HNATHAWH TURIN MIN HNAWH TAWNGKHAWNG CHUAN

 _Nungchang siam dan_

HNATHAWH TURIN MIN HNAWH TAWNGKHAWNG CHUAN

— Rick Warren 

— Dec 13, 2022

“Unaute u, Asia rama kan chunga hrehawm thleng thu kha in hriat loh kan duh lo va, khatia, nasa taka tuar zawh rual loh va, nun reng pawh beisei lo khawp hiala delhbeha kan awm kha. A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni.” 2 Korinth 1:8-9

Tu te mai pawh hian hnathawhna lamah hian harsatna kan lo tawk vek mai a. A chang phei chuan hna tam lutuk inhnawh tawngkhawng chuan nangmah ngei pawh a tichau zo vek chein i inhre hial ang.

Chutiang hunah chuan engtin nge i tih le? Paulan a tih ang hian ti ve rawh.

Paula kha Isua Krista tirhkoh a ni a, khawvel hmun hrang hrangah chanchin ṭha hrilin a zin ṭhin a ni. 2 Korinth 1:8-9 ah chuan, “Unaute u, Asia rama kan chunga hrehawm thleng thu kha in hriat loh kan duh lo va, khatia, nasa taka tuar zawh rual lohva, nun reng pawh beisei lo khawp hiala delhbeha kan awm kha. A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni” a ti a ni.

Hna i thawhna kawngah harsatna i tawka, i chau tawngkhawng a nih chuan, thil pathum te hi lo ti ṭhin ang che.

*Pakhatna, i harsatna chu Pathian hnenah ṭawngṭaiin thlen ang che.* "Lalpa, ka chau tawngkhawng a. Min ṭanpuitu tur reng ka hre lo. Ka hrilhhai zova. Ka puitlin thei dawnin ka inhre lo a ni” tiin Pathian hnenah thlen la, i harsatna chu Pathian hnenah hlan rawh.

*Pahnihna, ṭhian ho bik nei rawh.* 2 Korinthah chuan, "Kan” tih hi vawi ruk a hmang a, "Keimahni" tih hi vawi hnih a hmang bawk a ni. Paula kha a hnathawhnaah a chauh tawngkhawng lai pawhin, amah chauhin a awm lo. Paula ang hian ṭhian pawl ho rin tur i mamawh ve a ni. A bik takin, hna i ngah tawngkhawng lai pawha, kartina Bible study neia, ṭawngṭai hona neia, nangmah fuihtu tur che i mamawh a ni.

*Pathumna, i hnathawhnaah chuan Pathianin mi dangte hmangaih zir turin a duh che a ni.* Biblein 1 Korinth 16:14 ah, “In tih apiang chu hmangaihnaa tih ni vek rawh se” a ti. I hnathawhnaah  leh i thiltihna kawng engkimah, midang hmangaih dan i zir tihna a ni.

Hnathawhnaah mi dang hmangaih dan kawng chu engtin nge ni ang? I thawpuite chuan i chungah ti se i duh tur ang bawkin i ti tur a ni. Hna thiamna ai mah chuan hmangaihna a pawimawh hmasa a ni tih i thawhpuite chungah lantir rawh. Hna chu eng ang pawhin harsa mah se, Isua angin midang hmangaih zir rawh.

Hei hi hria la, hna i ngah tawngkhawng chuan, ṭawngṭai la, ṭhianhoah innghat la, i thiltihna apiangah hmangaihna nen ti zel ang che.

Ngaihtuah zui atan

* I ṭhian pawl ho chuan hna lamah harsatna i tawhin engtin nge an puih che? Tunkar chhung hian tuna i harsatna chu engtikah nge i hrilh hlawm ang?

* Mi dang hmangaihna aṭang hian engtin nge i hna lama i thawpikna a tih kian theih?

* Paul ang hian a chang chuan i hnathawhna kawngah engmah ti thei lova inhriat hi eng vangin nge a pawimawh?

*[Lettu: Sangpuia]*