ARGENTINA LEH KEI

byAdmin — 0
 🇦🇷🇦🇷
K. Remruatfela

Football khawvela ka mit a keu phat atanga vawiin thlenga thin lung taka tan ka neih awmchhun chu La Albiceleste (Argentina) team hi a ni mai awm e. Thil mak deuh mai chu, Argentina tih hming a put hrim hrim hi chuan Football a ni emaw, Volleyball a ni emaw, Tennis a ni emaw, eng sport discipline ber pawh ni se ka tan rum rut nghal em em vek mai a. An khawpui ber, Buenos Aires te hi naupan tet ata khawvela ka ram fan chak ber a la ni ta zel mai.




Kum 1994 World Cup khan kum 4 erhawh chauh ka la ni a. Chuvangin, khami tum World Cup kha chiang kuangin ka hre lova. Nimahsela, ka han ngaihtuah let hian ka u ten chhuatah an kapkarah min chelh a, in chhunga mipui khat thap hmaah ka thlir ve tih erawh ka la hre thei viau vuai. Chutianga la chumchiap ni mah ila, damdawi kaihhnawih thilah Argentina thiam puipa, Diego Armando Maradona an thawn haw tih kha chu ka hre chiang ve em em lawi si a. World Cup zawh hnu academic session hmasa berah school ka lut tan a. Chuta kan zirtirtu hmasate sawi dan chuan Maradona kha ka duh em em thin a, ka hming bulah te Maradona tih ka lo dah hial thin a ni awm e. Chuta tang daih tawh chuan Argentina tantu ruhkawl ka lo ni tawh tihna nih chu!

Kum 1998 World Cup erawh veng chhunga TV nei tlemte te zinga mi kan nih avangin in khat thapa inkhel kan en ho lai te, Argentina Manager Daniel Passarella leh Claudio Canniggia sam zuah chungchanga an intih thiam loh boruak vel kha chu ka hre chiang ve em em tawh a. Kum 8 mi lek la ni mah ila, khatih laia Argentina players – Roberto Ayala, Batistuta, Claudio Lopez, Carlos Roa, Ariel Ortega, Juan Sebastian Veron, Diego Simeone etc te hming kha chu ka lo bel ve em em tawh a. Holland team nen Quarter Final an khelh tuma, hun tawp dawn hnaih lam tawiha Bergkamp`in Roberto Ayala kapkara ball sawh chhuah tira Keeper Carlos Roa ban phak lo chiah chiaha a pet goal tumte khan ka mittui a lo far daih tawh a ni.

Kum 2002 World Cup kha World Cup awm tawh zawng zawnga ka hriatchian ber a la hial awm e. Kum 12 mi lek la ni mah ila, Football ka tui vanglai ber a ni a. Khatih hun lai khan Football bu te pawh hralh chhuah tur ni lem lovin ka lo siam daih tawh a, EPL match kaihhnawhah te Pu Mamuana leh Pu Tetea ten en pawh kan lo in phone zak zak tawh thin. Vawiin thlen hian en lovin group tina team awm dan leh an inhneh dan te kha thawk la lovin ka la sawi chhuak vek thei a. World Cup tan dawn tepa Captain Roberto Ayala inhliam vanga a khelh theih loh phut tur thu ka hriatte khan zamna namen lovin min nuai nghing dawt nia. 

Nimahsela, qualifying match lama an chet tham em avangin khatih laia khawvel huap pawha players lar tak tak – Batistuta, Veron, Ortega, Javier Zanetti, Walter Samuel, Hernan Crespo, Claudio Lopez, Diego Simeone, Aimar, Juan Pablo Sorin, Almeyda, Placente etc te an la intlar thut avang khan champion nomawi chawi tur khan ka beiseina a sang em em a. Group match vawihniha England an hneh loh tumte khan pawisa ka lo chawi hial tawh a, group match hnuhnung bera Sweden an draw avanga an tlang tak lo khan ka tan chuan World Cup a tawp ta a ni ringawt!

Kum 2006 World Cup hi Class X kan nih lai a ni a. Thiante nen Football kaihhnawih titi nuam kan tih chhoh lai tak a ni a. Captain Ayala ho na hnuai an ni bawk nen beiseina ka nei sang ve leh em em a. Chutihlai chuan senior player tlachham deuha ka hriat avangin ka zam ru viau tho. Juan Roman Riquelme ropui vanglai a ni bawk a, a lakah hian a bik takin ka innghat thui em em a, hmatawngah Hernan Crespo, Javier Saviolla leh Carlos Tevez te inkawpa aia hlauhawm tur hi an awm bik lo ang tiin chhuang takin thiante bulah ka lo sawi ve thin. Quarter final bawka an tlak leh tum khan ka rilru a na tak zet a. Ka la hriat reng chu, kan class room Notice Board-ah Argentina thlah nan ‘Goodbye Argentina – See you in South Africa’ tih ziak ka chhut chawp chu ka tar nghe nghe a ni.

