INTHLAK DANGLAM TURIN, THUTAK I HRIAT A NGAI

 _Nungchang siam dan_

— Rick Warren 

— Dec 7, 2022

“Anni chu thutakin tithianghlim rawh, i thu chu thutak a ni." Johana 17:17

Nun thlak danglam i duh chuan, thildang nen i chawhpawlh a rem lo vang.

Bible in 1 Korinth 3:18-19 ah chuan, “Tuman mahni intihder suh se. In zingah tupawh he khawvelah hian finga a inngaih chuan a lo fin theihna turin mi â-ah lo chang rawh se. He khawvel finna hi Pathian ngaih chuan atna a ni si a. “Ani chuan mi fingte chu anmahni fin verveknain a awk thin,” tih ziak a ni si a.

I nun thlak danglam i duh a nih chuan, khawtlang leh hnam danin ti rawh a tih pawh i tih loh ngam a ngai dawn a ni. Amaherawhchu inthlak danglamna chu nangma theihna chuan i thei kher lo vang.

Danglamna chu rilru ngaihtuahna aṭangin a intan a, chungte chu nangmah chauh tih theih pawh a ni lo. Ephesi 4:23 chuan, “In rilru thlarauvah chuan a tharin lo awm ula” a ti.

Thlarau Thianghlim chu engtin nge a thawh?

Danglamna tak tak thlen turin thutak i hriat a ngai. Isua thusawi lar tak hi i lo hre tawh maithei e: “Tin thutak in hria ang a, thutak chuan bawih a ban ang che u,” a ti. Johana 8:32.

Isua kha Krawsa khenbeh a nih hma chiah zanah khan a ṭawngṭai a, “Anni chu thutakin tithianghlim rawh, i thu chu thutak a ni,” a ti a.” (Johana 17:17).

Pathianin a thu thutak chu i famkimna turin a hmang a ni.

Mimal danglamna thuruk chu tha ngah lamah a inghat lo va. Thutlukna siam lamah a ni hek lo.

Danglamna thuruk a harsa lai tak chu thutak hriat leh hmanchhuah hi a ni - chu chu Pathian Thu Bibleah a awm a ni.

Pathian Thu a i inchiah a, thutakah i rilru i dah chuan, Bible chuan hei hi min tiam: “Chutichuan dik lohna ngamthlemna angin, fing verveka mihring bum chawpin, zirtirna thli tinrenga lehlam lehlama vawrh leh len len naupang kan ni tawh lo vang a, hmangaiha thu dik tak sawiin, engkimah amahah kan thang lian thei zawk ang: amah chu Lu a ni, Krista chu. Amah azarah taksa pumhlum chuan inzawmna tinreng thawh avanga rem taka inchuktuah leh inzawm khawmin, peng tin thawhzia ang theuhvin hmangaihnaa insiam tha turin taksa chu a lo tipung thin a ni.” (Ephesi 4:14-16).

Isua i hriatchian poh leh, thutak pawh i hrezual ang. Tichuan nunhlui aṭanga chhuakin, dawt leh diklo taka awm i bansan ang a. I ṭhanglian anga, danglam zelin, i nun a lo inthlak ang a, Krista i ang deuh deuh ang. Tichuan, thutak chuan a chhuah zalen takzet che a ni tih i hria ang.

Ngaihtuah zui atan

* Mi tam tak chuan Pathian Thu awih chu saltanna ang deuhah an ngaia, dan zawm tur tam tak a awm si a. Mahse Pathian Thu awih chuan zalenna min pe tih i hria em? Engtik lai khan nge i nunah zalenna i lo tem ve tawh le?

* Engtin nge i rilru chu Pathian Thu thutaka dah turin a awm theih? Ila awmtir lo a nih chuan eng nge tun kar tharah hian zir tur i neih le?

* Eng dawtin nge i nun sal anga phuar behtir che? Engtin nge Pathian Thu chuan a chhuah zalentir che. A la zalentir lo che a nih chuan vawiin aṭang hian Pathian Thu chu engtin nge i hman theih ang?

*[Lettu: Sangpuia]*