ZPM-in kumin atan an office hawng; mi thar 189 lawmlut

"Sawrkar ṭha kan din dawn chuan, sawrkar hunah ni lovin, tun aṭang hian kalphung tharin a theih chin chin kan kal tur a ni,"

- Pu Lalduhoma, ZPM Leader

Aizawl | Jan 10, 2023 : Vawiin khan ZPM chuan kumthar 2023 atana office hawnna ZPM Office-ah neih a ni a; he hun hi Pu Lalthansanga (Chatea), Ex-MLA, Vice President chuan kaihruaiin Rev. Dr. PL Biakchhawna, Seventh Day Adventist chuan hunserh a hmang a; Pu Lalduhoma, ZPM Leader chuan mithar 189 lawmlutin thu a sawi a ni.

Pu Lalduhoma, ZPM Leader chuan, “Tunlai hian Zoram chhung leh a pawn lama Zofate zingah Political Revival – Politics-a Harh Tharna a thleng mek a. Mipui mimir, a bik takin ṭhalaite zingah, ram veina te, Corruption huatna te, Sawrkar ṭha zawk chaka tuihalna te a lo langsar sawt ta hle a ni.

 Nikum chhung khan beiseina thar nena ZPM rawn zawm member thar sing chuang zet kan lawmlut tawh a. Vawiin kum 2023 atana office kan hawn ni-ah, a ni khatna aṭangin member thar ṭhahnem tak mai pekin kan lo awm leh ta a, lawmawm ka ti hle a ni,” a ti a.

“Citizenship Amendment Bill (CAB) pass a nih tawh dan kan hria a, tunah Uniform Civil Code (UCC) chungchangah hian CAB ang maia Mizo mipuite phatsan tawh lo turin kan CM leh kan MP te ka ngen duh a ni. Hei hi kan zavaia ṭangrualin, Kohhran leh NGO te nen i nawr tlang ang u. Bangladesh tualchhung buaina avangin kan Zohnahthlak unaute min rawn belh tumin an rawn tlanchhia a, kawng lakah harsatna tawkin, ram palailengah an tangkhang a, nunna hial an chan hi ZPM rilru a na hle. CYMA buatsaihin nimin lamah an thlavang hauhna hun hman a ni a. Kan party pawhin thlawpin, party office hawn hun sawn meuhin, party hruaitute leh MLA te pawhin a hmunah kan ṭawiawm a ni,” a ti bawk.  

Pu Duha chuan, “Kan ram leh sawrkar tichhe ṭhin tute hi tutenge kan tih chuan, ruling party zel hi an ni. A ṭha zawnga hmahruaitu tur ruling party hi awm se chuan, mipuiten kan zui ang a, kan ram chu kan siamṭha mai tur hi a ni a. Nimahsela, ruling party apiang mai hi unit leh Village Council aṭanga a lu ber thleng hian an hna hi a chhe tlangpui viau zel mai a. Tun hnaiah pawh Bualpui (Ng)-a CHC sak chu Joint YLA-in an chhut chhiat sak hial a nih kha.

    Chutiang chu sawi tur a tam khawp mai. ZPM hi Pathian leh mipui zarah kan lo sawrkar ve hlauh a nih chuan, chutiang chu kan ni ve thiang lovang, kan danglam tur a ni. Beidawng tawh ten beiseina thar an nghahna awmchhun kan ni a, mite tibeidawngtu kan ni ve thiang lo. Khelh fuh tum lovin, khelh dik tumtu kan ni tur a ni. 

       Tu party emaw tal chu kan ram Maichamah hian inhlan ngam kan awm a ngai tawh. Sawrkar ṭha kan din dawn chuan, sawrkar hunah ni lovin, tun aṭang hian kalphung tharin a theih chin chin kan kal tur a ni. Party tinin campaign kan ṭan ṭheuh tawh dawn a. Tun aṭang hian corruption hi kan do nghal tur a ni a, kan campaign dan pawh a thianghlim tur a ni. Mi hausa kan hlau tur ani lova, an lakah kan zam tur a ni hek lo.

            MPF leh Kohhran hrang hrangte mit tikhamin kan awm tur a ni lo. Tunlaia Media lama kan inbeih duh dan leh kan ṭawngkam hman duh dan hi a bawlhhlawh ta hle mai. Keini chuan party dang leh an hruaitute kan zahin, ṭawngkam hawihhawm kan hmang hram hram tur a ni. Kan Politics hi a tenawm ta khawp mai. Hei vang hian mi ṭha te pawh an lo tel duhloh phah a ni. Hetiang boruak karah hian Tuitifimtu nih i tum hram hram ang u,” a ti.

Pu Duha chuan, “Kum tawp lamah kan inthlang dawn a. Semi-Final kan paltlang tawh a, MNF nen Final kan khel dawn a ni. A mala sawrkar ngei turin i ṭang ang u. Party dangte aiin kan taimain kan thawkrim tur a ni. Kan mimal eizawnna ṭheuhah pawh entawntlak nih tum ila. Khaw hrang hranga kan hruaitute pawh hi khaw khat pa taima pawl an lo ni deuh zel mai a, a lawmawm tak meuh a ni. He kum hi kan ram tan malsawmna a lo nih theihna tura hmanraw ṭangkai ni theuh turin duhsakna ka hlan a che u,” a ti bawk.

Vawiin ZPM chhung inkhawmah hian lawmluh tharten thu tawi ngaihnawm tak tak an sawi a, ZPM party mi ṭhahnem tak an tel a ni.

.

.