Aizawl | April 22, 2023: Mizoram Pollution Control Board chuan Mizorama a kum tela khawlum chho hi lirthei pung chak lutuk vang leh enkawl that tawk loh avang a nih thu a sawi.
MPCB chuan boruak bawlhhlawh dan leh khawchin ngun taka a zirchian thinna atanga a lan danin khawpui boruak a bawlhhlawh nasa chho hle a, chu chuan sik leh saah nghawng neiin khua pawh a lum zual hle niin a lang a ti a, boruak bawlhhlawh dan tihlanna, AIR QUALITY INDEX (AQI) ah chuan Aizawlah January thla khan AQI hi 65 a ni a, February leh March thlaah 85 kai chhoin, tun April ni 10 atang phei kha chuan 100 chung lam kaiin 150 bawr vel a ni a, a san ber lai berin 216 a kai pha hial tawh a ni a ti.
Nikum lam nen khaikhinin AQI hi a sang chho nasa hle a, tunhnaia boruak dinhmun hi AQI zat atanga en chuan Level-3 (Moderately polluted category)-ah a awm mek a, a tlangpuiin GOOD category a awm thin a nih laiin boruak hi a bawlhhlawh chak ta hle niin a lang a ti.
MPCB hian thuchhuah siamin nikum lam nena khaikhinin khaw lum dan a danglam chho nasa hle bawk a ni a ti a. Nikum April thla khan a lum lai berin 27.24oC a ni a, kumin April thlaah erawh chuan 34.16 oC a kai tawh a. Nikum lam nen a san ber lai inthlauhna hi 6.92oC lai a ni tawh tihna a ni a ti.
Sik leh sa inthlak danglam avangte, thal khoro leh ruahtui tlak loh avangte leh chhan dang avangtein khuain lum lam a pan zel rual hian boruak tihbawlhhlawh hian khaw lum a belchhah hle a ti a, boruak chhe zel tur leh khaw lum nasa zual zel tur veng turin Lirthei chelek tlem te, a hun taka pollution test tira boruak chhia a pek chhuah nasat loh nan lirtheite enkawl that te, boruak chhia ei ral turin thing phun uar a, ramngaw humhalh te uar tur a ni a ti a, ram tikang lo tur leh bawlhhlawhte hal lo turin mipuite an ngen tih a sawi bawk a ni.
- AIR Aizawl
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: