GOLD MEDALIST | MZU M.Com Gold Medalist 2022 Rohluzuali

MZU M.Com Gold Medalist 2022 Rohluzuali kan belchiang.

'Zuali' tia koh thin, MZU M.Com Gold Medalist 2022 Rohluzuali hi Lalhuzami leh Vanlalchama te fa pakaw zinga a naupang ber niin, 24th May, 1999 khan a lo piang a. Hnahthial khua, Lungleng venga awm niin, Venghlui, Aizawl-ah an cheng mek a. BCM kohhrana lawi an ni.

Rohluzuali te hi unau pakua niin, mipa 2 leh hmeichhia pasarih an ni.

Rohluzuali hi 2020 khan MZU hnuaiah B.Com Gold medalist a lo ni tawh a, hemi kum hian a phirpuinu pawh top 10 ah a lang bawk a ni.

Rohluzuali'n Explore Mizoram zawhna a chhannnate:

📌 Zirna lam:

~ Pawl 10 hi Govt. High School Hnahthial atangin kum 2015 khan ka pass a, Pawl 12 hi  St Pauls Higher Secondary School atangin kum 2017 khan ka pass leh a, Bachelor of Commerce hi kum 2020 khan Higher And Technical Institute, Mizoram, Lunglei atangin ka zova, tin, M.com hi Pathian khawngaihna zarah Mizoram University atangin kumin, 2022 hian tha takin ka zo a ni.

📌 I lehkha zir dan?

~ Class lecture hi ka ngai pawimawh em em a, hriatthiam tum takin ka ngaithla phawt a, tichuan kan hotuten a study materials min pek te, lehkhabu hrang hrangte leh google a mi te hi ka rawn a, note te ka theih ang angin ka siam thin a. Tin kan zirlaiah hian chawhchi a tam avang hian lehkhabu hrang hrang ami hi ka en kual nasa ve thin hle a ni. Zanah hian dar 8 atanga dar 11 hi ka zir dan tlangpui a ni a, assignment a tam chang te hi chuan dar 3-4 thlen chang te pawh ka nei thin, exam lai hi chuan hun awlah hian ka zir char char deuh tawp a, zanlamah hian 12 velah ka mu a, tichuan zing lamah hi chuan ka thiam tawh sa te ka en nawn leh thin a ni.

📌 Harsatna I hmachhawn dan?

~ Pathian zarah Harsatna lian tham em em hmachhawn ka nei lem loa, Pathian hnenah hian ka thlen mai thin a ni. 2nd semester kan zir lai khan ka ke hi zai a ni a, mahse online-a kan kal lai a nih avang leh zirtirtute min hriatthiamna zarah tha takin ka paltlang thei a ni.

📌 Gold medalist i nihna (Subject) leh CGPA?

~ CGPA - 7.898 Master of Commerce

📌 Gold medalist ni tura i beih dan?

~ Gold medalist ka nih hi ka inring em em  lova, kan zirlai hi hriatthiam ka tumin theihtawp tak meuh ka chhuah ve thin. Zirnaah rilru pe reng lo mah ila, ka zir hi chuan thildang hi ka ngaihtuah vak ngai lem lo. 1st sem leh 2nd sem-ah a ti tha ber ka ni ngai lo a, mahse theihtawpin ka bei ve zel a, 3rd semester leh 4th semester ah te Pathian khawngaihna chang chho in hetiang dinhmun hi ka lo chang ve a ni.

📌 Gold medalist ni tura i beihnaah faculty lamin an ṭawiawm/pui ṭha chein i hria em?

~ tehreng mai, teaching leh non-teaching staff thleng hian min ngaihtuah em em a, thu tha leh kan career tana tangkai tur chenin min hrilh fo thin. Whatsapp leh call hmangte hian ka tibuai nasa thin hle a, phun miah lohin ka thil hriatloh leh thiamloh te zalen takin ka sawi ngam a, an hun chep tak karah buai chung chungin kan tan theihtawp tak meuh an chhuak a, an chungah hian lawmthu sawisen loh tak meuh ka ba a ni.

📌 I zirna atana i chhungte pawimawhna:

~ kan chhungkua hi zirna ngaisang chhungkua kan ni a, ka zirnaah pawh hian ka chhungte hian tawngtainain leh kawng engkimah tan min lakpui a. Ka tihthat leh  tihchhiat changte hian min fuih phur nasa thei em em a, a aiia tha zawka tih duhna rilru leh chakna min pe tute an ni. Ka chhungte min tuipuina zarah leh min tawngtaipuina zara hetiang dinhmun thleng thei ka ni.

📌 I zirna atana i ṭhiante pawimawhna:

~ ka thiante hi ka zirnaah hian hmun pawimawh tak an chang a, online-a kan kal lai atangin conference call, whatapp call leh zoom meeting hmang ten kan zirlai kan sawi ho thin a, ka hlawkpui thei em em a ni. Tin offline-a kan kal hnu pawn hostela awm kan nih avangin leh kan thil zirah chawh chi a tam avangin zir ho leh sawiho a lo remchanga, weekend-ah hian kan zir tawh sa ho kan chawk ho leh thin a, thiam ve tawk kan intih hma kan in zirpui thin a ni, heihi hlu ka ti em em a, kei numericals lamah ka chak vak lo bawk nen, inelna thianghlim tak karah kha tiang hun kan nei thei kha a ropui ka ti a, a tute mai pawh kha kan pawimawh em em vek a ni.

📌 I duhzawng leh ngainat zawngte:

• Lehkhabu duh - tunlai tak hi chuan George RR Martin-a lehkhabu ho hi ka tuipui khawp mai.

• Rawng - a sen

• Chawhmeh  - a engpawh hi ka eithei vek mai, abikin alu hi ka hne thei lo.

• Incheina - chetpui nuam tak leh simple tak

• Rimawi – ka mood a zir in ka ngaithla kual vek zel mai.

• Mizo Ziaktu zingah - Lalhruaitluanga Chawngte leh Dr. Rema Chhakchhuak

• Hla - Rich Mullins a phuah 'All the way my savior leads me'

• Hla phuahtu - mizo zingah chuan Lalzarmawia hi ka duh em em a, chuan Taylor Swift hi a thiam ka ti khawp mai.

• Teacher - ka lehkhazir chhohnaah hian zirtirtu tam tak ka hrawn tawh a, ka nu in high schoolah min zirtir a, nu ropui tak a nih mai bakah ka zirtirtu ngaihsang ber te zinga mi a ni,a hming mala sawi vek a remchang lo a, tu te pawh hi an fel vel vek mai hian ka hria.

• Leader - APJ Abdul kalam leh Abraham lincoln

📌 Mize ngainat zawng:

~ fiamthu duh tak, inngaitlawm leh mi rilru tluang.

📌 Mize ngai nat loh zawng:

~ mi chapo leh mi tlin lohna hre thei em em ho hi.

📌 Hobby:

~ hunawlah chuan hla ngaihthlak leh movie han en vel mai mai te hi nuam ka ti.

📌 Kawppui atan duhzawng:

~ mi rintlak leh mi te zahthiam mi, ruihtheihthil laka fihlim.

Zawhna dang:::

1. A tel lova i awm theih loh:

~ Pathian leh ka chhungte

2. I nun kaihruaitu:

~ Tawngtaina leh ka chhungten a thu tha min hrilh thin te hian ka nun nasa takin min kaihruai thin.

3. Hringnuna i hlauh ber:

~ hmangaihte chan

4. I tih ngai miah loh tur:

~ Ka theih hram chuan midangte harsatna siamtu nih ka duh lo.

5. Mizo Tualzal nuna ṭha i tih:

~ Chhiat that nikhuaa kan in puih tawn dial dial thinna hi tha ka ti.

6.  Quote i duh ber:

~ "I can do all things, through Christ who strengthens me" - Philippians 4:3

7. Mizoram leh Mizo tualzal nuna Mizo hmeichhiate dinhmun:

~ Hmeichhe dinhmun chawisan kan tih reng rual hian tun dinhmun han en in mizo hmeichhia te hi kan langsar tawh em em a, sumdawnna in lian tak tak te, zirtirtu tam zawk leh sorkar pisa a dinhmun pawimawh tak tak chelhtu kan ni ta fur mai a, Zirna lamah pawh a ti tha pawl kan ni zel hi a lawmawm ka ti a, kan dinhmun pawh a tha thawkhat viau tawhin ka hria, Pathian malsawmna kan dawng nasa hle a ni. Tin, fate enkawlna kawngah te, inchhungkhur leh kan pawn lam hna thlengin mi rintlak leh taima tak kan ni a, mitin hian kan nunchang leh kan thiam thil tam tak hi kan inchhungkhur atanga kan zirchhuah a nih ka ring a, hei tak pawh hian nu dinhmun pawimawhzia a tilang in ka hria. 

8. Hnam hmingṭhat leh hmingchhiat kawngah Hmeichhiate'n mawhphurhna:

~ Hnam hmingchhiat leh hmingthat kawngah hi chuan a tute mai pawh hi kan pawimawh em em vek a, hnam dang kara emaw kan mizo pui kara kan hun hmannaah, kan hnam nena inzawm tlat kristianna nena in rem tak siin kan tawngkam chhuak, kan nunchang leh thiltih te hi ti ila. Aia upa leh mipate zai ngai thiam zel hi a tha ka ti.

9. Hnam ziarang chawinun kawnga Hmeichhiate mawhphurna:

~ Chhungkuaah hian nu ber in mawhphurhna sang tak a nei a, engkim mai hi inchhungkhur inzirtirna atanga in tan a ni ti ila kan sawi sual thui em em lovang. Ka nu in a sawi fo chu, ram danga pawh awm ula, nu tha chuan a fate hnehah a hnam ziarang, an nun dan, tawngte a thiam nal tir em em tur a ni a ti thin,a dik hle in ka hria. Hmeichhiate hian mipa te aiin incheina huangah ringawt pawh hian hnam ziarang pholan kawngah remchanna kan ngah hle a, puan chi hrang hrang kan neih te hi veng uar sauh sauh ila. Thangthar tena an thiam tawh loh em phurh, buh thlei te hi chungkuaa a thiamte hian  zirtir thiam zel hi kan mawhphurhna lian tak niin ka hria.

10. Mizote tan 'Fa neih tlem' inzirtir hi a ṭulin i hria em?

~ Keini mizo hnam tan hi chuan he policy hi chu a tul in ka hre lo. Kan hnam hi kan la tlem em em a, chim ral mai hlauhawma kan din avangte hian keini chuan fa nei tam tul zia hi tlangau pui zawk tha in ka hria. 

11. Mizo hnam ṭhanmawh bawk nia i hriat?

~  Inti-changkang satliah, nu leh pate chawmhlawm ni si kan tam ta lutuk te, ram hmangaih aia mahni pum hmangaih zawk politician kan tam ta lutuk te, thatchhiatna te hi kan ram thanmawh bawk te zinga mi niin ka hria.

12. Mizo hnam damna atana  kawng awm nia i hriatte?

~ Kan hnamah hian chiang thar leh ila, hmangaih ila. Pathianin ram min pek hi keimahni lo chuan duat taka enkawl tu tur an awm lo tih hre tlat ila, hma a sawn zel nan theihtawp chhuah theuh ila a tha ka ti.

13. Hnam chhan nana Hmeichhiate ṭangkaina leh mawhphurna?

~ Engkim bul intanna chu chhungkua a ni a, chumi a hmun pawimawh tak chelhtu chu chhungkaw nu ber a ni a, chhungkaw tam takah fate nena hun hmang tam zawk pawh pa aiin nu an nih ka ring. Inchhungkhurah hian ram hmangaihtura inzirtirna te hi sawi uar ila, kan mawhphurhna te, kan tangkai ve na tura kan koa hna awm theuh, a lian emaw te emaw rinawm leh rintlak taka thawh a tul zia te, zirlai kan nih chuan tha taka kan zir a lehkhathiam hnasang tak chelha, hnam tana mi tangkai zawk ni thei tura kan inzir a pawimawh zia te hi fate hnenah sawi tam ila. Chu chu hnam chhanna tur a a bul pawimawh tak niin ka hria.