Kum 2010 World Cup erawh vairama lehkha kan zir tan tirh lai a nih avangin inkhelna enna hun ka chang tam lo hle a. Khatih hunlai kha Cricket tournament awm lai a lo ni kher kher a, vai hovin Cricket kha en an duh thin si a, ka Mizo puite lah football ngaina an tam si lova. A lehlamah hostel-a awm tir, a junior-most ka ni bawk si nen vai ho hnial hneh lo chang ka ngah thin hle a. Duh angin world cup boruakah pawh ka chen theih loh thin phah. 

Nimahsela, Argentina team te inkhelh tum a nih chuan en loh thiang lo angah ka ngai nghet bur a, an cricket en tui lai mah ni se, thih ngam rilru pu-ah ka do ngam a. Argentina inkhel ka en theihna nih phawt chuan hliam pawh tuar mai ila a pawi lo tih rilru hial ka pu thin. Chutiang taka en chak leh en tum ka nih avangin Argentina inkhelh tum hi chuan vai, hostel lama kan senior zawkte pawhin dan chi-ah min ngai lova, ka en leh nge nge thin. Beiseina sang tak nen hmalam kan pan laia, quarter final-ah bawk mualpho taka Germany in min tlawm tum a, Manager Diego Armando Maradona tap hmel kha vawiin thlengin ka la theihngilh thei lo!

World Cup 2014 ah ve thung chuan college leh hostel lamah te pawh a senior most kan lo nih ve tak avangin ka inti thu ve tawh em em a. Chhun zan zawma TV thut chilh tawk reng awmna, common room-ah vai hovin cricket leh thil dang an en tui lai pawh ni engang mah se, inkhel ka en duh a nih chuan hmet sawn rawh u ti ve ngam ngat tawh kha ka ni a. En pawh ka en nasa hle. Amaherawhchu, final year exam lai a nih avangin game zawng zawng erawh rilru ka pe thei lova. 

Chutihlai erawh chuan Argentina te inkhel erawh hmaih awm hauh lovin ka en kim vek thung. Quarter final chin kha chu mahni in lumah ka en ve thei tawh a. Final inpet thleng tura penalty hmanga Holland an hneh tum khan lawm vangin ka biangah mittui a luang a. Nimahsel, final match-a extra time hun tawp dawn tepa Mario Gotze khak luh avanga Germany-in an tlawm tum khan a hma lawk zana ka lawmna mittui chu lungngaihna mittui in a chhunzawm nghal a. Argentina jersey duh taka ka hak lai pawh suk ngai hial khawpin chu lungngaihna mittui luang chuan a chiah zawp hial zu nia…!

Kum 2018 World Cup zet zawng a dan a dang ta hle mai. Mahni in leh lo chhuansana, Zawlkhawpuia eizawnna thil avanga in ka luah tawh hnu a ni ve thung a. Khawhar taka mahnia ka chenna, ka parawl runah hemi World Cup hi ka thlir a (Final erawh LPS Studio-ah ka en a). Khami tuma Argentina team fluctuate lutuk vanga ka rilru buai nasa lutuk khan stress min siam nasa hman hle a ni. Khelh hmasak berah an sawp hrep tura ka ngaih, Iceland team an han draw phawt a, chumi hnuah Croatia in min mualpho a. Khawnge Messi? Aguero, Hiquain, Di Maria te kha khawiah nge an awm zawh tak tiin field chhungah ka zawng ruai mai. Mascherano chauh kha field chhunga ka hmuh chian chu a ni.

ICU ah hnukchat lek leka an awm laia group match hnuhnung bera Nigeria an hneh avang leh lehlam panga group member dangte inkhel result in min chhan avanga ICU atanga General ward mai ni lova, damdawi in khum ata discharged kan han ni leh ta zet kha zawng ka thinlung zawng zawng kha lawm vangin a rum chhuak ni maiin ka hria! Nimahsela, hlimna leh lawmna hi a van rei lo thin em! An thleng thui dawn chauha France team ten an zinkawng an tih tawp sak leh ta a. A sunna tiin khami zan kha ka meng tlaivar zak a nih kha!

Tichuan, hun leh kumte a lo ral zel a, dam rei nghah thila kan ngaih World Cup 2022 pawh kan lo thleng leh dawn ta reng mai a. World Cup 2014-a German ral lian ngam loh vanga ka tahna mittui, Copa America 2021-a La Albiceleste team ten champion nomawi an chawi vanga hruk hula awm kha kumin World Cup-ah hian hruk hul hlen a ni dawn em tih chu tuna ka ngaihchan leh ka nghah ber a ni rih ta a nih hi! Hemi thu ka ziak hma lawk hian Copa America 2021-a La Albiceleste team te nomawi chawi lai kha ka ennawn leh a. A bik takin Messi nomawi chawi lai ka hmuh a, a team ten an theihna zawng zawnga an han chawimawi lai ka hmuh khan lawm avangin ka hnuk a la ulh lek lek thei zu nia! Argentina, aw Argentina…🇦🇷





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)




Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post