Mizoram leh Assam inrina bul Vairengte dai-a awmte kawlphetha pe

byAdmin — 0
Aizawl | April 20, 2023: Tunhnaia Mizoram leh Assam inrina bul Vairengte dai, Vengthara awmte zingah dan lova Electric Connection la, P&E Department ten an tihtawp sak tak te chu dan anga electric connection an neih ve theihna turin Serlui bialtu MLA Pu Lalrinsanga Ralte chuan hma laksakin an Electric Connection man tur chu ama pawisain a tum sak a, vawiin khan electric connection man hi a pek sak nghal a ni.

Helai hmun hi Assam Police te leh Mizoram Police te inkahna bul, ramri humhalhna tura Serlui Bialtu MLA leh VC te hmalaknaa inhmun neilote tana in hmun theh a ni a, in 16 luah luh tawh niin in 6 hian dan angin connection an nei tawh a, in 10 te hian pawisa an neih loh a vangin dan angin connection la nei lovin heng mi te connection man tur hi bialtu MLA chuan a tum sak a ni.

Electric connection man hlanna inkhawm tawiah Serlui bialtu MLA Pu Lalrinsanga Ralte chuan, ramri humhalh na tha ber chu ramri bula awm khua te hmasawnna peka luah chilh zel thei tura hmalak a nih thu sawiin Vairengte Vengthar chu Mizoram ramri humhalhna tura sorkar leh VC te tangkawpa an hmalakna a nih avangin a ngaih pawimawh thu leh, an harsatna tawh te chu a theih ang anga chinfel sak a duh thu a sawi a ni. 

Serlui MLA chuan Vairengte chu Mizoram hmel lanna pawimawh tak a nih avangin mipuite leh khawtlangin hmasawnna an hmuh theihna turin theih tawp a hma a lak thin thu a sawi a, Vengthara awm ten tui connection an neih theihna turin pipe fit vek tawh niin tunah hian tui dah khawl na turin tank siam zawh tep a ni a ti a, Vengthar internal road pawh PCC Flooring in kar thar mai atangin siam a nih dawn thu a sawi a ni. 
- AIR Aizawl


Share it with your friends!
 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post