Aizawl chhehvela zu siam a thianghlim lo!

Aizawl | Jan 31, 2023: Aizawl khawpui daifema zu siamte chu a thianghlim lo a, hriselna atan a hlauhawm hle niin Excise & Narcotics department, Aizawl district Asst. Commissioner Pu T. Lalramzauva chuan a sawi a, zu in mite'n an chhiatpui nasa nia an hriat thu a sawi.


Pu T Lalramzauva chuan, Aizawl dai, Rangvamual leh Phunchawng ram chhunga dan lo a, zu siamte chu uluk lo tak leh leh tho hma tura siam a nih avangin hriselna atan a tha lo hle tih sawiin, "Heng lai hmuna zu an siam dan hi tunhmaa zu siam dan ang a ni tawh lo va, lei laih khuarah polythene bag dahin tui an chhung lut a, chini leh damdawi an pawlh tawp a, zan khat thil thuah zu-ah an chan tir nghal mai a, an thlawr ta mai thin a ni" a ti a, "an zu siamna hmunte chu a tawpin zu atana tui an up chhungahte chuan sazu leh rannung dangte an lut a, a thianghlim lo em em a, heti anga siam a nih avang hian mihring hriselna atan a him lo hle a ni" a ti.

Pu T Lalramzauva chuan aizawl dai hnaia zu siamte chu, a in thin te'n an chhiat pui nasat thu sawiin, tunlai zu in te hian; pum tha lo, nerve tha lo, lung leh thin tha lo an nei tam nia an hriat thu a sawi a, Aizawl chhunga damdawi in lian zual thenkhat an zirchiannaah; pum tha lo, thin tha lo, kal tha lo damdawi ina enkawl tam zawk chu zu kaihhnawih, abikin rak zu in thinte an ni tih an hmuhchhuah thu a sawi.

Excise Asst. Commissioner chuan, Aizawl daia dan lova zu siamna hmunte tihbo a nih theih nan department chuan theihtawp a chhuah tih a sawi a, nikum kum tawp lamahte khan factory tam tak an tih chhiat thu a sawi a. Kum 3 kal taa rakzu siamna hmun tam ber chu Phunchawng ram chhung ami a nih laiin, kum 2021 atang khan Rangvamual ram chhungah zu factor din thar a tam chho tan a, zu siam tura an chhawr tam zawkte chu Burma lam mi an nih thu leh, chung zu factory tih chhiat hna chu ngawrh takin an thawk chho mek zel tih a sawi bawk.





.

Post a Comment

He post chungchanga i ngaihdan lo sawi ve rawh:

Previous Post Next Post