Aizawl | March 4, 2023: Chapchar Kût 2023 chu nimin khan Mizoram pumah leh state pawnah te a lawmna hun hman a ni a. Mizoramah chuan a lawmna pui ber chu Aizawl Lammual ah neih niin, Chief Minister Pu Zoramthanga chu Kut Pa a ni a, Mizoram Legislative Assembly Speaker Pu Lalrinliana Sailo chu Kut Thlengtu a ni. Kumin Chapchar Kût thupui hi 'Zofate Inpumkhatna' a ni.
Kut Pa, Chief Minister Pu Zoramthanga chuan kût thuchah sawiin Covid19 hripui leng avanga kum hnih chhung chu pangngai taka kût hman theih anih loh hnuah vawiina ropui taka mipui thahnem tak nen ahuhova kut ho theih a ni ta chu lawmawm tiin mipui kût chibai a buk a. Chief Minister chuan kumin Chapchar Kût chu Mizoramah G20 hnuaia meeting pakhat B20 meeting Aizawl a nghah nen a hun innang chiahin, ram hrang hrang atanga meeting a tel tura lo kalte'n Mizo kutpui an rawn chhim ve theih phah chu lawmawm a tih thu a sawi.
Chief Minister chuan he kut kan lawmnaah hian kan thenawm ram Myanmar ami te India ram hmun hrang hrang, Bangladesh leh hmun dang danga kan unau te tel ve tura sawmin, sawrkar pawh theihtawpin a inbuatsaih thu a sawi a. Thenawm ram buai avanga hmun harsa zawka awm te pawh kut min hmanpui tura sawm niin min tel pui thei tura a rin thu te, kut thupui angin Zofate Mizoram chhung leh pawn, khawvel hmun tin a awm te nen min suihkhawmtu, kan inpumkhatna lo ni zel se tiin Kut Pa chuan harsatna karah inpumkhatna chhawm nung zel turin Zofate a sawm a ni.
Kut thlengtu Speaker Pu Lalrinliana Sailo chuan Kut hmang tura kalkhawmte lawmna thu sawiin, hnam ziarang chawilar zel thiam a, pi pute lo nun dan leh tih thin danah a thalo lai paih a, a tha lai chhawmnung zel tur kan nih thu a sawi a. Kût hman danah pawh hlim taka lawmin, ruihhlo tello a inngeih tlang tak zela hmang turin kalkhawmte a sawm a ni.
He hunah hian CYMA President Pu R. Lalngheta pawhin thu tawi sawiin, hnam lam leh zai hrang hrang bakah rimawi tum leh Mizo infiamna te entir a ni a. Chawhma hun hi Art & Culture Dept Director Pi Carol VLMS Dawngkimi chuan lawmthu sawiin a khar a, a hun hnihnaah zai leh lam hrang hrang entir a ni bawk.
Chapchar Kut Pual hian Vanapa Hall ah I&PR department hmalakna in Photography leh Painting Exhibition buatsaih a ni a, Aijal Club Park ah Flower Show buatsaih a ni bawk. Lammual ah hian ei leh in tur leh thuamhnaw leh adangte zawrhna stall engemawzat hawn a ni bawk a ni.
Mizoram district tin bakah state dangah pawh Zofaten Chapchar Kut hi lawm a ni a, Lunglei ah chuan Kut Pa Dr Vanlaltanpuia MLA niin khuallian chuan Mizoten Kut kan neih hlu berte zinga mi, kum tina ropui taka kan lawm Chapchar Kut chuan Zofate inpumkhatna min pe a, min tel khawm hi a hlu takzet a ni a ti.
Champhai ah chuan Kût Pa Dr. ZR Thiamsanga MLA chuan Ţhenawm ram buai avanga zo hnahthlak raltlante’n hun khirh tak an tawh mek laiin Mizoramin a ngaihsak reng thu sawiin, zohnahthlak unaute thlamuang taka awm turin a chah a ni.
Kolasib ah chuan Kut Pa Minister Pu K.Lalrinliana chuan Chapchar Kut hman țhin a nih dan te sawiin Kut hmanna chu hnam ziarang leh kalphungte humhalhna kawnga thil pawimawh tak a nih thu a sawi a. Zofate inpumkhatna hun țha a hmang turin kalkhawmte a chah bawk a ni.
Serchhipah chuan bawrhsap Pi Nazuk Kumar chu Kut Nu a ni a, Hnam inthuamna mawi leh mitla tak tak te, hnam lam leh hla nalh tak takte vawnghim tlat chungin khawvel zau zawkah phochhuak thiam ila, tu leh fateah pawh nghet taka tuh tum zel ang turin mipuite a sawm.
Lawngtlai District ah chuan Kut Pa, Deputy Speaker Pu H. Biakzaua chuan Ṭhenawm ram aṭanga unau lo raltlante lo dawnsawn leh chhawmdawl dan chu thil lawmawm tak a ni tiin, chhunzawm zel turin District mipuite a chah a ni.
Mamit-ah chuan District Bawrhsap Pu Lalnunhlua chu Kut pa a ni a, Zofate inpumkhatna, hnam bil tihdante chhawm nunga nghet taka vuan chung zelin, kumin Chapchar Kut thupui Zofate inpumkhatna chu a taka nunpuitu ni ţheuh turin kalkhawmte a chah a ni.
(Khawngaihin, i lo share darh ve ngei dawn nia aw!)
(Khawngaihin, Explore Mizoram hi mi dang i lo hmelhriattir zel dawn nia!)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(He website kal zel theih nan hian fakna lo langte hi i lo hmet ve thin dawn nia.)
Post a Comment
He post chungchanga i ngaihdan lo sawi ve rawh: