SUPERANNUATION IN KA CHHUAK VE DAWN TA!

byAdmin — 0
(Ni 30.01.23 a min thlahna a ka thusawi tlem a zawng)

Pu Chairman, department a ka thawhpui te leh, helaia ka pension thlahna a lo kal zawng zawngte, a hmasain chibai vek ule.

Hei, vawiinah beisei loh deuhin ka pension thlahna hun kan hmang ve reng mai a, pension a chhuak pawh kan indawt chho zut mai anih hi. Pension inthlah nan kan hun leh tha pawh kan seng tam ta malh malh khawp mai, a bik takin tun kum 2/3 chhung hian.


Ka pension ve hunah chuan inthlah loh ka duh thu te pawh ka lo sawi chhuak zauh zauh tawh thin a, hautak deuha han inthlah te hian tha leh zung a hehin, inthlahrunna eng emaw tak ka neih vang pakhat pawh a ni a.  Service tluang pangngaiah chuan promotion leh pension hun te hi chu lo thleng ve reng tura ka dah len lutuk vangte pawh  a ni ang e. 

Service a kan luhtirh lam khan Chief Secretary pension te kha Vanapa hall-ah ropui takin kan thlah thin a. Pu Manzuala pension a chhuak erawh kha chuan ropui taka thlah kha a duh lo a, chu chuan min lo hneh ve deuh a nia'nge. Nimahsela hei vawiinah chuan pension thlah uarber te zingah ka tel leh hial zawk awm si e. Chu lam chu sawi vak lo mai ang. Hetia inthlahna hun tha tak kan neih tak rau rau ah chuan, remchangah la in, eng eng emaw sawi teuh mai ang aw… 

Kum 1987 October ni 12 ah SDO (TC)in Serlui mini hydel project-ah ka lut a. Thla 6 vel chiah ka awm hman tihin, Lunglei politechnic-ah lecturer-in transfer ka ni a. Kum khat vel chiah ka awm hnu in SDO, Kanhmunah sawn ka ni leh a, mahse ka zawm hma in Aizawlah min lo sawn leh a ni. 
Kawnpui-ah sawn ka ni leh a, kum 2 ka awm hman chauh tihin Bairabi-ah sawn leh ka ni. Building project SDO leh Road SDO Aizawlah te awm leh in, 1997 khan EE ka kai ve ta a. EE han kai takah kha chuan B.E-a ka thiamna kha ka hmang zo titih a, School of Planning and Architecture N. Delhi-ah Master degree (Environmental planning) ka zir leh a ni.

Sorkar hna ka thawh tirh kum 2 chhung leh, ka thawh tawp lam kum 2 chhung hi ka'n ngaihtuah a, Lal ISUA ang tura bultan tum, kawng bumboh leh hling zinga kal, bultanna piah deuh lawka chhuak leh ta mai ang te pawh niin ka inhre thin. Eng nge maw le ti a mahni inthiam chawp chungin, 'Mite pawhin Independence sualin kum 20 zet an beih hnu-ah, a piah lawkah an lo chhuak ve tho a lawm,' tiin inhnemna nei lo phei ila chuan damchhan luah zawh loh insitna leh tawrhna a na lehzual awm e.

