Faina Kawngzawh-a kal Elzeta Varte in a tum ram thlen nan KM 620 chuang kein kal!

Aizawl | June 24, 2023: Mizoram Hmar tawp leh Chhim tawp tan tlanga kea kal-a Cleanliness Trekking nei Elzeta Varte chuan June 22, 2023 chawhnu dar 1:50 khan a tum ram Khaikhy a thleng.

Ruahman dan chuan, Km 630 vel Cleanliness trekking neih tumin Lailapur,, Vairengte thlang aṭangin May 26 khan a zinkawng atan a, Mizoram chhim tawp Khaikhy thlen tum a ni. Khaikhy, Siaha District a thlen hian KM 630 chu a lo tling chiah lova, KM 623 chiah a kal ta a ni.

Kalkawngah bawlhhlawh a bikin ṭawih thei lo a chhar zel a, a paihna hmun turah a paih zel a. Khaw kar kawng-ah plastic bur thahnem tak a chhar khawm thin a. A paihna hmun tur a thlen hunah a paih zel a. Khaw kar kawng thenkhat tawite-ah pawh bawlhhlawh hi a chhar hnem thei hle a ni.

Sawi tawh angin, Vanlallawmzuala hian May 26, 2023 chawhnu dar 2:20 vel atang khan Lailapur atangin kein a kal tan a, Khaikhy thlenna atan hian ni 18 leh dar 13:50 (a chawlh chhung tel lo) a hmang. Kea a kal zawng zawng zat chu KM. 623 a ni. Kalkawngah hian plastic bottle 6,500 vel a chhar khawm.

Mizoram Cyclist hriat hlawh, Elzeta Varte tia hriat hlawh Vanlallawmzuala Varte, hi VL Chhuanawma leh Rebecca Lalrinmawii fa 4 zinga a upa ber dawt tu ni in alo piang.

Elzeta Varte te unau hi mipa 3 leh hmeichhia 1 niin tunah hian Mission Vengah an cheng mek a ni.

Elzeta Varte hi tuna a thil tih mai bakah hian, Kum 2021 December thla khan Vairengte aṭanga India, Burma leh Bangladesh inrina hmun Parva khua thleng Cycle hmangin a lo inkhalh thleng tawh a. December 3, 2021 khan Vairengte atanga chhuakin, December 13-ah Parva a thleng a ni.

Hemi bakah hian, Serlui A lui a hnar atangin a lo zawh chhuak tawh a, Chite lui pawh a hnar atangin a lo zawh chhuak tawh a, heng a kalna te hi Youtube-ah a video hmuh mai theihin a awm a ni.

Elzeta Varte chanchin kimchang chhiar duh tan:

https://www.exploremizoram.com/2021/12/elzeta-varte.html