Hmeichhiate dinhmun chawisan, remna leh muanna atana Thirsakawr hmanga India ram fan chhuah tumin Sawrkar hotute hmu

Aizawl | May 20, 2023: Thirsakawr (bicycle) a India state 28 tlawhchhuak tura state hrang hrang kal mek Aasha Malviya chuan Mizoram rawn thlengin vawiin chawhma khan Chief Minister Pu Zoramthanga chuan McDonald a chenna ah a lo kawm. Nimin khan Aasha Malviya hian Governor Dr. Hari Babu Kambhampatia chu lo hmu tawhin, tukin khan Sports & Youth Services Minister Pu Robert Romawia Royte chuan tukthuan a buatsaih sak a. Mizoram DGP Pu Devesh Chandra Srivastva pawh a hmu bawk.

Aasha Malviya hi Madhya Pradesh a Nataram khua, Rajghar District ami niin, national sportswoman a ni a. Himna kawnga India rama hmeichhiate dinhmun chiang zawka mipuiin an hriat theih nan leh khawtlanga hmeichhiate dinhmun chawikan mamawhnate zau zawka puanchhuahna tura he Pan India Cycle Tour hi nei ta a nih thu a sawi a. He a hmalakna hian kawng engemaw zawng tala hmasawnna tha a thlen a beisei thu a sawi. Chief Minister chuan a huaisenna chu fakawm tiin, a kal zelna turah duhsakna a hlan a ni.

November ni 1, 2022 khan Bhopal, Madhya Pradesh atanga bul tanin state 18 a kal tawh a. Mizoram hi a state tlawh 19-na niin 16,200 kms lai a kal tawh a. A ruahman dan chuan 25,000 kms tlan in state 28 tlawhchhuah a tum a ni.

Nimin khan mahni Thirsakawr(Bicycle) khalh a India ram fan chhuah tum mek tu Nula Aasha Malviya chuan Governor Dr.Hari Babu Kambhampati chu a chhenna Raj Bhavan- ah a hmu a. He hunah hian India ram Thirsakawr hmanga fan chhuah a tum chhan leh a vei zawng te Governor a sawipui a ni.

Nula Aasha Malviya chuan cycle hmanga India ram fanchhuah a tum chhan ber chu 'hmeichhiate himna leh dinhmun chawisan' a nih theih nan a mipuite hnena zirtina thlen a nih thu Governor hi a hrilh a. India rama hmeichhiate dinhmun ngaihsak a, an dunhmun chawisan a nih theih nan a Aasha Malviya-in engkim mahni intum chawp a, hma a lakna chu fakawm a tih thu Governor hian a lo hrilh a ni.

Dr Hari Babu Kambhampati chuan Nula Aasha Malviya hmalakna chuan India mipuite zingah harh tharna a thlen ngei a beisei tih a lo hrilh a. India hmeichhiate zingah amah anga sulsutu an lo chhuah zel a beisei tih sawiin State-tam tak la kal tur a nih angin tluang taka a hmabak te a tih zel theih nan Aasha Malviya hi a duhsakna a hlan tih a hrilh bawk a ni.

Aasha Malviya hi Nataram, Rajghar District, Madhya Prasesh khua leh tui niin November ni 1, 2022 khan a chenna khua chhuahsanin India State zawng zawng fanchhuahna hi bul a tan a ni. State- 18 a tlawh tawh hnuiin nimin tlai 3:30 khan Aizawl a lo thleng a ni.Tun dinhmunah hian 16200 km- tlan tling tawhin August ni 15, 2023 hian Delhi ah India a fanchhuah na kawng zawh hi a titawp dawn a ni.