Ka thawh tirh lam-ah, Lunglei Polytechnics a tui ti tak a, zirlaite ka zirtir laiin Kanhmun-a sawn ka ni chu hotute min duhsakna a zar-ah Aizawlah sawn leh ka ni a. Saron venga police quarter te khu ka enkawl a, tumkhat ka site fang chu ka mualpho hle mai. Pindan bang brick an lo rem mek a. Balu ai-ah stone dust an lo hmang a. Chu chu ka ngaihdan a ni lo phawt a. Brick, a chhawng zawnga an lo rem kan hmu leh zel bawk a. Estimate-ah chuan a bawk zawnga rem tur a ni si. Ka thin thawk chuan ka tlawhchim ta a nih kha. 
Chutia bang rem sa ka tlawh chhelai chu ralkhat atangin ka hmelhriat (Hlimsang) hian min lo hmu a, kei mah min hrilh dawt hreh deuh si, ka thianpa hnenah, heti hian a lo sawi a, "Ruata hian heti ang hian ti suh se, a tihdan tur tha deuhin hrilh mai sela, naupangte ala ni a, heti ang a tih a chin chuan a ding chhuak ngai lovang," tiin. Chu ka thiltih chu ka chhunzawm chiah lemlo nachungin ka la dingchhuak lem chuang lo hlei lova.
Ka service chhung zawng hian transfer and posting chungchangah hian hotute leh political boss te hnenah engmah ka sawi ngai lo a, sawn ka nihna hmunah apiangah lungawi takin ka kal ve mai thin a ni. Vawikhat erawh chu Kawrthah EE-ah dah nawn ka nih khan mak tihna deuh ka nei ve a. Kum 21 chhung EE-ah ka awm a, division 2 chiahah ka awm ve a. Chutah pawh Kawrthahah phei chuan tun thleng hian a awm rei ber ka la ni a. S.E kai dawn trep tawh a han awm leh kha zahthlak lamah te ka la ve deuh a, representation kha ka submit ve ta ngawt a. Mahse chhanna emaw order sut lehna pawh a awm ta chuang lova, lungawi vak lo chuan ka kal ve leh ta nge nge a ni. A hnu a kan hriat chhuah leh hnu kha chuan party a an block hruaitute khan C.M hnenah min lo dil vang kha alo ni a, kan hotute lu pawh ka lo ti hai ve hle ni tur a ni. Social media a minister recoment-na lehkha lo darh chiam te kha a zia lo khawp mai. Thenkhat phei chu ka thehdarh a ngai te pawh an awm awm e. Nimahsela ka ni miah si lo,   ti darhtu zawng chhuak tura ka ngenna pawh bawhzui a ni ta lem lo a. Nimahsela, Kawrthah a ka awm nawn leh te kha ka lo vannei hle a ni tih te ka hrechhuak leh hnuhnawh a.
Bairabi a Tlawng Lei khu a dawh tantu-ah ka tang a, kum 2 vel kan enkawl hnuah transfer ka ni a. EE pawh 5 lai an awm leh hnu-ah ka zuk awm leh a. Harsatna zawng zawng an lo sutkian hnu a, a dawh zo tura transfer ka ni leh kher kha chunglam remruat alo ni reng zawkin ka hria.
Vawikhat erawh chu ka remtihna leh hriatpuina ngeiin transfer and posting hi party worker pahnih chuan CM hnenah min sawisak ve thung. Lawngtlai circle a awm tur kha Lawngtlai-ah a lo awm ve nual tawh bawk avang leh tuna ka awmna a awm pawh hi a hreh loh zawk thu a sawi vang a ni pakhat. Kei lahin awm ka lo hreh vak bawk si lova. 
Party worker 2 ten ka transfer min beihpui dan erawh chu a dangdai hle thung, heti hian an sawi a ni awm e, “Ruata Sailo hi nuamsa takin a nupui fanaute bulah pension tir chi a ni lo, a hla thei ang ber, Lawngtlai-ah sawn rawh. Amah hi David Sailo an tih hi ni nghe nghe in kan hria,” tiin. 
Mahse pute pawhin min lo duat ve hle tawh a, min sawn duh bik tawh tlat lo, hlawh double te pawh min lo pek hial zawk tawh kha...
Hei tunah chuan Engineer naupang zawk leh fel tak tak an lo chhuak zela, an ni ho future hi ngaihtuah chuan a êng vak lo a. Engtiangin nge hmalam hun tha zawk an neihtheih ang tih hi ka ngaihtuah ve thin a ni. Ringlo mi kan tih zawk te pawhin an tih duh mang loh tur kan ti thei zel mai leh kei mahni ngei tan pawh kawng kan inhnawh zel zawkin a hriat a. Ringlo mi kan tih zawk te rorelna te hi han thlir ila, kei ni ringtute (inti) ai hian ram rorelna-ah an che tha zawkin, an in pekna a thuk zawk emaw tih tur hi a ni a. 
Pu Modi-a te, UP, ODISHA leh West Bengal CM te pawh falu hlauh thak khawpin ram tan an in pe a nia, hetiang hi kan ram hian a mamawh ve in ka hre thin. 
Ka pension chu ani ta der mai a, engber nge ka tih ang tih hi ka hrethiam chiah lo a, social media-ah te eng eng emaw lo sawi ve fo ta thin chu political party zawm ve mai tur te in min beisei an awm a, inlengte pawh ka nei ve nual mai. Mahse eng party nge ka zawm ang tih hi ka ngaihtuah thiam lo. Keimah ka inhriat dan chuan political party a awm chi nilo ah ka inngai a. A bik takin ruling-ah chuan... Opposition tur chi a duan niawm takin ka inhre thin, chu pawh ruling nawi tak an nih chuan ka tlin ve pawhin ka inring chuang lo. Thurawn min han pe tliar tliar teh u khai. 
‘Pathian leh A Lalram tan’ tih erawh hi chuan ka lung erawh a len deuh ber!! 


.....

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post