HAND OF GOD

byAdmin — 0
- K. Remruatfela
 
Argentina leh FIFA World Cup sawi apianga, sawi hmaih thiang lo leh rilrua lo lang nghal chu ‘Hand of God’ hi a ni ngei awm e. He thil thleng hi a hnu zelah sawi a hlawh chhunzawm em em a. Lehkhabu tam tak a hrin phah bakah T.Shirt, wall paper leh banner ah te hman chuai chuai a ni zui a. Huai tak taka chhang ngam pawh an awm nuk mai.


Kum 1986 World Cup chu Mexico ramah nghah a ni a. He World Cup ah hian team 24 telin, chung team te chu group 4-ah inthen lehin a sang pahnih theuhte chu Round of 16 an lut nghal a. Group tina pathumna theuh atanga a sang pali te pawh stage sang zawkah an inhlangkai ve leh bawk a. Defending champion Italy erawh Round of 16-ah France hneh lovin puan thuah an tel zui nghal a ni.

He World Cup hi khawvel mipui hriata a larna chhan ber pakhat chu eng dang ni lovin Diego Maradona in par a chhuang vang a ni. Argentina team te chu Group-A ah awmin group winner an ni a. Round of 16-ah Uruguay chu si khat faia hnehin Quarter final an inpet kai. An hmelma hlun England team te pawhin Round of 16 ah si thum fai laiin Paraguay an hneh ve leh a. Argentina hmachhawn turin Quarter final an in pet kai ve ta bawk.

Tichuan, ni 22 June, 1986 khan Mexico khawpui pakhat, Estadio Azteca ah Argentina leh England team te chu an inhmachhawn ta a. Inkhel bul an han tan chiah a, an innawr tawn zak zak nghal. Maradona ball pet tha tak tak chu England goal keeper, Peter Shilton chuan a dang nasa mawlh mawlh hle. Minute 13-na England lamin ho takin an thun thelh a. Chu bak chu first half lamah chuan goal hlauhawm a awm zui ta lo.  Minute 15 an han hahchawlh hnuah second half an han tan leh a. Minute 6 chiah an la khel hman tihah khawvel football history sawi nikhua reng renga sawi hmaih thiang tawh lo leh dai ngai tawh lo tur thil a thleng ta!

​Argentine captain, Diego Armando Maradona chu khelmual vei lamah tlan pheiin a team mate, Jorge Valdano nen ball an in pass tawn zak zak a. Chutia an in pass phei hnuah chuan  Jorge Valdano chuan England left back, Steve Hodge dan phak loh chiah chiahah lehlam goal zawnah ball a vawh kang a. Chu ball kang lo invawrhchho chu lo man tumin England gool keeper senior, Peter Shilton chuan a lo bawh hnai bawk a. Chu veleh, Diego Armando Maradona chuan referee leh a puitute hmun hman loh khawpa rangin a zuang kang a, a lu chunga ball lo invawrhchho chu a kut hmang tangkaiin ball chu goal-ah a chan tir ta a. England chuan si an phur ta der mai.

​He thil thleng hi a hnu zelah sawi a hlawh chhunzawm nghal em em a. Game khelh zawh a nih veleh chanchinbu mite chuan Maradona chu a goal thun chanchin an zawt nghal ta chat a. Amah Maradona ber pawhin phat zui a tum hran lo. ‘Ka kut ni lovin Pathian kut a ni a. Kan ram min run tu, England sawkar laka phuba lakna a nih kha’ a ti sam et mai.

Argentina leh England team te hi chi inthliarna avangin kum 1966 World Cup atang khan an lo inhmelma daih tawh a. Chutia boruak a inmun chho mek tawh laiin a belhchhan turin, hemi World khelh hma kum 4 kaltaa khan Falkland thliarkar pakhat inchuhin England sawrkar chuan Argentina ram chu a namen lovin a sawp a. A sawhkhawk hi a nat em avangin ‘Falklands War’ tih hming an put zui tir nghe nghe nghe. Heng thil thleng zawng zawng ngaihtuah hian he ‘Hand of God’ boruak san tur zia hi kan chhui thiam nghal mai awm e.

He inkhelh tuma Maradona jersey hak hi National Football Museum ah hun rei tak vawn that a ni a.  Nimahsela, he jersey hi hluttu leh mimala kawl duh tu mi tam tak an awm avang leh lilam mai tura nawrna a nasat em avangin ni 4 May, 2022 khan US pawisa 7,100,000/- ( India pawisa chuan) laiin lilam a ni a. Hei hi khawvel sport history-a T.Shirt lilam awm tawh reng renga an chhan huai ber tum a la ni hial nghe nghe.

Tin, he thu ziah lai mek hian hemi inkhelh tuma Maradona in England a pet chhuahna ball hi lilam tum a ni tih thuthang a awm mek bawk a.He lehkhabu tih chhuah a nih meuh chuan thu chiang a awm tawh maithei. He ball hi khami tuma referee, Ali Bin Nasser khan a kawl zui a. News Reporter ten an tarlan danin 2.5 – 3 million velin chhangtu an awm dawn ni awm tak a ni. He ‘Hand of God’ zet hi chuan football khawvelah thu a la sawi zel dawn niin a lang.









(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post