Aizawl | June 5, 2023: Mizoram Sorkar chuan Manipur atanga an sahimna zawnga lo lutte lo dawngsawng a, enkawl zui tur committee pahnih Home Minister Pu Lalchamliana leh Home Secretary Pu H Lalengmawia kaihhruai committee a din.
Home Minister kaihhruai “High-Level Committee on Internationally Displaced Persons of Manipur in Mizoram” chu hi vawiin khan Directorate of Forensic science Laboratory Conference Hall, MINECO-ah an thukhawm nghal a.
Pu Lalchamliana chuan Myanmar leh Bangladesh atangin tun dinhmunah raltlan 50000 chuang state chhungah an awm mek a ti a, COVID vanga harsatna in ziaawm lam a pan mek laiin Manipur unauten harsatna namen lo an hmachhawn leh a, hnuchhawn a thiang lova, sawrkar sum dinhmun leh hmanraw neih te pawhin tuar deuh dawn mahse unaute an nih bakah COVID hripui len lai pawha mizo tlawmngaihna nen hmangaih taka tanpui a thlamuantu te an nih vangin theihtawp chhuahin lo buaipui zel an ni ang a ti.
Vawiin meetingah hian member te an kal tha hle a, Sawrkar department hrang hrang ten hma an lo lak tawh dan te an report a, Central YMA, MKHC leh MJA aiawh te pawhin hma an lo lak tawh dan te tarlang bawkin hmalak chhunzawm zel dan tur rawtna tha tak tak sawiho a ni.
Vawiin meeting hian resolution siamin “Manipur atanga raltlan te hian ei leh bar leh tawmhulna ah harsatna an neih lohna turin theihtawpa tanpui zel nise” an ti a. Raltlan rawn lut te chhinchhhiahna mumal leh felfai taka siam turin data tha neih ngai an ti a. ICT Department lamin Management Information System (MIS) lo buatsaih se tih a ni a. Chhungkhat laina belh tur nei lote awmna tur sawrkar hmunhma hman mek bakah hmun dang ngaihtuah belh nise tih a ni a, Manipur buaina hian eng chen nge a awh dawn tih hriat a nih loh avangin sawrkar hmunhma bakah hmun remchang dang te pawh lo thlithlai lawk nise an ti a ni.
Hei bakah hian Raltlan zingah sikul naupang te chu zirna in hrang hrangah document phut lova admit turin School Education department lamin thuchhuah an lo siam tawh a, hetiang deuh hian College zirlai te zir chhunzawm dan tur ruahman a tul thu sawi a ni a, raltlan te hriselna endik a uluk taka vil zui a that thu sawi ni bawkin Executive Committee Committee on Internationally Displaced Persons of Manipur in Mizoram ten chak takin hma an la chhunzawm dawn a ni.
Vawiin committee thukhawm hian Chief Minister Pu Zoramthanga’n Manipur atanga raltlan te chhawmdawlna tura Prime Minister Narendra Modihnena sum a dil chu rang taka bawhzui tur in tirh tha an ti a, raltlante chhawmdawlna kawngah tlawmngai pawl te, kohhran te leh mitin te inphalzau turin an ngen bawk a ni.
- AIR Aizawl
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: