Aizawl | May 19, 2023: Central YMA hruaitute chuan nimin khan Bilkhawthlir North leh South VC huam chhunga Manipur atanga sahimna zawnga rawn lut raltlante dahkhawmna Relief Camp an tlawh a, thilpek thahnem tak an hlan.
Central YMA aiawha kal te hi Pu Lalsawmliana, Asst. Secretary leh CEC member 2 an ni a. Bilkhawthlir South Relief Camp-ah hian VCP leh member te bakah Jt.YMA hruaituten an lo dawngsawng a, raltlante tan Rs 10,000 an hlan.
CYMA Asst. Secretary Pu Lalsawmliana chuan Central YMA chuan raltlan zawng zawng an tlawh theih rihloh thu leh relief camp a awm te tlawhchhuah an tum chu inthen darhin tlawh zel an tum thu a sawi a. Unau harsatna tawkte an tuarpui thu sawiin, khawtlang tana hnawksaka awmlo tur leh khawtlang tan mi tangkai ni tura a beisei thu a sawi a, harsatna an nei a nih chuan theihtawp an chhuah zel tur thu a sawi a ni. Central YMA hruaitute hian raltlante tan buhfai bag 100 leina tur Kolasib Sub-Hqrs YMA kutah an dah thu a sawi a. Kharzawla Relief camp tan pawisa fai Rs.15,000 an pe nghal bawk a ni.
Kharzawl Branch YMA hruaitute hnen atangin Relief Camp dinhmun ngaihthlak a ni a, Bilkhawthlirah raltlan hi tun thla ni 9 atangin an rawn thleng tan a, tun dinhmunah Kharzawl Relief camp ah hian chhungkaw 12, member 44 an awm mek a, Relief camp a awmlo chhungte bel chhungkua 13 member 68 an awm bawk a. Bilkhawthlir South Relief camp lamah 37 an awm mek a, chhungte bela awm mi 18 an awm mek bawk a ni.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: