Kristiante hunpui chu a liam leh ta, kan hman dan theuh a Kristian em, tih mahni inzawt theuh ila. Zofate hunpui Chapchar Kut-in min hmuak leh mek a, engangin nge kan hman leh ang?
Chapchar Kut lawm hi tunlaiah chuan Art & Culture deptt-in min kaihhruai a ni ta ber a, kan hman thin dan tlangpui pawh mipuiin kan khawpkhamlo niin a lang ta bawk.
Hmanlaia Chapchar Kut an hman ang diak diakin kan hmang thei ta lo rau rau kan Zo na bo si lova tunlai mila herrem a hun tawh em?
Tuna kan hman dan tlangpuiah chuan state khawpui Aizawl leh district khawpui hrang hrangah sorkar function pakhat angin kan hmang a ni ta ber a, hei hian Zofate a huap kim lo deuh ta em?
Kumin March ni 3 hi sorkarin Chapchar Kut hman hun atana a ruahman lawk chu a ni a, tun aia Zofa ten kan Kutpui ber kan hlut leh zual na tur leh nuam kan tih leh zual dan tur ngaihtuah a hun ta niin a lang.
Duh thu ka'n sam ang:
State khawpui Aizawl bikah - Tun atangin Chapchar Kut atan inbuatsaih ila, kan khawpui kawn remchang lai te pawh Zo thei ang berin chei ila. Kawn remchang laiah Mizo lal in te, Zawlbuk te sa in boruak lo siam lawk ang u hmiang!
March ni 2 leh ni 3, 2023-ah sorkarin Lirthei tlan phal lohna - No vehicle Zone siam leh sela, No vehicle Zone-ah chuan kawng sirah te ei/in siam thiam tak tak ten an ei/in siam tlawm te tea leia han ei mai theih tur te zuar sela, kawn zau remchang deuh laiah Zolanu leh val rual, hnam lam thiam tak tak te lo lam sela, mipui khawlai kal vel, Zo hnam lama lam ve chhin chak an awm a nih pawhin zawm ve nghal theih zel se a va nuam dawn em!
Zo hnam thuama inthuam, mipui tihlim tura lo tei vel te pawh awm sup sup sela, Mizo Lal, Lal upa, Pasaltha etc., thuama inthuamin kan thalaite No vehicle Zone chhungah tei huai huai se a nuam ang.
No vehicle Zone-a mipui kan tei huai huai laiin Sipai lammual lamah exhibition liantham tak chhim tur awm bawk sela, ei leh in tur lam leh Chapchar Kut hriatrengna tur thil lei tur chi hrang hrang te awmin, zaithiam zai ngaithla duh dan ngaihthlak tur awm reng bawk sela a nuam dawn asin!
March ni 3, 2023 zan dar 7 atangin Chapchar Kut chu concert ropui takin khar ila...., kan zaithiam tak tak te nen chai ila, chheih ila.
Chapchar Kut ruai theh veng an awm a nih phei chuan a nuam hlei hlei ang.
Hawh u, kumin chu kan Kut dan i her danglam hret ang u hmiang!!
Post a Comment
He post chungchanga i ngaihdan lo sawi ve rawh: