Aizawl | May 22, 2023: Manipur state chhunga Zohnahthlakte chen tamna Churachandpur District chhung, Pangjol khuaa Children Home-a naupang awmte chu an rama buaina chhuak avangin hlau hlawpin Mizoramah an tlan lut a, home naupang te hi Berawtlanga Art and Culture building-ah dah an ni a, sorkarin an ei leh in tur ngaihtuahsak mah se chhawmdawl leh puih an ngai hle.
Roslyn Kimbuang-i din leh a enkawl Discipleship Making Ministry (DMM) Children Home-ah hian hnam hrang hrang naupang 30 an awm a. May ni 3-a Meitei leh Zohnathlak te kara buaina a chhuah hnu atang khan naupangte awmna hmun hi a him lo hle a, in hla thawm te, silai puak ri leh in sawisa ri te an hre fo a; an awmna hmun pawh beio tawk mai thei dinhmunah a ding.
DMM Children Home founder Roslyn Kimbuang-i'n a sawi danin, naupang te chu an thla a muang lo a, an rilru lamah nghawng tha lo a awm a, buaina chhuak nghawng kal zelah ei leh inte an tlachham chho a, chumi avang chuan Home in sum a neih zawng zawnga lirthei hmang chawpin Mizoramah an tlan lut ta a ni.
Mizoram an luh tirhin Aizawl-a Ainawn Vengah an in nghat lailawk phawt a, an chungchang chu sorkar hotute hriattir an ni a. Tunah chuan Aizawl bawrhsap pisa enkawlin Berawtlanga, Art and Culture building-ah an awm mek a. An ei leh in tur hi sorkarin an ngaihsak a, naupangte chua n hriselna dinhmunte pawh endik an ni tawh.
Roslyn Kimbuang-i chuan, tuna an awmna hmunah chuan an him a, naupangte pawh an hlim hle tih a sawi a, "Ei leh in thuah chuan harsatna pawh kan tawk rih lo," a ti.
Hetihlai hian a enkawl naupang hriatpui lohin rilru hah rukna lian tak an nei tih sawiin,"Tunah kan awmna hmunah hian kan awm reng thei dawn lo a, chumi hunah chuan eng angin nge kan let leh ang tihte hian min ti buai hle," tiin a sawi.
An home chu mi inphal te thil pek khawm hmanga in nghat a nih thu sawiin, tun ah zawng an state pum a buai tawh avangin an tan chuan tanpuina dawn tur pawh a harsat chhoh an rin thu a sawi a; an home chu sorkar in ziak lut tura an hmalakna te pawh an state buaina in a ti khawlkham chho ta vek tih a sawi bawk.
DDM Children Home naupangte chuan an awmna hmun chu nuam an ti a, Mizorama an zin chhan pawh hre thiam pha lote an awm a, naupang thinlung thianghlimte chu an dinhmun harsat chhoh zel dan tur hre loin Mizoram ralmuanna chuan an thla a ti muang rih hle.
He Children’s Home a awmte hi a then chu nu leh pa nei lote, nu emaw pa emaw chauh neite leh thenkhat chu naupang enkawl ngai hrim hrimte an ni.
Heng Fahrah raltlante hi Mizo Zirlai Pawl leh MHIP General headquarters hruaitute'n Inrinni khan an tlawh a, tanpuina sum fai an pe a. MZP chuan naupangte chu buaipui chhunzawm zel an tum a ni.
Chief minister Zoramthanga pawhin inrinni vek khan raltlante hi a tlawh a, an mamawhte sorkar hnenah thlen hreh lo tura chah in tanpuina tangkafai a pe bawk.
- Lalramdinsanga
Heng naupangte hi Mipa naupang-16 leh hmeichhe naupang-14 an vaiin 30 an ni a. An founder Rosaline Kimi leh thawktu dang 2 in an enkawl a. Mizoram sawrkarin Aizawl DC kaltlangin an enkawl mek a ni.
Naupangte hi Zofa hnam hrang hrang, haw na tur nei tawh lo, hnuchham leh enkawltu nei tawhlo an ni hlawm a. A naupang ber hi kum 5 mi a ni. Hak lai nena lo tlan an nih avângin, hengte hi an mamawh tlangpui niin kan hmu a, zirna chhunzawm an duh bawk. An mamawh tlangpui te:-
1. Mizo Bible (1 chiah an nei, an in hman ṭawm)
2. Note bu leh Pencil.
3. Mizo thhawnthu bu (ṭawng zir nan)
4. Mizo hla bu.
5. White Board.
6. Infiamna hmanrua.
7. A, AW, B... ni 2/1 pawh zirtir thei tur an mamawh a. A bak chu a enkawltu ten chhunzawm theih an inbeisei.
8. Mutbu leh hak tur an mamawh belh bawk.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
.
Post a Comment
He post chungchanga i ngaihdan lo sawi ve rawh: