RILRU CHIAINA CHINFEL DAN

 _Nun duhawm zawk nei tura inbuatsaih dan_

— Rick Warren 

— Nov 1, 2022

“Lawmte chu lawmpui ula, tapte chu tahpui rawh u.” Rom 12:15 

Thudik deuh mai chu, mi in harsatna lian tak a paltlang tawh chuan nunphung pangngaiah an let mawh khawp mai. Harsatna chuan mihring min thlak danglam ṭhin a, mihring bakah kan chhehvela chengte thlengin a thlak danglam ṭhin. Hun harsa tak paltlang tawh hnua nunphung pangngai chhunzawm tur chuan, nangma lamah insiamrem ngai a awm ang.  

Bible a kan hmuh kawng li hian harsatna i paltlang hnu pawha nun duhawm leh ṭha zawk i neih theih nan a pui ang che. Vawiinah hian kawng khat chauh kan thlir anga a dang chu ni dangah kan thlir zui dawn a ni. A hmasa berah chuan: *Chiaina chu hmachhawn ṭhin turah inngai rawh*

Babulon sala kum 70 meuh an tan hnua Jerusalema Pathian mite an kir leh hnu khan an rilru kha a phir a ni. An khawpui siam ṭhat a ngai a, mahse an thiltih hmasak ber chu Pathian Biak in dinthar leh a ni. A bul an ṭan phat a, an thawh zawh hma pawhin mi ṭhenkhat chu Pathian hnenah lawmthu an sawi a ni, ṭhenkhatte erawh chu midang temple ṭha tak te an ngaihtuahin an lung a chhia a an ṭap a ni.

Ezra 3:13 ah khan an rilru insaikalh nawk nawk kan hmu: “Chutichuan mite chuan lâwm avânga au thâwm leh mipui tap thâwm chu an thlei thei chuang lo va: mipui chu ring takin an au vak vak mai a, an thâwm chu hla tak atangin an hria a ni."

Nangmah ngei pawhin tawrhna emaw thihna emaw - lungduhte channa, hna channa, in leh lo leh ṭhiante thlenga channa i tawh hnuin rilru insual bat bat chang i nei ang. Lungngaih changte hlimni te i neih pawlh nawk nawk chang a awm fo a nih pawhin mi pangngai i ni tihna a ni mai. 

Chuvang chuan i tih tur hmasa ber chu rilru a insual deuh bat bat pawhin inhriatthiam a, midang pawh hriatthiam a pawimawh. Harsatna lian tak, Covid-19 ang chi kan hmachhawn te phei kha chuan tute pawh kha kan chiai vek a ni. Chuvang chuan midang hriatthiam hi a pawimawh hle a ni.

Rom 12:15 chuan, “Lawmte chu lawmpui ula, ṭapte chu ṭahpui rawh u” a ti.

Danglam deuh tura insiamrem hi a har hle a. Pathianin i nun a siamṭhatna kawngah hian thil thar leh nungchang ṭha zawk i neih theih nan a pui reng che a ni. Rilru lam chiaina a lo thlen pawhin nangma chungah leh midang chungah ngilneihna lantir ang che.

Harsatna lian tak, chhiat tawhna leh rilru lama buaina paltlang hnu phei chuan, dinhmun pangngaia dinchhuah leh hi a harsa a ni. Mahse Pathianin bulṭan min phalsaka, a hma aia nun duhawm zawk nei turin min pui duh reng a ni.

Ngaihtuah zui atan

* Harsatna, chhiatna leh rilru lama buaina i hmachhawnin. Engtin nge i rilru chu thildang ngaihtuahna nen a inkhap buai ṭhin?

* Vawiinah hian tu nge hlimpui thei che? Tu nge ṭahpui thei che?

* Harsat manganna in tawh laiin tuin nge ngaihsak che? Engtin nge an ngaihsakna che an lantir?

*[Lettu: Sangpuia]*