Aizawl | June 5, 2023: Aizawl Mayor Pu Lalrinenga Sailo kaihhruai AMC Board of Councillors Meeting ni hnih (2) awh chu AMC Meeting Hall-ah vawiin khan neih chhunzawm a ni.
A ni khatna zirtawpni kaltaa Pu Lalringliana, Executive Corporator, Cash & Accounts changtuin Budget a pharh chu uluk taka Corporators ten sawihona an neih hnuah lungrual taka pawm a ni.
Vawiina pawm tak AMC Budget Estimate 2023-2024 hi a pumpuiin Cheng Vaibelchhe 114.79 a ni a. Central atanga 15th Finance Commission hnuaia dawn beisei zat hi Cheng Vaibelchhe 65.64 niin, State Sorkar atangin Cheng Vaibelchhe 21.42 beisei a ni a, a dang zawng hi AMC sum thawhchhuah tur leh kum hmasa lama sum hman bang te a ni.
AMC Budget Estimate 2023-2024 hi Mizoram Municipalities Act, 2007 -in a phut ang chuan March ni 10 ral hmaa pharh tura tih a ni a; amaherawhchu, Lunglei Municipal Council LMC inthlan avang leh chumiin a nghawng Urban Local Body Grant then dan tur te siam fel a ngaih avangin Budget hi pharh tlai a ni.
Finance Commission 15-na hnuaiah kum 2023-2024 ULB Grants bik atana AMC chan tur hi cheng vaibelchhe 30.65 niin kum hmasa (2022-23) Budget-a lo dah tawh, la dawn loh cheng vaibelchhe 35 chu dah nawn leh a ni bawk.
AMC hi PFMS System a tluan tlinga hmang thei hmasa berte zinga mi a ni a, 15th FC Grant 2022-23 1st Installment pawh North Eastern State zingah chuan claim thei hmasa ber a ni.
Budget a dah zingah hian AMC hmalakna hrang hrang: Bawlhhlawh sawngbawlna tur te, AMC assets siamna tur te, Ward tihchangtlunna tur te, Street Light enkawlna te, Local Council inrelbawlna tur te, Aizawl mipui-in Tui in tur thianghlim hnianghnar taka an neih theih nan Rain Water Harvesting programme kalpuina tur leh tul dang pawimawh hrang hrang te a tel a ni.
AMC chuan kum hmasa 2022-2023 chhungin State Sorkar atanga sum a dawn tur kim takin a dawng tih tarlan a ni a, Sorkar chungah pawh lawmthu an sawi tih tarlan a ni.
- AIR Aizawl
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: