Thêntlâng leh Kram Infracon Private Limited inkarah inremna siam; Hna chhunzawm loh chhunzawm dawn!


Aizawl | Nov 5, 2022: Vawiin khan Central YMA hnuaia NHIDCL Monitoring Team-te chuan Keițum leh Khûmtung inkâr kawng siamtu *Kram Infracon Private Limited* leh an lung lâkna khua *Thêntlâng* khawtlâng inkâra thu inhmu lo awm avânga hna thawh chhunzawm theih loh inkara palai hna thawk turin Thêntlâng khua-ah an kal a. Hun rei tak hna thawh chhunzawm tawh loh chu inremna siamin, kawng siam hna thawh chhunzawm a ni leh dâwn.


He hunah hian Central YMA Vice President Pu Lalhmachhuana hovin Central Executive Committee member-te leh Serchhip Sub-Hqrs YMA hruaitute bakah Țawitlâng Group YMA hruaitute an kal a. Kram Infracon Private Limited hotute leh Thentlâng khawtlang hruaitute hi kawmin an in kara in hmuhthiam lohna an neih te an ngaih thlak sak a.


Uluk taka hun engemaw chen an sawi ho hnuah Central YMA hruaitute hian a tawn tawna an that tlanna tur ngaihtuah puiin inremna lailâwk kum 2 daih tur an ziak thei ta a ni.

An in remna ang chuan an khaw rama lung lâk chhunzawm chu Thentlâng khawtlang hruaitute hian an phal sak a, company pawhin khawtlang hruaitute duh dan zawm intiam in, hna an thawk chhunzawm leh thei dawn ta a ni.

Central YMA hruaitute thu rawn angin Serchhip Sub-Hqrs YMA hnenah Kram Infracon company hian an CSR fund atangin Ambulance an pek tur thu an sawi bawk a ni.








(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post