Aizawl | May, 6, 2023: Mizoram Kohhran Hruaitute Committee (MKHC), Political Party hrang hrangte, MJA leh NGO hrang hrangte chu vawiin chawhnu dar 1 khan Central YMA Office-ah an thukhawm a, Manipur-a Zo hnahthlakte harsatna tawh hrang hrang an sawihova, "Manipur atanga sahimna zawnga rawn lutte tumah inthliarna awm lovin lawm takin kan lo dawngsawng zel a, Mizoram mipuite pawh theihtawpa lo dawngsawnga lo tuamhlawm turin kan inngen a ni." an ti.
He meeting hian, Ei leh bar, nitin mamawh hrang hrangah harsatna an tawh lohna turin tan la tlang turin Mizo mipuite a ngen a, he buaina hi mimal hlawkna leh inhaivur zawnga hma la lo turin an ngen bawk.
Vawiin meeting-ah hian Kohhran aiawhin Mizoram Kohhran Hruaitute Committee (MKHC), Political party atangin Bharatiya Janata Party (BJP), Indian National Congress (INC), Mizo National Front (MNF), Zoram Peoples Movement (ZPM), Peoples Conference (PC), te an tel a, NGO atangin Mizoram Upa Pawl (MUP), Mizoram Hmeichhe Insuihkhawm Pawl (MHIP), Mizo Students Union (MSU) leh Central Young Mizo Association (CYMA) bakah Mizoram Journalist Association (MJA) atangin aiawh an tel a ni.
Vawiin thutkhawm chuan, Manipur tualchhung buaina avanga kan unau Zo hnahthlak ten harsatna an tawh leh a kaihhnawih chungchanga Mizoram Sawrkar leh Central YMA hmalaknaah lawmawm an ti a, an hmalakna hi an thlawp tlat tih an sawi a, Hetiang hian thutlukna siam a ni a, a tihlawhtlingtu ni theuh turin an inngen a ni.
1. Manipur tualchhung buaina avanga mi tam takin nunna an chan leh in leh lo leh sakhaw Biak In te hal leh tihchhiat a ni hi pawi kan tiin, thinlung takin kan tuarpui tak zet a ni.
2. Manipur-a remna leh muanna tha tak a awm theih nan chak taka hma la turin Manipur Sawrkar leh Central Sawrkar kan ngen a, Mizoram Sawrkar pawh chak taka hma la zui zel turin kan ngen bawk a ni.
3. Ei leh bar, nitin mamawh hrang hrangah harsatna an tawh lohna turin tan la tlang turin Mizo mipuite kan ngen a, he buaina avanga mimal hlawkna leh inhaivur zawnga hma la lo turin kan ingen e.
4. Manipur atanga sahimna zawnga rawn lutte tumah inthliarna awm lovin lawm takin kan lo dawngsawng zel a, Mizoram mipuite pawh theihtawpa lo dawngsawnga lo tuamhlawm turin kan inngen a ni.
5. Manipur-a tangkhang mek kan unaute him taka Mizoram an lo let theihna tur leh an chenna hmuna nunphung pangngai tak an kalpui ve leh theih nan hma la turin Mizoram Sawrkar kan ngen a ni.
6. Manipur tualchhung buaina avanga Zo hnahthlak unaute tawrhna chungchang leh a kaihhnawihte hi Central Sawrkar-ah thlen nise kan ti a. All Party, NGO leh MKHC ten aiawh intirin New Delhi-ah Central Sawrkar thuneitute hmuh nise kan ti.
7. He buaina avanga harsatna tipunluntu ni lova, remna siamtu ni theuh turin Mizo mipuite kan inngen a ni.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: