ARGENTINA v/s NETHERLANDS GAME THLIRLÂWKNA

byAdmin — 0
- K. Remruatfela

1. Argentina leh Netherlands te hi vawi 9 an lo inhmachhawn tawh a. Team intumtâwk tak ni thinin Netherlands te hian vawi 4 hnehna an chang tawh a. Argentina in vawi 3 hnehna an chang ve tawh thung a. Vawi 2 erawh an inhnehtawk a ni.


2. World Cup bikah hian vawi 5 an inhmachhawn tawh a. A hmasa ber chu kum 1974 ah niin Johan Cruyff vanglai tak a ni bawk a. Group stage-ah Netherlands hian La Albiceleste te hi 4 - 0 laiin an sawp a. A hnu kum 1978 World Cup final ah an inhmachhawn leh a. Hetah erawh Mario Kempes leh Daniel Passarella te vanglai a ni bawk a. Si 3 - 1 in Argentina ten hnehna an chang ve thung a ni. Kum 1998 khan inhmachhawn lehin Quarter Final minute 89 naah Dennis Bergkamp in Ayala kapkarah mawi taka ball sawh lutin Carlos Roa dan rual lovin Dutch ho hian La Albiceleste hi an lo tlawm tawh a. Hemi tum hian kum 7 mi lek ka la ni a, mahse ka mittui a tla ve hial hman tawh a ni! Kum 2006 group stage-ah goal awm lovin an inhnehtawk a. World Cup-a an intum hnuhnun ber erawh 2014 kha niin hun pangngaia goal an thun loh hnuah penalty hmanga chinfel niin Argentina ten hnehna kan chang leh ta zawk a ni.

3. Argentina leh Netherlands te hi group leader ni ve ve chunga quarter final inpet tling an nih avangin an insu tur hian khawvel mipui ngaihven a hlawh tir phah leh zual a. Tun hnaia an game performance enin inhnehtawk leh intum tawk tak tur pawha ngaih an ni. Players malah chuan Lionel Messi leh tun hnaia che tha tak - Cody Gakpo te inel tur hi a hmuhnawm hle beisei a ni a. Tlar lai lamah Dumfries leh De Paul innuai tur hi khawvel hmuh châk a ni bawk. Chung zawng zawng aia khawvel thlir châk ni-a lang chu khawvela Defence khawng bera mi tam takina an ngaih, Van Dijk leh a thianpa Ake te hian Messi râl lo lian tur hi an dang zo ang em tih mawlh hi a ni.

4. Anni pahnih team hi tun hma atang tawha Attacking game lo khel thang tawh ve ve an ni a. Hmatawng nei chhe ngai lo tih ve vea sawi thin pawh an ni. Amaherawhchu, kumin erawh team pahnih ve ve te hian tum dang zawng aia tlar hnung an neih khawng ber tum a ni âwm e a tih theih a. Van Dijk leh Ake te an awm miau avangin tlar hnung lamah chuan Dutch hi khawng deuh zawk tura ngaih an ni. Tlar lai pawh hi Argentina panna ber an nih avangin Dutch hi an chungnung zawk tur anga ngaih an ni a. Nimahsela, Enzo Fernandez hian pressure sâng a zo a nih phawt chuan nuamsa takin Dutch team te hi an awm bik hauh lo ang. Tlar hma lam erawh Argentina team hi chungnung zawk tura ngaih an ni a. Messi, Alvarez, Di Maria, Lautaro Martinez etc inkawp tur hi chu eng angin Defender tha pawh hian an dan chah theih reng hi chu a rinawm loh!

5. An game khelh dan hrim hrim han thlir chuan Argentina team te hian ball an thiam zawkin skillls lamah pawh an sâng zawk tih a chiang a. Nimahsela, Oranje te hian team conbination erawh an nei tha zawk niin a lang. Di Maria leh De Paul te hian insawlselna zeuh an neih avangin Scaloni hian hun tluanin a ring ngam ang em tih hi rin thiam a harsa a. Hei vang hian tlar hnunga Romero leh Otamendi te inkawp pui turin Lisandro Martinez hi a luh tir mai a rinawm a. Hei hian a entir chuan Argentina team te hian defensive game lam hawi deuh khelin Netherlands lam hian an nawr zawk mah âwm e tih a rin theih. Game hmuhnawm leh class tak a nih ngei pawh a rinawm.






(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post