Aizawl | Feb 26, 2023: Aizawl Day vawi 133-na lawmna, Aizawl Municipal Corporation buatsaih chu nimin February 25 khan khar a ni ta a. A lawmna pui ber Aizawl Sipai Lammuala programme buatsaihah hian Pu Lalrinenga Sailo, Mayor, Aizawl Municipal Corporation chu khuallian a ni.
Aizawl Mayor Pu Lalrinenga Sailo chuan, kum 1890 February 25 atang khan Aizawlah mei mit loin khawpui hi luah tan a ni a, chuvangin he ni hi Aizawl khawpui din tan niah chhiar a ni, a ti.
Kum 133 chhung hian Aizawlin hun hlimawm tak tak te leh hun khirkhan tak tak te a lo paltlang tawh a, Indopui pakhatna ah phei kha chuan France rama kal turin Sipai Lammualah Mizo tlangval 2100 zet an pungkhawm a, chutiang chuan mi ram te ang bawkin Aizawl hian history tam tak a nei a ni, a ti.
Aizawl Municipal Council lo din tan atangin vawiin thlengin Aizawl khawpui hmasawnna turin AMC chuan hma a la a, kawng hrang hrangah hmasawnna a hmu chho zel, a ti a. Pu Lalrinenga Sailo chuan sawrkarin ruahmanna hrang hrang a siam te, dan hrang hrang a duan te, in leh lo sak dan te, khawpui enkawl danah te sawrkar dan zawm hram hram turin mipuite a sawm a ni.
Aizawl Day lawm rel a nih dan te sawiin Aizawl Mayor chuan mipuiten hna nasa takin kan thawk a, a te ber atanga a lian ber thlengin he ni pual hian hun hlimawm tak hman kan phu nia kan hriat avangin AMC chuan Aizawl Day hi ropui taka hman ni se, tiin a rel a ni, a ti a. Kum lo la kal zel turah pawh Zofate Jerusalem Aizawl khawpuiah Aizawl Day hmannaa tel theuh turin ram chhung leh ram pawna awm Zofate a sawm nghal bawk a ni.
Kum tinin Aizawl Day hi February 25 apianga lawm tura ruahman a ni a. A lawmna buatsaih hmasak berah hian Film Festival te, thiam thil hrang hrang pholanna exhibition te, cosplay te, naupang infiamna hmun te, band intihsiak te, football tournament te, costume parade te, photo exhibition te buatsaih niin food stall siam a ni bawk. National Small Industries Corporation sponsor-in Lammualah hian stall 60 zet sak a ni.
Aizawl Day puala inelna hrang hrang buatsaiha titha lawmman te sem nghal a ni a. Football ah Ward No. 12 an champion a. Ward fai berah Ward No. 1 thlan an ni a. Band contest ah Sol Nova Band chu pakhatna an ni.
Vawiin Aizawl Day lawmna pui ber Aizawl Sipai Lammuala buatsaih hi then hniah then niin thenkhatna hi Municipal Commissioner Pu Zothanmawia’n a kaihhruai a. Aizawl Deputy Mayor Pu R Thanglura’n lawmthu sawina hun a hmang a. Then hnihna hi Pu Laltlanzova Khiangte, Executive Councillor, AMC in a kaihruai thung a ni.
(Khawngaihin, i lo share darh ve ngei dawn nia aw!)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(He website kal zel theih nan hian fakna lo langte hi i lo hmet ve thin dawn nia.)
Post a Comment
He post chungchanga i ngaihdan lo sawi ve rawh: