FEATURE | Mizoram Christian College Miss 2022 - 2023 Erin Renthlei

Mizoram Christian College Miss 2022 - 2023 Erin Renthlei kan belchiang.

Erin Renthlei tia hriat hlawh Mizoram Christian College Miss 2022 Erin Lalnghilhlovi hi Lalnunthari leh R Lalthuama te fanu niin, March 5, 2004 khan a lo piang a. Unau pali zinga upa ber niin, an unau zinga hmeichhe awm chhun a ni.

'Erin emaw Nghilhlovi' koh thin Erin Renthlei te hi Tlangnuam Vengthar, Aizawl-a cheng leh khawsa niin, Presbyterian Kohhran a lawi an ni.

Erin Renthlei hi ft 5'5½ a sang a ni.

Erin Renthlei-in EXPLORE MIZORAM zawhnna a chhannate:

📌 Zirna lam:

~ Pawl 10 hi Living Water School, Mission Vengthlang atangin Kum 2020 khan ka pass a, Pawl 12 hi Oikos Higher Secondary School, Tuikhuahtlang atangin 2022 khan ka pass leh a, Tunah hian Mizoram Christian College-ah B.A (English) 1st Semester ka zir mek.

📌 Hobby: Music ngaihthlak, eng eng emaw renovate te, chuan a chang changin poetry leh prose ka ziak ve thin bawk.

📌 I duhzawng leh ngainat zawng hrang hrangte?

• Lehkhabu duh: Ka naupan lai kha chuan Children comic books hi ka chhiar ve nasa thin a, tun hnu thleng hian chhiar nuam ka la ti. Tun hnuah hi chuan prose and poetry ka chhiar nasa a, tunah hian novel Jane Eyre Charlotte Bronte ziah ka chhiar zo chiah a, hei hi ka duh hle a ni.

• Actor/Actress: Leonardo DiCaprio / Angelina Jolie

• Zaithiam: Sixpence None The Richer, Secondhand Serenade, A Rocket To The Moon, Adam Levine, Taylor swift, etc etc.. an tam lutuk😄

• Chawhmeh: Alu kan😆

• Hla: Home for the summer, Talk to me

• Hmun: Khawpui ri bengchheng lutukin a chim buai lutuk lohna hi nuam ka ti a, a bakah kan In hi a ni mai.

• Rawng: Black Colour 

• Ziaktu: Rudyard Kipling

📌 Mize ngainat zawng:

~ Chapo lo, lainatna ngah leh thilphal, hriatthiamna ngah tak, mi hawihhawm leh a hun leh a hmun hria te hi ka ngaina fal bik.

📌 Mize ngainat loh zawng:

~ Mahni ngaihdan dik ber emaw ti te, mi hrehawm tih zawnga thusawi ching te leh midangte hmuhsit ching hi ka ngaina lo.

📌 Kawppui tura duhzawng?

~ Mahni kut ke ngei a din tum tlat mi, mi tumruh leh rinawm tak leh engkima a nu leh pa leh Pathian dah pawimawh tlat mi.

📌 Relationship status:  -

📌 Aim in life:

~ Civil service lam a nih loh pawhin Professor line a kal ka tum.

📌 Mizoram Christian College (MCC) Miss 2022 - 2023 thlanna a tel chhan?

~ Dik tak chuan tel tumna pawh ka nei ngai lo hrim hrim a, mi te anga zei tak ka ni ve bawk siloa, mahse kan house leader te leh college SU ten min tihluih ve nasat em avangin an zahawm ka ti em a, ka tel ve ta tawp mai a ni.

📌 MCC Miss 2022 - 2023 nih hi i inring reng em?

~ Ring lem lo khawp mai. Ka telpui, ka thiante kha kei aia phu tak tak te an ni hlawm a, chuvang chuan, ka inring pha lo hrim hrim!

📌 MCC Miss 2022 - 2023  in i nuna nghawng a neih?

~ Keima tawkah zirna ah a ni emaw, discipline lamah pawh theihtawp chhuah duhna min pe a. Thil tam takah ka nun a vawng em em a ni.

📌 Modelling lam i tui em?

~ Tui hranpa lo!

Zawhna dang:::

1. A tel lova i awm theih loh:

~ Ka chhungte, ka diary leh mobile phone a ni rih mai!!

2. I nun kaihruaitu:

~ Pathian, ka chhungte leh kan zirtirtute.

3. Hringnuna i hlauh ber:

~ Ka hmangaihte min kal bo san hi ka hlau ber.

4. I tih ngai miah loh tur:

~ Ka phak tawka tanpui theih ka neih chuan kalsan emaw hawisan hi ka tum lo bur.

5. Mizo Tualzal nuna ṭha i tih:

~ Kan tlawmngaihna, aia upa zahna leh chhiat ni that ni a kan intawiawm tawnna te hi a tha ka ti.

6.  Quote i duh ber:

~ "God is within her, she will not fall"

7. Mizoram leh Mizo tualzal nuna Mizo hmeichhiate dinhmun:

~ Hnam dang tam tak kan hmuh thin ang hian kan hmeichhiate hi Mipate hian min khuahkhirh em em lo a, kawng engkimah min la hlahthlem thiam em em a, kan duhzawng apiang leh kan thlen phak chin chu kan thleng zel a, chawimawi tlak kan tih kan chawimawi ve zel bawk a. Chuvang chuan,  Mizo hmeichhia te dinhmun hi a hniam bik ka ti lo.

