NEICCYA Conference vawi 19-na Durtlang-a neih mek zaninah tiak dawn

Aizawl | May 21, 2023: North East India Christian Council Youth Assembly (NEICCYA) Biennial Conference 19na chu May 19 zan khan Presbyterian Church, Durtlang Biak In-ah tan a ni a, zanin hian a tiak ang.

Zanin hian, NEICC General Secretary Rev. Dr. Ramengliana chuan NEICCYA hruaitu tharte lakluh leh hlanna hun a hmang ang.

North East India Christian Council Youth Assembly (NEICCYA) Biennial Conference vawi 19-na hi Presbyterian Church of India Mizoram Synod hnuaia thalai pawl - Central Kristian Thalai Pawl (CKTP) in a thleng a, Presbyterian Kohhran, Durtlang-ah nghah a ni.

North East India Christian Council Youth Assembly (NEICCYA) Biennial Conference hawn zan hian NEICC President Rev R Lalnunzira chuan, NEICC chuan NE State thenkhata tharum thawhna thleng chu a dem tak zet thu a sawi.

He hunah hian, Zaipawl hrang hrang - Mizoram Synod Choir, Aizawl Area Baptist Choir (BCM), Central South Division Songsters – SAY, Garo Baptist Convention (GBC) Choir, Mission Vengthlang Presbyterian Church Choir, KJP Synod Sepngi Choir, Territorial Staff Songsters (TSS) – SAY, Evangelical Church of Maraland (ECM) Choir, KJP Synod Mihngi Choir, Lairam Isua Krista Baptist Kohhran (LIKBK) Choir, Church of God (Meghalaya & Assam) Choir, Aizawl EFCI Choir, Ramhlun Venglai, Durtlang Presbyterian Church Choir (Host Church) leh EFCI Aizawl Presbytery Choir te an zai bakah, Aizawl Bethel Corps Band, Bethlehem Corps Band, Territorial Staff Band (TSB), Chanmari West Corps Band te an perform bawk a ni.

Nizan khan Cultural & Music Programme hman a ni a, North East state hrang hrang atanga palai kalkhawm te'n mahni hnam ziarang pholang thei thil an entir a ni.

NEICC hi North State pariat - Arunachal Pradesh, Assam, manipur, Meghalaya, Mizoram, Nagaland, Sikkim leh Tripura state-a kohhran hrang hrang inzawmkhawmna a ni a, NEICCYA hi NEICC hnuaia thalai pawl a ni.