HMANGAIHNA LANCHHUAHTIRNA THA BER CHU HUN HI A NI

 Hringnun i nun chhuahpui ngei tur chu

— Rick Warren 

— Mar 7, 2023

“Thu chauhvin i hmangaih suh ang u khai, lei chauhvin i hmangaih hek suh ang u.” 1 Johana 3:18

Hringnun hi thawpik tak leh buai taka hman awlte a ni. Amaherawhchu kawppui tha tak i neih chuan i zangkhai sawt thei. Nimin khan Nun leh kawppui chungchanga thudik: Hringnun hmanchhuahna tha ber chu hmangaihna tih kan zir a. Vawiinah chuan thudik dang: Hmangaihna lanchhuahtirna atana tha ber chu hun tih chungchang kan en ho leh dawn a ni.

Hmangaihna hi H-M-A-NG-A-I-H-NA tiin kan lam mai thei a. Amaherawhchu lamdan tha zawk chu: H-U-N hi a ni. Bible chuan 1 Johana 3:18 ah, “Thu chauhvin i hmangaih suh ang u khai, lei chauhvin i hmangaih hek suh ang u” min ti a ni.

Mi i hmangaih a nih chuan, an hnen atangin eng thilpek nge i beisei le? An rilru pek i beisei ang. Ka hmangaih che chuan, i mita en ka duh a. Biak che ka duh a. I aw ngaihthlak ka duh a. Nang nena titi a. Nel taka infiam te ka duh a ni! Mi dang hnena i thilpek theih ropui ber chu hun hi a ni – i hun hi i nun a nih avangin.  

Hun hi i thil neih hlu ber a ni. Chu pawh chu tlemte chauh i nei. Pathianin i damchhung hun tur a tifel vek tawh a; hun i neih belh dawn lo a ni. Sum chu i neih belh zel thei a, hun erawh chu i neih belh thei lo a ni. Mi dang i hun i pek chuan i kohkir theih miah tawh loh tur i nun thenkhat i pe ve tihna a ni.

Kawppui tam tak chu hun nei mang lo an ni. In khatah cheng mah se, zana tuipuia lawng inpel angin an inpel mai mai a ni. Tawngkam tha tak tak chuan in chhawn thin mah se, an inlaichinna chu a nghe lo va. Inngaihsaktawnna an tlachham a ni.

Inlaichinna hi thil tam tak hian a tichhe thei a. Hna pawh hian a tichhe thei. Kan thiltih pawh hian a tichhe thei a ni. Kohhrana inhmanna emaw rawngbawlna tam lutuk pawh hian a tichhe thei a. I tui zawng thil pawhin a tichhe thei a ni.

“Chung ka hmangaihte tan chuan hun engtin nge ka siam theih ang?” i ti maithei e. I TV off la, i computer off la, i phone khawihlai kha dah phawt rawh! Tunlaia thilmak ka tih deuh chu phone khawihin hun an hmang nasa tawh lutuka, an kianga chengte bulah hun an hmang tlem zawk thung hi a ni!

In inlaichinna, inneihna emaw inthianthatna emaw chhe mek tawh tih thar leh i duh chuan I hun tam zawk an kianga hmang turin inbuatsaih rawh le.

Ngaihtuah zui atan

* Eng thilte nge – thil tha lo ni kher lo pawh – mi dang hun i pek theihna daltu che? 

* In inkar chhe mek tawh chu – engtin nge i hun pek kaltlangin i siam that theih ang?

* Hmangaihna lantirna chu hun pek hi a ni i ti ve em? Engtin nge i hmangaihte nen hun in hman thin?

[Lettu: Sangpuia]