MZP-in Manipur Zofate tan buhfai bag 70 thawn

Aizawl | May 12, 2023: MZP General Headquarters Aizawl chuan, Manipur tualchhung buaina avanga Zofate tawrhna hre rengin, Ei leh bar an lakluhna kawng a pin tak avangin, MZP Headquarters Manipur kaltlangin Buhfai Bag 70 Churachandpur-ah a thawn.

Heng buhfaite hi MZP Headquarters Manipur chuan tlawmngai pawl hrang hrang Joint Philanthropy Organisation (JPO) te kutah a hlan a. An nin an member harsa zualte hnenah an sem ve leh a ni.

JPO hnena buhfai hlan dan chu hetiang hi a ni– Kuki Khanglai Lawmpi (KKL) 10 bag, Hmar Youth Association (HYA) 10 bag, Young Paite Association (YPA) 10 bag, Simte Youth Organisation (SYO) 5 bag, Zou Youth Organisation (ZYO) 5 bag, Young Vaiphei Association (YVA) 10 bag, Young Mizo Association (YMA) 10 bag.

Heng bakah hian mi harsa leh a mamawh zualte hnenah MZP Headquarters Manipur chuan Kg. 10 den denin a sem kual bawk.

MZP General Headquarters chuan vehbur khawnin, damdawi leh thil hrang hrang a lakhawm mek zel a. Hun remchang hmasa berah hengte hi thawn leh tura ruahman a ni bawk.

MZP chuan, buhfai a thawnna kawnga a tul apiang buaipui a, hmalakpuitu supply minister K. Lalrinliana leh Law minister TJ Lalnuntluanga te chungah lawmthu a sawi.