite chu harsatna hrang hrang tawn tlang a, tuar chhuak turin a chah bawk.

Uaptu MZP General Secretary Pu Jacob Lalmuanpuia chuan thu sawiin, zirlai chawimawite chu tumruhna nena hlawhtling ngei tura theihtawp chhuah zel turin a chah a. Zirlai kalkhawmte chu an nunah tha thlah lova bei sauh sauh tura chahin, MZP chuan zirlaite-ah chona thar a tuh beiseiin zirlai tiṭha a chawimawi ṭhin thu a sawi bawk.

MZP General Secretary chuan, Zirlai kalkhawmte chu an hlawhtlinna atan nu leh pate thu awih a, zir thiamna ngaipawimawh a, Social media hmang thiam tur leh ram leh hnam leh khawtlang tana mi ṭangkai ni thei tura an rilru seng turin a chah a.

Pu Jacob Lalmuanpuia chuan, "Eng buaina pawh hi a chinfelna chu dawhkanah tho a ni tih hria a, kan hnamin a mamawh em em Central Service leh All India Service te hi in ni thei tih hriaa theihtawp chhuaha zir turin ka duh che u," a ti bawk.

Zirlai tiṭha chawimawi-ah hian pawl 10 leh 12 pass thar, distinction leh 1st division chin an chawimawi a, distinction a pass hi zirlai pakua niin, 1st division-a pass hi 25 an ni a, chawimawina hlante hi an vaiin mi 34 an ni.

Vawiin MZP Sub - Headquarters, Ngopa zirlai tiṭha chawimawi hi MZP Sub - Headquarters, Ngopa President Pu R Lalduhawma'n a kaihruai a ni.

He hunah hian Ngopa HSS, K Lalthlamuana Memorial HS, Govt Ngopa HS, Eklavya Model Residential School zirlaite an tel a ni.