Central YMA hruaituten Manipur buaina chungchangah Chief Minister an hmu

Aizawl | May 6, 2023: Vawiin ni 6.5.2023(Inrinni) chawhma khan Central YMA hruaituten Chief Minister Pu Zoramthanga chu a Bungalow ah an hmu a, Manipur buaina avanga Mizo tangkhang te him taka hruai haw an nih theih dan tur an sawi pui.

CYMA hruaitute hian Imphala Mizo engemaw zat tangkhang leh zirlaite dinhmun hlauhawm taka an awm thu leh a rang lama hruai haw an nih theihna tura ruahmanna siam turin CM hi an ngen a. Zo hnahthlak unaute harsatna hrang hrang an sawi pui bawk. CM hian sawrkarin ruahmanna a siam dan te leh Commercial Flight hmanga a theih ang anga thiar chhuah an nih thu a sawi bawk.

Inkawmhonaah hian Imphala kan unaute dinhmun thlithlai tur leh thlamuan turin Sawrkar aiawhin Minister leh Central YMA hruaitute a hmunah kal nise an ti.

Chief Minister hi Deputy Chief Minister, Pu Tawnluia’n a tawiawm. Central YMA lamah hian Pu R. Lalngheta, President leh OB dangte bakah CEC meber thenkhatte an tel.