MIIN ISUA AN RIN HMAIN, NANGMAH AN RIN PHAWT CHE A ṬUL

 _Malsawmna Dawng Nun Rahbi_

*MIIN ISUA AN RIN HMAIN, NANGMAH AN RIN PHAWT CHE A ṬUL*

By Rick Warren 

— May 09, 2023

“Tumah sawichhe lo tur te, kawhmawh bawl lo tur te, mi zawng zawng laka thuhnuairawlhna tinreng tilanga nunnem turtein anmahni hriat chhuahtir leh rawh.” Tita 3:2

I zaidamna chu ringlo mite hriat a ni tur a ni. Harsatna i tawhin i danglam em tih ngaihtuahin engtiklai pawhin an thlir reng che a ni. Zaidam taka harsatnate i hmachhawn a nih chuan, he khawvela mite tan testimony ropui tak a ni ang.

Bible in Tita 3:2 ah chuan, “Tumah sawichhe lo tur te, kawhmawh bawl lo tur te, mi zawng zawng laka thuhnuairawlhna tinreng tilanga nunnem turtein anmahni hriat chhuahtir leh rawh” a ti a ni.

Isua zuitu i inti a nih chuan, mi tumah i sawichhe tur a ni lo. Inhnial i hrat tur a ni lova. Engang mi pawh ni se. Mi zawg zawng chungah zahngaihna i lantir tur a ni.

Chanchin ṭha hril rawngbawlna hna Pathianin min pek avangin, mi ka mil miah lohte nen inkawmna hun kan nei fo ṭhin. I hmelma chu Isua hnenah i hruai thei lovang a, i ṭhiante chauh Isua hnenah i hruai thei ang tih hi ka rindan a ni.

Miten nangmah an rin hma che chu Isua an ring lo vang. Miten Bible danglamzia hi min zawt ngai lo tlangpui a. Keimah zawk hi ka danglam a ni tih hmuh an duh zawk a ni. Rinawm takin ka nung em? Ka zaidam em? Ka ngainatawm em? Lainatna ka nei em? 

Miten nangmaha thil an hmuh avangin an ngaitnat che chuan, i thusawi pawh an ngaithla duh ang.

Tita 3:2 hi i zawm a nih chuan i kristian pui mi dangin an sawisel ang che. I nun i chawhpawlh an ti ang che, hei chu ka tawnhriat aṭangin ka sawi a ni. Ṭhian Muslim te, Jewish te, Pathian awm ring lo te ka nei ka tih chuan, “Engtin nge i neih theih?” tiin nun chawhpawlhah min puh der dawn a ni.

Mi dang nena inzahtawnna neia inbiakna avangin i rinna kha i chawhpalwh tihna a ni hran lo. Ka rin ang ring ve lo leh ka ngaihdan anga ngai ve lo ṭhian ka nei a, chutah chuan pawimawh zawk ngaihtuah tur a awm a. Isua an hria em tih hi a ni.

Bible thu nunpui tlak 1 Petera 3:15 ah chuan: “Amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh tih dek chungin" a ti.

Ngaihtuah zui atan

* Mi hrang hrang hnenah Isua chanchin i hrilh theih nan engtin nge ṭhian i siam?

* Eng vangin nge tunlai khawvelah zaidamna hi kan tlakchham tak em em?

* “Nangmahnia awm in beisei chhan zawt apiang che u chhang turin inpeih sa fo ang che u" min ti a (1 Petera 3:15), engtin nge i inbuatsaih theih ang?

*I chatuan hmun khawiah nge i hman dawn?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*