14 Zirna, Khawtlang leh Kohhran hi?

~ Zirna hian khawtlang leh kohhranin hmasawnna tam tak a neih theih na turin a pui a, thil inang lo tak tak kal kawp tlat si niin ka hria. Zirna in a thlen san poh leh khawtlang a changkang a, kohhran a nuam thin.

15. Khawtlang, Kohhran leh nangmah:

~ Class 11 atangin kan khua ka chhuahsan avang leh, Hostelah te kan awm avangin kohhran leh khawtlangah ka in hmang tam em em lova, Mahse han haw chang hi chuan theihtawpin ka inhmang ve thin.

16. Social Media leh Nangmah:

~ Instagram, Youtube leh Twitter-te hi ka hmang tam ve em em a, mahse, lehkha ka zir hi chuan ka thlah leh hmak thei thung, min tibuai em em lo.

17. Mizoram ṭhalai tam tak tlakchham:

~ Mitinah a inang loin ka ring, thalai tam tak chu mi tumruh leh taima,hlawhtling tak tak mahni tuma chiang tak tak tam tak an awm ang. A then mahni tana tha tur pawh ngaihtuah thiam lemlo te pawh an awm. Hemi ah hi chuan mahni inhriatchianna, taimakna leh mahni inhmangaihna hi kan la tlachham viauin ka hria.

18. Mizo ṭhalaite hian ngaihsan tur dik an ngaisangin i hria em?

~ Hei hi chu mitinah a inang awm lo ve, western culture in min chiah piah tawh em em a, tin, thalai leh tleirawl zingah korean ho an lar em em, an incheina leh an awm dan kan entawn nasa hle bawk. Mahse kan entawn hmaih thin ni a ka hriat chu hetianga inchei thei tura an thawhrimna te, hlawhtling tura an beih nasat zia te hi, keini engmah thawhchhuah nei mang si lo ho hian lo entawn ve tlat kan tum thin hi chu thil fel lo tak niin ka hria.

19. Ngaihsan tur dik nia i hriat:

~ Mi rintlak leh rawntlak, dikna ngaina, mahni indah hmasa loa midangte ngaichang thiam mi.

20. Hlawhtlinna tura pawimawh:

~ Tawngtai, mahni inhriatchiana, taimakna, tumruhna. 

21. hloh i hlauh ber:

~ Ka chhungte leh ka hmangaihte 

22. Hnam dang nupui pasal neih hi:

~ Mizo te hi hnam tlem te kan ni tih kan hre teuh a, kan tunlai dinhmun han thlir phei chuan min chim ral mai ang tih hlauhawm tak a ni a, chuvangin nakin zela kan inchhir loh nan kan mizo pui ngei nupui pasalah neih hi a tha ka ti.

23. Nupui pasal inneih hmaa mipat hmeichhiatna hman hi?

~ Fihlim a, insum a tha. Pathian duh loh leh phal loh zawng a ni.

24. Hlawhtlinna hi?

~ Thawhrimna leh mahni inthununna nena hlawh chhuah chi a ni. Mitin te hi kan hringnunah hlawhtling kan intihna a dang vek ang, kan hmaa kan tihtur awmah rinawm leh chhel takin, Pathian rawn chung zelin ke pen zel ila. Hlawhtlinna chuan min um zelin ka ring tlat a ni

I thalaipuite tan fuihna:

~ Ram hmangaihna thinlung pu chungin, kan lehkha zir te kan hna te hi taima takin thawk teuh ila, kan ram hian keini thalaite hi a mamawh a, a hmalam hun hi keimahniah a innghat a ni ti i hre thar in, mi tangkai tak nih i tum theuh ang u.

EXPLOREMIZORAM.COM i hmuh dan:

- Kum 2020 atangin Explore Mizoram hi ka hmelhriat ve a, chanchin thar lam leh bengvarthlak tak tak min hlui thin hi a ropui ka ti a, keini ang tana hetiang platform tha lutuk in buatsaih pawh hi a lawmawm ka ti tak zet a ni. In kal leh zelna turah mi dangte tana malsawmna niin Pathianin malsawm cheu rawh se!

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Website leh a hnuaia fakna hi lo hmet ve rawh.)