Aizawl | March 15, 2023: Mizoram Journalists' Association (MJA) chuan vawiin khan an member te tana state budget inzirtirna - Seminar on Mizoram State Budget chu Aijal Club ah a buatsaih a. Chief Minister Pu Zoramthanga chu he hunah hian khuallian niin a hmanpui a ni.
Chief Minister chuan mipuite hnena thu puangdarh a chanchinthar thehdarhtute'n state budget zirchianna an buatsaih chu lawmawm a tih thu leh hun hlawkthlak tak an hman a duhsak thu a sawi a. Kum engemawzat Finance department changtu Minister a lo nih tawha a tawnhriat leh tun sawrkar sum dinhmun chipchiar takin a sawi a. Chief Minister chuan budget siam a nih hian a siamtute'n an hman dan tur leh sum mamawh dan tur kil kel avaiin chiang taka an hriat lawk vek theih loh avanga a kar laka mamawh belh te, sum hmuh danah te danglamna a lo thlen in a tul anga supplementary demand siam a tul chang a awm thu a sawi a. Loan lak chungchang sawi bawkin, kawng hrang hranga hmasawnna hna hrang hrang thawhna tur loan lak a nih thin thu sawiin, a rulh dan chungchangah tun hma chuan 90% te India sawrkarin rulh sakin, 10% chuah state in a tum thin a, tun hnu ah tihsan a nih thu sawiin, tuna ADB atanga health care atana sum puk pawh sawrkar laipuiin 72% a rulh tur thu a sawi. Chief Minister chuan state leiba chungchangah Mizoram chu state dangte nen khaikhin chuan leiba nei tlem ber te zing ami niin, a aia leiba nei tlem chu Sikkim chauh a awm thu a sawi a. State lian leh hausa zawk, economy dinhmun tam zawkah leiba zat a tam zel thu a sawi.
Chief Minister chuan covid-19 hripui leng avanga sum dinhmun vawiin ni thlenga a la nghawng dan chungchang a sawi bawk a. Sum, a hmanna tur bituk sa, project based sanction chu kawng siamna tura tih te, khelmual siamna tur a tih leh adangte chu a rawn luh thu leh, chung sum chu vaibelchhe tam tak pawh lo ni mahse sawrkar hnathawk hlawh emaw hmasawnna hna dang thawhna atan a lo pawh pen theihloh thu a sawi a. Chutiang nilo, sawrkar hlawh leh thildang atana hman theih tur 'untied fund' chu sum indaihloh kan sawi chhan ber a nih thu leh, chu chu state tin atanga sawrkar laipui atanga chhiah tlingkhawm atanga state in kan dawn ve tur 'share of taxes' te, Revenue Deficit Grant te, state in kan thawhchhuah ve chi hrang hrang chhiah lakkhawm te, hmundang atanga ba rulhna hmuh leh adangte hmuh a nih thu a sawi a. Sawrkar laipui remtihna vek behchhana budget siam a nih hnu ah covid hripui leng avangin chung share of taxes leh hmun dang atanga sum hmuh tur ang a hmuh tak loh thu a sawi a. State in a hmuh theih tur a hmuh tak loh chu chhut in vbc 3000 bawr vel chu a nih tur thu a sawi a. Bill pek loh tam tak pek ngei ngei ngai si te chu budget tlem zawk atang chuan rulh chhunzawm zel a ngaih tho si avangin, share of taxes kan hmuh tur ang kan hmuh tak loh chu a hnawhkhahna a awm tawh bawk si loh avangin harsatna awm dan a sawi a ni.
Chief Minister chuan sawrkar laipui atanga sum hmuh innghat tih chungchangah sawrkar laipui chuan a hranin ramri kham emaw mipui a nei lo a, India ram chu state leh UT te ta vek a nih avangin state leh UT ten hmasawnna hna an thawh na tur sawrkar laipuiin a kawl sak ang zawng pawha a ngaih theih thu a sawi a. Heng sum hi hmang tangkai turin project siam a zuk haichhuah a tul ta a nih thu a sawi a. Chief Minister chuan mipui tan phurrit siam belh zawng ni lo a sum mamawhna phuhruk tura remchanna zawn a resource mobilization lam ngaihpawimawh tul a tih thu a sawi.
He budget zirhona ah hian Pu Ramchuana, MFAS, Addl. Secretary, Finance chu resource person a ni a. MJA President Pu C. Lalrambuatsaiha chuan kaihruaiin, General Secretary Pu Lalrinmawia Sailo chuan report a pe a. Vice President Pu Lalremsiama chuan lawmthu sawiin hun a khar a ni.
(Khawngaihin, i lo share darh ve ngei dawn nia aw!)
(Khawngaihin, Explore Mizoram hi mi dang i lo hmelhriattir zel dawn nia!)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(He website kal zel theih nan hian fakna lo langte hi i lo hmet ve thin dawn nia.)
Post a Comment
He post chungchanga i ngaihdan lo sawi ve rawh: