Aizawl | May 17, 2023: Mizo Zirlai Pawl (MZP) General Headquarters, Aizawl chuan vawiin May 17, 2023 chhun dar 12 khan Vanapa Hall-ah High School Leaving Certificate (HSLC) Examination 2023 Top 10-a Mizo tlingte chawimawina hun a buatsaih a, Mizoram Chief Minister Zoramthanga chuan khuallian niin a hmanpui.
Chief Minister chuan HSLC topper-te chu a lawmpui thu a hrilh a; tun tuma hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel turin a fuih a ni. Vawiina chawimawina dawngtute leh zirlai dangte pawh theihtawp an chhuah chuan Mizoram mai nilo India ram pumah pawh a ber thleng phak an nih theih thu a sawi. Eizawnna kawng zawhnaah tuina, thiamna leh theihna a inan vek theihloh thu sawiin, eng kawng pawh zawh ila, mi tangkai ber ni thei tura inzir leh thawhrimna a pawimawh hle a ni,a ti.
Khuallian chuan khawvel sualna hrang hrang kara seilian zel tur an nih thu tarlangin a bik takin zu leh ruihhlo laka fihlim tum turin zirlaite chu a chah a. Zirlai tan phei chuan taksa bakah rilru leh ngaihtuahna tichhetheitu a ni a, sang tak thleng thei kha hniam taka dahtu a nih avangin tlansan ngam a ngai a ni, a ti. Zu leh ruihhlo hian khawtlang nun a tiralmuang lova, nu leh pa tan mittui tlakna thlen fo tu a ni tih hria a, ruihhlo ti lo tur leh huaisen taka hma lam pan zel turin a fuih a ni. Zirlaite chu ‘talent’ an neih ang ang te hmangthiam turin a fuih a. Eng kawng pawh zawh ila beidawng lova beih a ngai a ni tiin harsatna hrang hrang kara hlawhtlinna chang turin zirlaite duhsakna a hlan a ni.
Pu Zoramthanga chuan thangthar zingah hnam rilru pu an pung chho zel nia a hriat thu sawiin lawmawm a ti a. Khawvel hriata Mizote pho chhuaktu pawimawh tak chu Mizo hnam leh ram hmangaihna (nationalism) hi a ni tiin, ram leh hnam hmangaihna chu uar zawk a kalpui zel turin zirlaite chu a chah a. Hnam rilru pu tur leh Zohnahthlak hnam hrang hrangte inunauna leh inpumkhatna tura MZP hmalakna chu fakawm a tih thu a sawiin ‘Zofest’ MZP ten an buatsaih thin chu lawmawma tih thu a sawi bawk a ni. Zohnahthlakte chu tlang dang leh mual hrang hrangah awm mahse, Mizoram chu Zofa zawng zawngte ‘Jerusalem’ a ni tiin hnam ang a dingchhuak zel thei turin Zofa zawng zawngte tan la thar turin a sawm nghal bawk.
.jpg)
He huna thusawitu dang MZP President Lalnunmawia Pautu chuan, Zirlaite chu ram leh hnam hmangaihna nena zirna chunzawm zel turin a chah a, Hnam dang nupui pasal nei lo turin a chah a. Mizo hnam hmasawnna leh kan hnam him nan Mizo mipate kan tan a ngaih thu sawin, Vawiin-a Zirlai chawimawi zingah pawh Mipa pahnih chauh an awm thu a tarlang bawk.
MZP President chuan, Hmasawnna kan duh rualin, kan ram leh hnam himna kan ngaipawimawh,a ti a. “MZP hi mi tam takin bei thin mahse, ram leh hnamin chhantu a mamawhin an auh nasat ber a nih leh thin,” a ti bawk.
Vawiin-a HSLC 2023 Top 10-a Mizo tlingte chawimawina hunah hian Mizo zirlai 14 te chu chawimawina hlan an ni a, heng zingah hian zirna sang zawk chhunzawm tura khawpui an lo pan hman tawh avangin an chhungte'n chawimawina an laksak pathum an awm.
He huna zirlai chawimawina hlante hi St. Joseph Higher Sec. School zirlai paruk; Deborah R Lalhmingmawii D/o R Rohmingliana, Lalnunsangi D/o PC Lalruatkima, Vanlalrinawma S/o Zohmingthanga Tlau, Lalbiakmawii D/o Lalbiaktluanga, Vanlalhmangaihi D/o V Lalmuanpuia, Esther Zorinhluzuali D/o K Lalengzuala, St. Paul's Higher Sec. School zirlai pathum; Alicia Malsawmsangi D/o Lalsangzuala, Isabel Daoki D/o K Robin, Mary Lalchhanchhuahi D/o Lalrochunga, AR ELLS School zirlai Lalremruati D/o Zosangliana, St. Andrew's School zirlai R Malsawmkima S/o R Lalawmpuia, KD High School zirlai Elena Lalruatfeli D/o PC Lalruata, Don Bosco School zirlai Vanmalsawmsangi D/o Laithanpuia, Bethel Mission School zirlai Esther Tingbiakmuani D/o ZL Thanga te an ni.
He huna chawimawina hlante hi St. Joseph Higher Sec. School zirlai paruk, St. Paul's Higher Sec. School zirlai pathum bakah AR ELLS School, St. Andrew's School, KD High School, Don Bosco School leh Bethel Mission School te atangin zirlai pakhat theuh an ni a. Darlawn khua ami Don Bosco School leh Champhai khua ami Bethel Mission School tih loh hi chu Aizawl khawpui chhung ami vek an ni.
HSLC 2023 Top 10-a Mizo zirlai tling 14 zingah hian Mipa 2 niin, Hmeichhia 12 an ni.
Zirlaite hi chawimawina thuziak, tangkafai cheng sang nga (5,000), Lalhmachhuana Zofa lehkhabu ziah 'Mizo History - Khua', ZOFEST 2022 Souvenir Book 'Lailen', leh MZP Chanchinbu April 2023 issue bakah MZP Sash leh ZoPar atangin pangpar pek an ni.
Kum dangah pawh Lalhmachhuana Zofa hian a lehkhabu ziah hi HSLC Top 10-a Mizo tlingte tan hian a thlawnin lo hlan tawh thin a, kumin pawh hian a hlan leh a ni.
he hun hi MZP General headquarters Vice President Andrew F Lalramnghaka'n a kaihruaiin, Central Kristian Thalai Pawl (Central KTP) Leader Rev Dr F Pachhunga'n hunserh a hmang a, GIG Motors CEO John Lalpeka'n thu a sawi bawk.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: