Ticker

10/recent/ticker-posts

TRAFFIC AH HMA A LAK THEIH

2nd November 2022


Transport Department emaw, Traffic Control lam emaw tana hman nghal theih tarlang ila, mumang ram emaw tih mai tur a tak hmuh tur la awm lo, Traffic Jam Free emaw, Kawngchhawng emaw Leiverh emaw chu sawi ve lovang!!

KAN JAM LUIH LUIH :
Thawkkhat lai khan Aizawla kehnih nei chi lirthei zuar (Dealer) pakhat hi thlakhat chhunga a tlangpuia an lirthei hralh dan ka zawt a, 500 vel bawr an hralh thu a sawi(Tunah phei chuan hei ai hian a tam maithei). Two Wheeler Company dang Dealer an awm nual a, ke li nei chi zuar ho zawng zawng nena an hralh chhuah hi a namai lo ngawt ang.

Kawngpuia lirthei tlan tur chu a pun thur thura, a changkan telh telh laiin a kawngpui bera chu a ngai reng a, hmasawnna hmuh tur, kawng siam belh, tih zauh hmuh tur a vang hle thung a, November thla a ni tawh a, Aizawla lirthei awmsa tawt fahrana nitin tlante bakah thingtlang lam aṭanga chakkhai lam lirthei tlan lut nen tun apangin kan Jam nasa ta hle a, Emergency (Ambulance etc.) tan pawh tihngaihna a awm ta lo a chha chu a ni ta.


LIRTHEI NEIH A AWL LUTUK :
Mizoram ah hian lirthei neih a awl lutuk hi Control a hun tawh. Manipur, Myanmar Etc. aṭangin an rawn pem a, Aizawl ah mi inhnuai an luah a, Mizoramah Vote an neih theih hma hauhin pawisa an neih chuan lirthei Second Hand thlengin an lei thei nghal ringawt zel te, anmahni chenna tur pawh an hmuh ṭawk laiin lirthei dahna tur hisap hlek lovin kan lei pawp pawp thei zel hi Control a hun tawh.

Ram changkangah chuan lirthei neih a harsat zia kan hria. A nei thei te tan pawh eng anga lirthei manto pawh nise kum 10 bak Permit an pek theih loh avangin mi satliah tan neih mai mai a harsa a, Bus leh Taxi (Public Transport) an hmang uar hle a ni. Keini ramah chuan lirthei neih a awlsam lutuk hian harsatna a thlen mek tawh a ni. 

CHHUNGKAW NEIH THEIH ZAT BITUK :
A hausa apiang lirthei ah kan in tlansiak emaw tih turin kan nei diah duah a, keli nei aṭangin ke hnih nei ka hung tiarh tuarh a, Sorkar hian chhungkaw pakhat (Inkhata cheng) te tan lirthei neih phal zat hi a bituk thuai loh chuan kan lei zo rep rep lutuk a, kan buai mek a nih hi.

"Tlan loh ni" te kan han siam thawr mai a, Aizawl ah zet chuan tlan loh ni a tlanna tur thlengin kan lei thuah ta awlh awlh mai a, kan nei Double thliah thluah ta mai a, tlan loh ni chuan lirthei thar a hring mawlh mawlh a, a pun phah nasa ta mai a nih hi. Chhungkua ang zawnga lirthei neih theih zat bituk a hun e.


KAWNG LEH TUI PIPE SIAM :
Heti khawpa Traffic Jam nasat karah hian kawng lun lai leh pengṭhuam lun lai tak te chhun pachang, lirthei tam laia kawng kan thawm ṭha a, tui Pipe siam hna kan thawk sek mai hi chu Traffic lam kan ngaihthah vang a tih theih a, mi tam zawk hmuh laia hnathawk nih tarlan duhna pawh a ni thei!! Hei hian Aizawl chu a tibuai nitin deuhthaw a nih hi.

Heng hna reng reng hi zan lamah thawh ṭhin ni tawh se, zanah pawh lirthei thawl huna thawh theih mai a nih hmel a, lirthei tlan tibuai lo zawng hian hnathawh te pawh kan zir a ngai a nih hi. Traffic Police pahnih khat vil chilh ngaia chhun pachanga kawngpui lunlaia hnathawh tum kher hi a changkang lo ṭan. 


ZAN HUN HMAN ṬANGKAI :
Aizawl hian zan hun hman ṭangkai kan zir a ngai tawh. Bawlhhlawh paih, Gas sem Etc. te hi veng ṭhenkhatah chuan harsatna tling a ni leh tawh. Chhun engah kher tih kan tum a, kan kawng a chep si a, veng keltil thlengin a Jam ta zel mai. Heng thil tam tak hi zan men chhung dar 8-9 inkara  thawh theih vek tho a nih avangin zan lam hun hman ṭangkai kan zir a hun tawh hle a ni.


SALUTE !!
Traffic Police Duty te meikawhin an ṭang a, an hmanhlel a, an vir vut vut a, Shillong By-Pass Road awm hma, Traffic Jam runpui tawng tawhte chuan kan hria ang, zankhaw tai rek thlenga  khaw vawt kara Duty te thinchhiat ṭhin zia kha!! Kan Traffic Police Duty te hi an hawihawm zawk ngawt mai. Pengṭhuam ah, a lûn laiah an Duty a, Aizawl ah Salute pek ngaia pui an tam si, an han Salute leh zawk zawk a, tute emaw Batminton khel hawlam kallam Sorkar Motor a ṭhu tûm bur satliah thlenga Salute pe tura khawlai chara kan Duty tir hi chu an khawngaihthlak ve deuh. An Department (Home) lam Officer bakah Department dang hotu lawk Salute tur an tam si!!an buaiin an hah si, an thû thap hlawm a, heng Duty te hian zah an phu a, Salute thleng hian zalen taka âwl dan a awm mai lawm ni? Heng buai lutuk leh hah taka hnathawkte Salute pek phût kher Officer te hian in duat a, in hriatthiam a ngai tawh a nih hi. An hna hautak zia hria in Salute pek tih velah hi chuan zalen ve rawh se!!


TAXI :
Hei hi chu mipui lam chan.. duh duhna hmuna Taxi (Two Wheeler) thlenga phar kan ching hi sim a hun tawh. Motor hûn remna lai deuhte hi zawng ve ila, hnunglama tlante tibuai lo zawnga Taxi hman dan kan zirthiam a ṭul hle tawh mai. Kan dawr kalna zawn, kan remchanna ringawt hian midang a tibuai thei tih hria in remchang zawn thiam kan zir a hun tawh e.



TLIPNA :
Ban phak loh sawi vak vak ai chuan kan tih theih nghal mai sawi hi a tha.
He Bus vanglai, kan chuan fo lai khan hetiang thu hi ziah a la ngai ngailo hrim hrim.






(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments