Aizawl | May 19, 2023: Serchhip SP Pu Vanlalnghenga’n Aizawl Mission Vengthlang-a Lalsangzuala thattu ni a puh an man, Lawrence Laldinthara chu a inpuang tawh a ti a, tunah mai chuan midang inhnamhnawihna awm hnuhma awma an hriat loh thu a sawi.
Lawrence Laldinthara (42), Khawruhlian nia inchhal chu May 17 khan Police ten Aizawl-ah an man.
Nimin khan Serchhip-ah thuthar thehdarhtute hmaah hnuchhuina lama an thlen chin hi Serchhip SP chuan a puang a, tualthattua puh kum 42-mi Lawrence Laldinthara chu central Jail ah dah rih a ni a ti a, , inhnial buai avanga che thut nia an hriat thu leh pawisa pawh ₹ 4000 vel laa an hriat thu a sawi a ni.
Lawrence Laldinthara chungchang hi court-ah ngaihtuah tur ni mahse, amah man tur hian finfiahna tha tawk tak an nei tih sawiin, Laldinthara hian thubuai chi hrang hrang, ruk ruk, mi bum leh mi rawk te a nei ṭeuh a, a bikin chu'ng te chu Aizawl District-ah a ni a. Serchhip leh a chheh velah hian tun hnaiahinlarin a phone ru pawh man chhuah a ni a, phone neitu ten phone an hmuh let leh avangin Jail a tantir a ni ta lo a, Serchhip Dist jail bikah chuan a la tâng lo a ni an ti a.
Serchhip SP chuan Pu Lalsangzuala Mission Vengthlang chunga thil thleng kha zing lam dar 2:00- 5:00am vel nia an ngaih thu leh, hemi hun lai vel hian thil thlenna hmuna motor ding bula mi pahnih ṭhu hmutu an awm thu te, Chhiahtlang Hmar veng National highway a Sawhthing hralh ten zing taka mi kal an hmuh thu te, a hnuah Maxi-cab Serchhip to Aizawl service, Lamchhip thlen hma atanga mi rinhlelhawm an phurh thu an dawng a, chu chu umzuiin nimin chawhnu khan Aizawl police te nen ṭangkawpin TNT ah an va man a, tlai lam dar 5:00 velah Central Jail-ah an dah luh a ni a ti.
Serchhip SP hi Special Investigation Team Leader Pu Kaste Romalsawma leh Addl SP Pu Saidingliana ten an ṭawiawm a. Serchhip Police te chuan he hnuchhuina kawngah mipui, khawtlang leh tlawmngai pawl hruaitu thawhpuina ṭha tak an dawn avanga an lawmthu uar takin an sawi.
Zawh belhna hrang hrang chhangin - he hunah hian Police te chuan thil thlenna hmuna thil lo awm dan vawnhim ṭhat hi hnu chhui tiawlsamtu leh misual man chhuah tiawlsamtu a ni tih hriat reng a ṭul thu an sawi a. Tualthattu a puh chu Aizawl lamah tang mah se a ṭul dan ang zelin thu zawhfiah zui zel a ni dawn a, a phu tawk hremna a hmu ngei ang an ti.
Nimin khan Lalsangzuala chenna veng, Mission Vengthlang YMA buatsaihin tualthattu demna, sit-in demonstration chu Mission Vengthlang kawnah neih a ni bawk a, he hunah hian mipuiten tualthah an duh loh thu leh tualthattu chu a na thei ang ber hrem an duh thu te, police te an thlawp zel dawn thu te, dik taka rorel an duh thu te, an tanrual zel dawn thu tein an aurual a.
He hunah hian YMA President bakah, Local Council Chairman, MUP President leh MHIP President te bakah Lalsangzuala chhungten thu an sawi a. Mission Vengthlang YMA te hian resolution an siam bawk a ni.
Source: AIR Aizawl
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: