Aizawl | March 13, 2023: BCM Biak In, Lunglei Salem-a Mizoram Baptist Kohhran thuneitu sang ber inkhawmpui ‘Assembly’ Nilaini zan aţanga ţan chu nizan khan a ţiak.
Nimin zing dar 10:00-ah Pastor nemngheh inkhawm buatsaih a ni a. Pastor nemngheh Inkhawm hi BCM President Rev. KV Thanga'n kaihruaiin, Pastor atana lak kum thum chhunga an probation hun hmang zo a, paltlang tawh mi 5 te nemngheh an ni a. Chawhnu dar 1:30 ah Lalpa Zanriah (Sacrament) inkhawm awmin, Rev. F. Ramdinmawia’n a buatsaih a. Nizan dar 6:45 ah Pathian Biak Inkhawm awm lehin, President Rev. K.V. Thanga’n inkhawm a kaihruai a, President kalchhuak Rev. Dr. R. Zolawma’n thuchah a sawi a, inkhawm ban khan Assembly 2023 chu a ţiak nghal a ni.
Assembly Palai zawng zawng zat chu a tawp thlenga chhinchhiah dan in mi 1,396 an ni.
Baptist Kohhran inkhawmpui lianah hian ni thum chhung rorel a ni a. Kohhran khawih thil pawimawh tak tak an rel a, kum thar sum hman tur ruahman chu pawm a ni bawk.
Mizoram Baptist Kohhran Assembly vawi 127-na-ah hian nimin March 12, 2023 (Pathianni) zing dar 10:00 khan nemnghehna inkhawm (Ordination Service) neih a ni a, mi 5 Minister atan nemngheh an ni a. Nemnghettu (Presiding Minister) hi Rev. KV Thanga, President niin, Rev. Vanlalmuankima, Director, Pastoral Ministry Department-in nemngheh te hmelhriattirna neiin, anni hnen atang hian an chanchin tlangpui leh lawmthu sawina ngaihthlak a ni. Minister nemngheh te tana tawngtaisakna Rev. Dr. K. Lalrinthanga’n a nei a, nemnghehna inkhawm-ah hian BCM Choir leh Lunglawn Pastor Bial Zaipawl ten fakna hla sa a rawngbawlna an nei bawk.
Minister atana nemngheh te leh an awmna bial tur chu heting hi a ni:-
1. Lalmuanpuia. S/o C. Malsawma, Pangzawl, - Lungchem Bial
2. R.J. Lalnunpuia S/o R. Lalnunzira, Serkawn, - Farkawn Bial
3. Lalramliana S/o Lalhauva, Dinthar, Azl, - Chawngte E Bial
4. K.Lalrammawia, S/o K. Lalhmunsanga, Salem, Lunglei, - Zawlnuam Bial
5.Joseph Liansangpuia, S/o T. Sanghaia, Chanmari Vengthlang - Hmawngbu Bial
Mizoram Baptist Kohhran Rorelna sang ber – Assembly nithum chhunga neih chu inrinni March 11, 2023 tlai dar 3:15 khan zawh fel a ni a. Rorel palai zawng zawng hi 1348 niin, BCM Assembly Rorel palai kal tam ber kum a ni.
BCM Assembly-ah hian BCM 2023-2024 Budget ruahmanna thlirin ruahman angin pawm a ni. Budget pumpui-ah cheng nuai 12,642.87 pawm a ni a. Kohhran Thawhlawm atanga hmuh beisei zat chu cheng nuai 8254.04 niin, Department thawhchhuah tura beisei zat chu cheng nuai 4,388.83 a ni. Kum hmasa aia budget pumpui punna chu cheng nuai 851.84 a ni a, budget pumpui punna hi za zelah 7.22 a nih laiin, Kohhran thawhlawm (Church Contribution) punna chu za zela 4.62 a ni.
BCM Assembly rorel thu pass zingah – Zomi Baptist Churches of America (ZBCA) nen thawhhona neih te, Chin Baptist Association of North America nena thawhho dilna te remtiin pawm a ni a, Baptist Mission School, Chawnpui Tlabung High School-a hlankai rawtna te pawm a ni bawk. Tin, Medical & Health Department atanga thawktu 28 te dah ngheh rawtna te, BCM hnuaia thawktu mi 5 hna sang zawka hlan kai tura chhawpchhuah te, hna thawktu Pension-a chhuak tur report te thlirin an pawm a, BCM Assembly Hall/Convention Hall sak tura ruahmanna leh Tualchhung Kohhran-a Appeal siam dilna chu thlirin an pawm bawk.
Sikkim Mission Field hawn tura ruahmanna leh rawtna chu remtih a ni a, Kohhran Pawl dang atanga Kohhran Upa rawn lut te pawm dan ruahmanna te, Department hrang hrang tana hna (post) thar 32 hawn dilna leh hnaruak hnawhkhah dilna 3 te, thawktu (contract) mi 53 hna ngheta hlankai tura chhawpchhuah te pawmin, remtih a ni a. Jharkhand Field-ah Hostel din tura ruahmana pawm a ni a, ABC Hrang hrang atanga Ram pum huap tawngtai neih tura thu lut te chu khaikhawmin pawm a ni bawk.
Pandal Structure nei tura hmalak ni se tih rawtna te, Baptist (BCM) danglamna hi lehkhabu-a siama sem chhuah ni se tih te, Bible Commentary Mizo tawnga Siam rawtna te, BES Hmawngbua-a Class VIII thleng hawn dilna te, Baptist (BCM) Kohhran tawngkam hman dan phung leh ziak dan phung bik (Baptist House Styles) inang tlang a bu-a siam rawtna te, Medical Officer Post ruak pahnih hnawhkhah dilna te leh Kalay Valley Baptist Association nena thawhhona pawhsei dilna te a tel a.
Heng bak ah hian ‘Hnahthial-a Administrative Area thar siam a, Executive Secretary (ES) dah ni se tih rawtna chu zirchian tura passed a ni bawk.
Nimin Chawhnu dar 1:30 ah Lalpa Zanriah (Sacrament) inkhawm awmin, Rev. F.Ramdinmawia’n a buatsaih a. Zan dar 6:45 ah Pathian Biak Inkhawm awm leh in, President Rev. KV Thanga’n inkhawm a kaihruai a, President kalchhuak Rev. Dr. R.Zolawma’n thuchah a sawi a, inkhawm ban hian Aseembly 2023 chu a tiak nghal a ni.
(Khawngaihin, i lo share darh ve ngei dawn nia aw!)
(Khawngaihin, Explore Mizoram hi mi dang i lo hmelhriattir zel dawn nia!)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(He website kal zel theih nan hian fakna lo langte hi i lo hmet ve thin dawn nia.)
Post a Comment
He post chungchanga i ngaihdan lo sawi ve rawh: