MIPA KAN VA HEK TAK EM!

(MṬKP member mi 150 thi zingah mipa 131 lai an ni)

~ Zoa Tlau, 22.2.2023, (4:25 am)

Rev. Lalzuithanga'n ṭhalai kalkhawmnaah thu a sawi a, hei hi a rei ve deuh tawh. Hemi ṭuma a sawi hian ngaihtuahna a tithui khawp mai, Synod statistics behchhanin a sawi ber a. An hnathawh leh Social Front lam hmalakna a sawi hian beng a verh a, ngaihtuah chianin a rapthlâk viau! A thusawina hi a rei deuh tawh ka tih kha, 'note' thlip thlepin video-ten la mah ila, a kipa kawiin sawi chhuak ta lo ila. Mizo mipa thih nasatzia leh hmeithai pun chakzia a sawi a, hnam boral tur zia a nih theih hial tur thu a sawi.

Kumin MṬKP 69th Rorel 2023 Tuipui D lama neih zawh tâkah khan kum 2022 chhungin ṬKP member 150 an thi tih 'report' a ni a, an zinga 131 lai hi mipa an ni a, hmeichhia 19 an boral. A 'percentage' chuan mipa thi zat hi 87.3% niin, 12.7% hi hmeichhia an ni. Inthlau tak a ni.

Ngaihtuah chian zawh poh leh Mizorama ṭhalai zînga mipa nunna a hekzia hi sawifiah phak pawh a ni ta lo. Eng vang nge? tih vaknlam aiin, Synod statistics zawng zawng nena zirchian hianin, Mizo mipa nunna hi ṭhalai leh patling lamah a hek hiau hiau hlê mai.

Hosea 9:12 "An fate puitlin mah sela mipa rêng rêng awm lo tûrin Ka sûntîr tho vang. A ni anmahni ka hawisan hunah chuan An chung a va pik zual dâwn em!" tiin Israel fate laka Pathian thinurna kan hmu tawh a. A thupêk zawm lova an vahbosanna thui takin a nghawng tur chu an hnam boralna kawng a nih tur thu a sawina a ni. He hrilhlawkna hian awmzia thui tak a nei a, Israel fate sal ata a hruaichhuah hnuin a thu zawm lova an hawisanna avanga a hremna tur a ni. Mipa boralna hian hnam a tichimit dawn tih chu chiang takin zir thui lo tân pawh a hriat theih awm e.

Kan ramah hian Pa Pathian thinurna kan tawngbua tiin a hremna kan tuar mêk tih sawi lo mah ila, kan khawtlang nunah hian siamṭhat ngai pawimawh ber mai hi a awm tih a chiang ta khawpin a lang. Vanduaina tawka nunna chânte kan diriam lam ni lovin, thihna tam tak hi Lalpa thupêk kan zawm lohna rah kan têl a ni tih chu zêp rual lohin a lang a! Chhuan lo la awm zêl turte tan hian ngaihtuahna a va thui ta ve le!

Krista hnungzuite engkima fimkhur tura tih kan nih laiin, kan khawtlângah ruihhlo leh ruihtheihthil sualin ro a rêl a. Kan taksa hriselna nasa taka a khawih buai mai bakah kan thlarau thlengin min rûn nasa ta. Hei hi mutmawh hnarmawha kan neih a hun ta takzet mai.

Mizoram puma ṬKP member; la ṭhalai tak tak kum khat chhunga kum 14-40 inkar mi 150 boral zinga 131 lai mai mipa an ni ringawt pawh hian, Mizoram puma ṭhalai dinhmun tur a tarlang chiang hle awm e. Kohhran hrang hrang pawh inen ila, he 'data' aia sângte pawh kan awm ang. Hei lo liama kan ngaih pawimawh tur hi tun dinhmunah hian a awmin a lang lo.

SEDP, Kuhvarah leh 'Politics' tihlam pawh a ni chiah lo. Vei tur dik tak hi kan vei a ngai ta! Kan khawtlâng inrelbawlna leh khawsak phungah hian siamṭhat ngai kan va nei lian dawn ve le.Damdawi hmansual a hluar a, Aizawl veng ṭhenkhatah phei chuan rukrûk a hluar avangin fimkhur tura tlangauin an puanzar a ngai ta hial mai.

Heti ang êma mipa ral chak hi chu hnam boral tur zia chu a ni mawlh ang. Mipa kan kiam zêl a, hmeithai an pung a, pa nei lo an lo pung zel a nih chuan hmeichhe lu ber awm lohna ramah kan lut mai dawn a va ang ta si ve.

Mizo mipate hian a tharin hmeichhe lu kan nihna hi kan vawnhim a ṭul takzet a. Krista kan lu-a hmang lova kan nunin thildang a dah pawimawh tâk zel chuan; kan thlahte tan beidawnna ruamah kan ram mawi tak hi kan siam thei a ni.

I Korinth 11:3 "Amaherawhchu, mipa tawh phawt lu chu Krista a ni, hmeichhe lu chu mipa a ni, Krista lu chu Pathian a ni tih in hriat ka duh a ni."

MIPA BORALNA HIAN HNAM BORALNA A THLEN THEI A, CHHUAN LO LA AWM ZÊL TURTE TAN KRISTA LAM I HAWI LEH ANG U.

Lalpa a ṭha. 🙏💜🙏

(Khawngaihin, i lo share darh ve ngei dawn nia aw!)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(He website kal zel theih nan hian fakna lo langte hi i lo hmet ve thin dawn nia.)