Consumer Affairs Minister-in World Consumer Rights Day hmanpui

byAdmin — 0
Aizawl | March 15, 2023: Vawiin khan ‘World Consumer Rights Day’ chu Central YMA Hall Tuikhuahtlang ah hman a ni a, Food Civil Supplies & Consumer Affairs Minister K Lalrinliana chu khuallian niin a hmanpui a ni.


Khuallian chuan Mizoram ah he hun pawimawh tak, khawvel ramdangte ruala hman a ni chu lawmawm a tih thu a sawi a. Mipuite hi consumer an nih ang takin an dikna chanvo leh hamthatnate an ngaipawimawh tur a ni a ti. India sawrkar pawhin consumer-te hamthatna ngaihtuah in kum 2019 khan Consumer Protection Act chu a lo siam tawh a ni a ti. Sumdawngte leh anmahni dawrtu mipui inkarah thawhhona tha a tul a, mipuiten an thil lei kawngah fimkhur zual a ngai a, thil man zat (MRP), a siamni leh thih ni, cash memo leh receipt lak thuah pawh tan lak thar a ngai a, sumdawngte pawhin diktak leh hlemhletna tel lova thil hralh a pawimawh hle a ni; a ti.

Consumer-te harsatna sutkianna turin Consumer Redressal Commission a awm thu sawiin, Consumers Union te pawh mipuite harsatna sukiang tura tan la thar leh turin a chah a ni. Consumer ten awlsam zawka lungawilohna (complaint) an thehluh theihna turin online application - eDaakhil chu kum 2022-ah hawn ni tawh mahse hmangtu an la tlem hle a, mipuiten uar zawk a hmang turin a sawm bawk a ni. Mizoram sawrkar pawhin chak zawkin consumer-te dikna chanvo vawnghim tur a hma a lak mek thusawiin, District Legal Metrology- te thuamchak zel niin ‘Working Standard Lab’ awm lohna district ah pawh dahfel thuai a ni dawn a ni; a ti.

Minister chuan sik leh sa danglam mek zelin khawvel a tibuai nasa hle a,Mizoram-ah ngei pawh harsatna a siam mek a, hei hi energy thianghlimlo, khawvel tichhe thei hman nasat vang ani a ti a. Thahrui chakna (energy) thianghlim zawk hmang tangkai turin tanlak zual a tul thu a sawi a. Environmet tana himlo tuialhthei (fossil fuels) te hmang tlem a,thahrui chakna thianghlim zawk nizung chakna (solar energy) leh thli atanga chakna (wind energy) hman uar a pawimawh hle a ni a ti. Pu K Lalrinliana chuan, Mizoram nuam zawk leh chhenfakawm siam turin mitinin mawhphurna an nei a, a bik takin thalaite khawvel anih angin consumer-te dikna chanvo leh hamthatna vawnnun zelna turah nasa zawka tan la turin zirlai leh thalaite a sawm nghal bawk a ni.


Food Civil Supplies & Consumer Affairs Secretary Teresy Vanlalhruaii pawhin thusawiin, Mizorama consumer-te dikna chanvo humhalha an harsatna te sukiang turin deparment in theihtawp an chhuah mek zel ani a ti a. Consumer ten an dikna chanvo(rights) inzirtirna leh sumdawngten consumer-te dikna chanvo palzut lo tura inzirtirna hun tangkai tak a nih a beisei thu a sawi.

Vawiin ‘World Consumer Rights Day’ puala inkhawm-ah hian Aizawl-a Consumer Branch hrang hrangte bakah Consumer Club Govt. Aizawl College an tel thei a . Inkhawmna hi Prof.Chawngsailova, President, Mizoram Consumers’ Union (MCU) chuan kaihruaiin, Pu C.Lalduhawma, Member Secretary, Mizoram Pollution Control Board chuan ‘Clean Energy Transition’ tih thupui hmangin zirtirna hun a nei a, Pi Lalhlimpuii,DCSO,Aizawl East chuan lawmthu sawina a nei a ni.

World Consumer Rights Day-hi kum 1983 atang khan kumtin March ni 15-ah thupui thlanbik neia hman thin a ni a, kumin thupui atan ‘Empowering Consumers Through Clean Energy Transitions’ chu thlan a ni.



(Khawngaihin, i lo share darh ve ngei dawn nia aw!)
(Khawngaihin, Explore Mizoram hi mi dang i lo hmelhriattir zel dawn nia!)
 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(He website kal zel theih nan hian fakna lo langte hi i lo hmet ve thin dawn nia.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post