Central YMA-in Dan lova hnam dang nena sumdawnna kalpui - Iron Rod & Cement dawrte khar tir!

Aizawl | May 20, 2023: Aizawl khawpui chhunga Iron Rod, Cement leh Balu dawr dan lova hnam dang mite thurualpuia siam nia hriatte chu vawiin khan Central YMA hruaituten an dawrah theuh kal chilhin, an khar tir a, dawr eng emaw zat khar a ni.

Central YMA chuan, YMA kumpuan "Ram leh Hnam Humhalh" kawnga a hmalakna kawng khat atan, Mizo hming hawha hnam dang ten Irod & Cement dawr an hawnte, Mizo ten hnam dang thurualpuia hetiang lama sumdawng kalpuite chu hun engemaw chen a zirchian hnuah list an siam chhuak a. All Mizoram Cement & Iron Rod Dealers Association (AMCIRDA) te zirchianna nena en kawp chungin, chung atanga rinhelh kai dawr 91-te chu vawiin khan Central YMA in hnatlang kovin, thuang (Team) 5 a in sem darhin hmalakna hi an kalpui ta niin CYMA chuan an tarlang.

Central YMA hian a list siam a awm zawng zawng dawr neitute leh an dawr awmna area Branch YMA hruaitu theuhte chu Ni 10, April 2023 khan Central YMA Hall Tuikhuahtlangah ko khawmin, ngenna a lo siam tawh a. Hemi ni atanga thla 1 chhunga an hnam dang thurualpuite nen lo in ching fel turin hun a lo pe tawh a ni. Hetia hun tiam a ral hnu May Ni 12, 2023 khan dawr awmna area Branch YMA hruaitute in rawnkhawm leh a nih hnuah vawiin a hnatlang koh hi an rel ta a ni.

Vawiin hnatlangah hian Central YMA hruaitu CEC te leh Kumpuan Sub Committee member mi thahnem tak thawk chhuakin, dawr awmna Branch YMA hruaituten an mahni veng theuhah an lo tawiawm bawk a ni.

Central YMA President Pu R. Lalngheta chuan hemi kawnga hmalakna kal zel dan tur chu Committee in a la rel zel ang a ti a. Thlak khat chhunga lo in ching fel tura YMA ngenna ngaipawimawha an dawr khar tawhte, an hnam dang kawpte lo ti tawp mi engemawzatte chungah Central YMA hminga lawmthu sawiin Mizorama sumdawnna hi a ram leilung fate ngeiin an kalpuia, hnam dang kuta sumdawnna sum leh pai luang lut nasa lutuk hi kan hnam tan a him lova, Mizo mipuite kan tan rual a tul tak zet zet a ni a ti. Iron Rod leh Cement hmanga sumdawnna pawh hi Mizo te kutah ngei a hlawkna tam ber a luan luh hi kan duh tak zet zet a.

Hnamdang dan lova lo sumdawn puite pawh anmahni kut ngeia an sumdawnna a awm theih nan hma kan la zel dâwn a ni, a ti bawk. Central YMA President chuan he hmalakna kawngah hian Mizo mipui zawng zawngte thlawpna leh tawiawmna a ngen bawk a ni.

Central YMA hruaitute zirchiannaah hetiang sumdawnna dawr Mizo enkawl leh Mizote ta ngei engemawzat a awm thu an tarlang a. Tin, tunlai hian Mizorama Iron Rod zawrh te hi a size a tê ta em em mai nia hria in hei pawh hi hnam dang thurualpui thin te hmalakna nia hriat bawk a ni.

Central YMA ngenna anga vawiina dawr khar zat hi he thu buatsaih lai hian hriattheih a la ni lo a ni.