8. Hnam hmingṭhat leh hmingchhiat kawngah Hmeichhiate'n mawhphurhna:

~ Hnam hmingthatna kawngah hi chuan a hmei a pa ten kan nun kan uluk a ngai a, nun tha tak leh midang entawn tlak taka kan nun chuan kan hnam mai ni lo keimahni pawh kan hmingtha tihna a ni. Hnam hmingchhiat kawnga hmeichhia te mawhphurhna  hi a lian ve hle a. Pakhat lek nun uluk loh leh chet mawi loh avangin kan phek mualpho thei a, chuvang chuan, hnam dang zingah a ni emaw thianho inkawm khawmnaah te fimkhur taka nun hi kan mawhphurhna a ni.

9. Hnam ziarang chawinun kawnga Hmeichhiate mawhphurna:

~ Chhiatni thatni a Mizo ten hmanlai atanga kan lo tih thin thingpui sem te,  kan hnam thuam te zah thiam a mawi taka kan inbel a, tlawmngaihna khawi hmunah pawh chhawm nun zel hi kan mawhphurhna niin ka hria.

10. Mizote tan 'Fa neih tlem' inzirtir hi a ṭulin i hria em?

~ Mizo te hi hnam tlem te kan la ni a, kan hnam hi  awlsam taka chimral theih a la nih hrih avangin kei chuan 'fa neih tlem' hi a tul ka ti lem lo.

11. Mizo hnam ṭhanmawh bawk nia i hriat?

~ Kut tlinglo a sum leh pai lak luh te, a la luttu te kan la inngaisang in kan la dah sang fo zawk te hi a zahthlak hle a, hei hi kan thanmawh bawk te zinga lian ber niin ka hria.

12. Mizo hnam damna atana  kawng awm nia i hriatte?

~ Hruaitu tha leh a taka Pathian tih mi, rinawm taka hna thawk, ram hmangaihtu dik tak thlan thiam te hi kan hnam damna atan a pawimawh hle.

13. Hnam chhan nana Hmeichhiate ṭangkaina leh mawhphurna?

~ Hnam chhan nan hian hmeichhia ten tangkaina leh mawhphurhna tam tak kan nei a, kan hnam tana hmasawn nana lehkha zir san te, 'hnam dang pawhin an theih chuan kan thei ve a ni' tih rilru pu a, sang tak thlen tum te, kan hnam laka rinawm tlat te hi kan mawhphurhna a ni.

14. Zirna, Khawtlang leh Kohhran hi?

~ Kei chuan heng te hi ka support tlata kan nun kaihruaitute zingah a lian ber awm e. Kan society ah chuan heng hi a la beh tlat avangin heng hian kawng tam takah mipuite min pui em em a, khawtlang a ni emaw kohhran a ni emaw zirna in a nih pawhin kei chuan a theih chhung chu heng huang chhunga awm hi ka tum.

15. Khawtlang, Kohhran leh nangmah:

~ Zirlai ka la nih avangin khawtlangah hian ka la inhmang lutuk thei lo a, mahse,  theihtawpin kohhranah hi chuan ka inhmang ve thin a, hei hian ka nun kawng a hruai ve hle a ni.

16. Social Media leh Nangmah:

~ Social media hi kei chuan ka khawih tam em em lo a, ka duhzawng en nan leh thlalak dahthat vel nan hian ka hmang deuh ber.

17. Mizoram ṭhalai tam tak tlakchham:

~ Mahni inchawm zo lo hi kan la tam em em a, thawh hreh hi kan la ngah bawk a, kut hnathawh te hi zak lo ila, a thawk a te pawh hi inngaisang tawn zawk ila, thawk lova awm tawp hi a zahthlak zawk a ni tih hi kan rilruah lian ber bawk se. Mahni kut ke ngeia din tumna hi kan la tlachham deuhin ka hria.

18. Mizo ṭhalaite hian ngaihsan tur dik an ngaisangin i hria em?

~ An ngaihsana zir ka ti kei chuan.

19. Ngaihsan tur dik nia i hriat:

~ Dik taka sum thawk chhuak tute leh mi rinawm te hi ngaihsan tur dik tak niin ka hria.

20. Hlawhtlinna tura pawimawh:

~ Tum ruhna leh tei rei peihna te, taimakna te leh engkima Pathian hriat tlat hi hlawhtlinna turin a pawimawh ka ti.

21. hloh i hlauh ber:

~ Pa chân tawh ka nih avangin a nat zia ka hria a, ka chhungte, ka unaute leh ka thiantha te hi keichuan hloh ka hlau ber.

22. Zo hnam inpumkhatna hi a thlen theih i ring em? Thleng thei turin engnge pawimawh nia i hriat?

~ Ring e. A chhan chu Mi thahnem ngai te zarah hma kan sawn zela chi leh chi inthliarna te pawh a reh chho zel a, kan in unau na te pawh hi kan dah pawimawh chho zel a chuvangin Zo hnam hi kan la inpumkhat ngeiin ka ring

23. Hnam dang nupui pasal neih hi - 

~ Kei chuan pawi ka ti lem lo a, a nei tawh te hi kan sawisel theih an awm lo a, an hlimna a nih chuan ka support bawk.

24. Nupui pasal neih hmaa mipat hmeichhiatna hman hi:

~ Kan kristianna nun nen a inmil loh avangin a tha ka ti lo.

EXPLOREMIZORAM.COM i hmuh dan:

~ A tha ka ti. Mizo website zingah chuan a tha ber pawl leh rin tlak ber pawl leh tangkai tak a ni.

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Website leh a hnuaia fakna hi lo hmet ve rawh.)