NGO hruaitute'n Manipur avanga Zofate tawrhna chungchungah sawrkar laipui dawr

Aizawl | May 16, 2023: Mizorama Non Government Organisation (NGO) pawl liante inzawmkhawmna NGO Coordination Committee hruaitute chuan Manipur buaina avanga Zofate tawrhna chungchangah sawrkar laipui an dawr a, nimin May Ni 15, 2023 (Thawhṭanni) Tlai dar 3:00 khan Union Home Minister Amit Shah chu a office, Delhi-ah an hmu.

Central Sorkar dawra NGO Co-Ordination Committee, Mizoram aiawha Delhi-a kalte hi CYMA aiawhin Vice President Lalhmachhuana leh Fin. Secretary Roneihthanga, MUP Vice President Lalbiakmawia Khiangte, MHIP President Ngurmawii Sailo, MZP Gen. Secretary Jacob Lalmuanpuia leh MSU Vice President Laldinsanga te an ni.

NGO Co-ordination Committee hian Manipur buaina chungchangah Union Home Minister Amit Shah chu Ministry of Home Affairs, Office 104 North Block-ah an hmu a, Manipur-a buaina a reh thuai theihna atana hma la tur leh Manipur buaina tuartute chhawmdawl hna chak taka thawk turin an ngen a. Zohnahthlak unauten an tawrh nasat zia leh mahni inlum pawh luah ngam lova Mizoram leh hmun hrang hranga an raltlan thu leh Mizote thinlung natzia an thlen a ni. Tin, he buaina avanga zirna bahlah zawng zawng a bik takin Mizoram aṭanga Manipura lehkhazir ten tha tak leh boruak muanawm tak hnuaiah an zirlai an chhunzawm thuai theih nan rang taka hmalak a ngaih thu an thlen a, hei bakah hian he buaina a reh theih nan Manipur chhunga hnam hrang hrangte'n an pawm tlan theih tur inremna siam vat turin an ngen a, he buaina hian North East hmun hrang hrangah hlet thalo a hrin chhuah belh loh nan ngaihtuahna seng tur leh boruak thlir reng turin an ngen bawk.

Union Home Minister Amit shah chuan Manipur buaina hi a mawhphurhna a nih thu leh an enzui reng thu sawiin, tun atanga ni reiloteah boruak muanawm a thlen leh vat beisei anih thu NGO Co-ordination Committee hruaitute a hrilh a, ei leh in mamawh te pawh a luh mek zel thu a sawi bawk.

Amit Shah hi Union Home Secretary, Joint Secretary (NE) leh Director, IB te'n an tawiawm a. NGO Co-ordination Committee, Mizoram hruaitute chuan Union Home Minister Amit Shah hnenah hian memorandum an thehlut nghal a ni.

Mizoram NGO hruaitute hian Union Home Minister Amit Shah bakah Union Law Minister Kiren Rijiju chu a chenna in 9-Krishna Menon Marg-ah an hmu bawk a, Manipur buaina irh chhuahna chhan nia lang Manipur High Court Order leh Supreme Court inrawlh dan chungchang an sawipui a, Kiren Rijiju chuan Special Status chungchang hi High Court thuneihna anih loh thu sawiin, North East MP Forum te'n boruak muanawm a thlen leh vat theih nana theihtawp an lo chhuah thu NGO Co-Ordination Committee hruaitute a hrilh, niin NGO CC thuchhuah chuan a tarlang.

Hemi ni vek tlai lam dar 5:30 hian Indian National Congress hruaitu Rahul Gandhi chu a chenna in 10 Janpat-ah hmuh a ni leh a, Manipur buaina chungchang sawipuiin ama level-ah a theih ang anga he buaina a reh theih nana hma la tur leh en zui reng turin an ngen. Rahul Gandhi chuan Manipur buaina chu a lo hriat tawh thu leh a tul anga a lo en zui ve reng tur thu a sawi. NGO Co-ordination Committee hruaitute chuan Rahul Gandhi hnenah hian memorandum an thehlut bawk a ni.

NGO Co-ordination Committee aiawha kal te hi Ni 11 May, 2023 khan Delhi thleng thlain, vawiin khan Mizoram an lo let leh a. NGO Co-Ordination Committee aiawha kalte senso leh Delhi cham chhunga an chet velna senso zawng zawng Mizoram sawrkar in a tum a, Mizoram sawrkar chungah an lawm hle.

Central sawrkar hotute dawr tura theihtawp chhuaha hma la tu Mizoram MP te pahnih bakah, Mizoram party hruaitu hrang hrangte leh mimal thahnemngai eng emaw zatin kawng hrang hranga an lo tanpuina avangin lawmthu an sawi tak meuh a ni.

Central sawrkar dawr tura Delhi cham chhung hian Meghalaya Chief Minister Conrad Sangma, Nangaland MP bakah, mi pawimawh hrang hrang te an hmu bawk a. Tin, Delhi a pawl hrang hrang aiawh te'n NGO Co-ordination Committee hruaitute hi an thlenna Mizoram House-ah an lo hmu bawk a ni.