MSU-in Surveyor lak tur ṭhulh leh Circle Officer lak tur tihdanglam chungchangah MSSSB chairman hmu

byAdmin — 0
Aizawl | May 3, 2023: Mizo Students’ Union (MSU) General Headquarters, Aizawl chuan vawiin ni 3 May, 2023 khan Mizoram Subordinate Services Selection Board (MSSSB) hnuaia Common Recruitment Examination kalpui tur Land Revenue & Settlement Department-a Surveyor post 15 lak tur cancel a nih leh tur thu leh Social Welfare & Tribal Affairs Department hnuaia Circle Officer post 36 lak tur Co-Terminus Basis a nih tur thu an chhuah chungchangah Vice President Pu Laldinsanga hovin MSSSB Chairman Pu C. Lalhuliana an hmu a ni.


MSU thuchhuahin a tarlan danin, MSSSB Chairman Pu C. Lalhuliana chuan DP&AR (GSW) letter No. A.32013/12/2021-P&AR (GSW) dt 25.04.2023 thu an hmuh angin Land Revenue & Settlement Department hnuaia Surveyor post 15 lak tur chu department aṭanga technical paper an buatsaih loh avanga cancel leh a nih thu sawiin, Department aṭanga technical paper buatsaih a nih huna he Surveyor post 15 cancel hi lak leh a nih tur thu a sawi bawk.

Social Welfare & Tribal Affairs hnuaia Circle Officer post 36 lak tur No.A.12031/06/2020-MSSSB dt. 02nd May, 2023 thuchhuaha Co-Terminus Basis a nih leh tur thuchhuah an siam chungchangah MSU zawhna chhangin MSSSB Chairman chuan Department aṭangin Co-Terminus Basis a nih tur thu chu hriattir an nih rualin, eng huna tawp tur nge a nih tih an dawn tel loh avangin advertisement (5 of 2022-2023) No.A.12011/01/2020-MSSSB dt.29.03.2023-a Co-Terminus Basis a nih tur thu an ziah lan loh chungchanga an tih sual an pawm thu MSSSB Chairman chuan a sawi bawk niin MSU thuchhuah chuan a tarlang.


MSSSB Chairman Pu C. Lalhuliana chuan tun Common Recruitment Examination tura Surveyor leh Circle Officer hna chauh dil tum emaw Common Recruitment Examination zinga hna dang dil duh lo kan awm a nih chuan application form theh luhna man an sen chu pek kir leh an inhuam thu MSU hruaitute a hrilh niin MSU chuan thuchhuah siamin an tarlang.


MSU chuan, MSSSB hnuaia Common Recruitment Examination tura tih sual leh tih danglam a awm hi ṭha lo a ti hle a, zirlai tam tak hna dil turte rilru sukthlek tibuai zawnga department an fimkhur tawk lo leh an che fel tawk lo hi pawi a ti tak zet a, tun hnu zela thleng nawn tawh lo turin MSU chuan department te leh MSSSB te fimkhur leh zual turin an ngen.






Share it with your friends!
 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post